Link to home pageLanguagesLink to all Bible versions on this site
8
Lihpwi Ma kin Pwilpwili Jesus
1 Mwerin anjoau oau Jesus allaluhjili nehn kahnihmw apel nehn koujapw kan, kapkapahrakki Rongmwehu in Wein Koahs. Irai eijek roahmenno pwilpwilihjili Ih, 2 [a]apel lihpwi ma Ih kemwehuwihla jang ahr johmwehuwok apel ngen jaus kan: ma ioar Mary mihn Magdala ma Ih kaujjang ngen jaus ijimen ipoa; 3 Joanna, pahien Chuza, koaun in jounpei en Herod, Susanna, apel li ngoadoar pwi ma kin pwili appwapwali Jesus apel en Nah sohnpadahk kan arai dipwjoauwok.
Karajraj in Jounkamwoaroa
(Matthew 13:1-9; Mark 4:1-9)

4 Armaj kan pokpokondohr ipen Jesus jang nehn kahnihmw ohroj; apel nehn ahr lel pene ipoa, Ih pwehng irai karajraj oauwe:

5 “Armaj men mine ma inlahng kamwroa ah liporrohk. Doari, nehn ah kamwkamwroa ah liporrohk, epwi mwoardi oang nehn al in nehn mwoaswello, armaj kan siakpijoang, mahnsanngok sangdo kangjang. 6 Epwi mwoardi oang wija sakaikai, irai koapda apel mengla; pwa joh pil in kamwolouwi nehn pwirejjo. 7 Epwi liporrohk kipdi nehn pwungen suhkoa soaksoak. A suhkoa soaksoakkok koapda kajasihkeihla irai. 8 A epwi liporrohk mwoardi oang nehn pwirej mwehu, koapda mwehu ken uhwahda, apas kihda wa epwiki.”

Jesus kadoarihkihla karajraj pase, Ih pwa, “Armaj men ma mine sioa, en rong!”
Kahrpoan Karajraj kan
(Matthew 13:10-17; Mark 4:10-12)

9 A sohnpadahk kan kalelpoak ipoa, “Maing, ia woahwoahn karajraj pase?” 10 [b]Ih japoangla irai, “Kamwai oar doari mweimwei en dehdehkihla manman rir kan doahroar Wein Koahs; a iraihok likin kamwai joah; pwa irai pirin kidal jang in karajraj, pwa irai en kin widahli a pwen joah kapang, irai en rong, apwen joah woahwoahki.

Jesus Kawoahwoahda Karajraj in Jounkamwoaroa
(Matthew 13:18-23; Mark 4:13-20)

11 “Ioar woahwoahn karajraj pase: liporrohk woahwoahki mahjan in Koahs. 12 Liporro kan ma mwoardi pohn al kan woahwoahki irai kan ma kin rong a Jehsen kin indoa apel kihjang lallo nehn arai mohngiong pwa irai en joah pwojon apel mourkihla. 13 Liporro ma kin mwoardi oang nehn wija sakai woahwoahki irai kan ma kin rong oaloahda apel perenkihda. A ih johpwa kin lel nehn kapehdirai kan, pwa irai kin pwojon anjoau kij oar; apel nehn anjoau in jongjong irai kin pispis kip‑wehjang. 14 Liporrohk ma mwoardi oang nehn pwungen suhkoa soaksoakkok doahroar iraihok ma rong lallo, a pwunod in koapwoa kan apel peren in jampah oauwe kin jakahpajihla apel kin pinahla jang lallo nehn kapehdirai kan. 15 A liporro kan ma mwoardi oang nehn pwirej mwehu, woahwoahki irai kan ma kin rong, irai kasoangehdi oang nehn kapehdirai in peik apel mwakelkel in kanangmah oaroh kin uhwahda mwehu iparai.

Lahm Pehn Pahn
(Mark 4:21-25)

16 [c]“Joh armaj kin akanda lahm oau, kioang pehn pahn oau ke kioang pehn pehd. A ih kin kihdihoang nehn dohiahu pwa armaj kan en kak kapangki wija nehn ahr pirin dilda nehn umw.

17 [d]“Me joaloang ohroj uhdahn pirin janjalda, apel me oakkoak ohroj pirin diarekda apel kalohkjili.

18 [e]“Kamwai en kanaihoahng doahroar amwai kin rong, pwa armaj ma anki mehkij kakoalikihekin pirin aluhwoang, a emen ma johpwa anki mehkij, ih pirin luhj jang mehkijjo ma ih lemleme pwa ah.”

Inen Jesus apel Riah kan
(Matthew 12:46-50; Mark 3:31-35)

19 Inen Jesus‑o apel riahk indoa pwa irai en suhwoang, a irai joh kak sohla ipoa pwa jakahpaj in pokonno. 20 Armaj men pakair kioang Jesus pwa, “Inoammwo apel rioammwok minmine likinno pwa irai nimen suhwoang koawoa.”

21 A Jesus pwehnglahng ihr ohroj, “Ioar inoai apel rioai kan, ma kin rong mahjan in Koahs apel kin kapwaihahda.”

Jesus Kamolunihdi Melmel oau
(