Matthew 5

Padahk in Pohn Dol

1 Nehn en Jesus kapangda pokonno, Ih indahla pohn dol oau mwindi; Nah sohnpadahkkok pokondo Ipoa. 2 Ih ken sapda padahki irai pwa:

Pai mehlel

(Luke 6:20-23)

3 “Meid pai irai kan ma anahne ngen,

pwa irai pirin johjohki Wein nehnloannge.

4 [a]Meid pai irai kan ma joang,

pwa Koahs pirin kainjenmwahuwihla irai.

5 [b]Meid pai irai kan ma aksiksik,

pwa irai pirin johjohki jampah.

6 [c]Meid pai irai kan ma kin ngoangki me pwung,

pwa Koahs pirin kaisarihla irai.

7 Meid pai irai ma kin kadek,

pwa irai pel pirin diar kadek.

8 [d]Meid pai irai ma mwakelkel nehn mohngiongirai,

pwa irai pirin kapang Koahs.

9 Meid pai irai ma kin wihwia doadoahk in kamwahu nehn pwungen armaj kan,

pwa irai pirin adanki jerihn Koahs.

10 [e]Meid pai irai ma kin loklokki pwung jang in irai mohmohmourki Koahs,

pwa irai pirin anki Wein nehnloannge.

11 [f]“Meid pai kamwai ma armaj lahlahwe, apel koalkoa kamwai, apel karaunihki kamwai joang likamw apel japwung ohroj pwa Ngoahi. 12 [g]Kamwai injenmwahu apel malau pwa kijakij koalik joujowi kamwai nehnloannge, pwa ioar pel joangwahr irai wiahng joukohppok mwohn kamwai.”

Jed apel Maram

(Mark 9:50; Luke 14:34,35)

13 [h]“Kamwai ioar jed in jampah. A ma nimen jeddo johla nime, joh mehkij kak en wiawihoang pwa en pwuroahng minehda nime. Johla kaspoan jeddo, ioarroar en kerpwihekla pwa armaj kan en alu puwoa.

14 [i]“Kamwai ioar maram in jampah. Kahnihmw oau ma mine pohn dol oau johkak oakkoakla. 15 [j]Armaj pel johkak okojda lahm oau kioang pehn pwohl oau. A irai en kioang pohn dohiahu pwa en kamarami ohroj nehn ummwo. 16 [k]En pel doahr amwai maram en janjalda mwohn armaj, pwa irai en kapang amwai wihwia mwehu kan apel kapngahki Jamamwai nehnloannge.”

Padahki doahr Kojonned

17 “Joah lemleme pwa ngoahi indoahng koauwehla Kojonned in Moses ke pel padahk in Joukohppok; Ngoahi joah indoahng koauwehla arai padahk kan, a Ngoahi indoahng kapwaihahda. 18 [l]Ngoahi pwehng kamwai in mehlel, ma nehnloannge apel jampah johla, insing siksik oau ke mwei siksik kij in Kojonneddo johkak joaloangla oaroh audoapoa ohroj en pwoaida. 19 Emen ma koauwehla oau in kojonneddok, mihndahr ma kojonnedwahr ma keiou siksik apel padahkihoang epwi en pel wia doahroar, pirin keiou siksik nehn Wein nehnloannge. A inje ma kin kapwaihahda apel padahkki kojonned pwiai pirin laplap nehn Wein nehnloannge. 20 Ngoahi pwehng kamwai, ma amwai wihwia mwehu joah mwehu jang en jounpadahk in Kojonned apel Pharisee‑ok kamwai uhdahn johkak dilda nehn Wein nehnloannge.”

Kojarmaj

21 [m]“Kamwai ne rong padahkkok ma mihn mehjjok oaloa, ‘Joah kojukdi armaj; emen ma kojukdi armaj pirin lelloang kadeik.’ 22 A Ngoahi pwehng kamwai: ma emen lioas oang riah[n] pirin lelloang kadeik. Pel oau, emen ma pwehng riahu, ‘Pweipwei men koawoa,’ pirin pel wijiklahng Mwoalen Koapwung. A emen ma pwa, ‘Koawoa iahk!’ ih kak lel oang nehn keper in oaiho nehn ehl. 23 Ma koawoa wia oamw meiroang in mwoallo a koawoa samanda pwa rioamw men injinjuwed oang koawoa, 24 kihdi oamw meiroanngo ipen mwoallo. Inla koapwungla nehn pwungamwa, japahldo wia oamw meiroanngo.

25 “Ma mine emen pirin wahlahng koawoa nehn mwoalen koapwung, pispis koajoanehdi nehn pwungamwa mwohn ah wahla koawoa ipen jounkoapwung kan, doar koawoa ken wijikla nehn kalpwuhj. 26 Ngoahi pwehng koawoa in mehlel, koawoa johkak pisla oaroh ngehd koawoa en dupukla pwaipwanid ohroj.”

Kamwahl

27 [o]“Kamwai ne rong padahk paso, ‘Joah kamwahl.’ 28 A apkas Ngoahi pwehng kamwai emen ma kapang lihmen apel mwehukihda, ih ne kamwahl nehn mohngiongin. 29 [p]Ma pwoaroan mijoammwen loap moaun kioang koawoa nehn dihp, dipoaljang kerpwihla. Ma ekij in palwoaroamwen kerpwihekla mwehujang ma palwoaroamwen ohroj kerpwihekla nehn ehl. 30 [q]A ma poahmmwen loap kidal kahrehioang koawoa en wia dihp, poaloahjang kerpwihla. Mwehuwoang koawoa en luhjjang ekij in palwoaroamwen jang palwoaroamwen ohroj en kerpwihekla nehn ehl.”

Mweipijoang (in pwoapwoaud)

(Matthew 19:9; Mark 10:11,12; Luke 16:18)

31 [r]“Kamwai ne kidal da kojonneddo pwa, ‘Emen ma mweijang pahioahu en kioang ih kijilikoau in kamweid.’ 32 [s]A Ngoahi pwehng kamwai, ma woalmen mweijang pahioa, jang in kahrpoahioau likin kamwahl, ih ne kahrehioang liho nehn kamwahl ma ih pwuroahng pwoapwoaudla; a ma emen woal painkihda liho, ih ne mine nehn dipen kamwahl.”

Kahula

33 [t]“Kamwai ne rong da ma ne pweiekkoang mihn mehjjok. ‘Joah koauwehla oamw kahula, a kolkol oamw inoau oang Koaunno.’ 34 [u]A ngoahi pwehng kamwai, joah kahula nehn amwai kin wiahda inoau. Joah kahukihla nehnloannge pwa ioar mwoalen Koahs wa. 35 [v]Joah pel kahukihla ke jampah pwa ioar dohn ehn wa; ke Jerusalem pwa ioar kahnihmw in Nahmwarki Laplap. 36 Pel joah kahukihla moangoammwen, pwa koawoa johkak wiahng apas pisen moang en korohrohla ke soalla. 37 Amwai sikesik en kin mine in ‘Eh’ ke ‘Joah’; a ma daulihla a kin sapjang ipen me juweddo.”

Pwoaroan maj oau oang Pwoaroan maj oau

(Luke 6:29,30)

38 [w]“Kamwai ne pel rong pwa. ‘Pwoaroan maj oau dupukki pwoaroan maj oau, a ngihpas dupukki ngihpas.’ 39 A Ngoahi pwehng kamwai, kamwai en joah pallan armaj men. Ma emen pokihdi joapoamwen loap moaun, pel kioang ih oaloap. 40 A ma emen panglahng koawoa mwoal en koapwung en kihjang oamw jehsso, pel kioang ih oamw joakidden. 41 Ma emen ipong oang koawoa en alu ki mwail oau, a koawoa en pwili aluhkihla mwail riau. 42 Ma emen poaki koawoa mehkij koawoa mweidoahng, ma emen poaki koawoa mehkij pwa ih en kajpahlihdo mwuhr pel mweidoahng.”

Ipwilki Imwinsihsi

(Luke 6:27,28,32-36)

43 “Kamwai ne pel rong Ih ne pwa, ‘Ipwilki mihn ipoamw’ a lioassoang oamw imwinsihsi. 44 A Ngoahi pwehng kamwai: Ipwilki amwai imwinsihsi kan apel kapkapki irai ma kin koalkoa kamwai, 45 pwa kamwai en kak wia jerihn Jamamwaiho nehnloannge. Pwa Ih ma wiahng joauwo en dakda pohn me nauna apel pohn me mwehu, Ih kadardo wud pohn armaj pwung apel armaj japwung. 46 Ma kamwai ipwilki irai ma ipwilki kamwai, kijakij dahioau kamwai nen oaloa? Jounrik daksis kan joah kin pel wia doahroar? 47 Ma kamwai pel kajamwo rioamw kan oar doari, dahioau kamwai wia koalik jang epwi? Armaj rosros kan joah kin pel wia doahroar? 48 [x]Kamwai en unjek doahroar Jamamwaiho nehnloannge ma unjek.”

<- Matthew 4 Matthew 6 ->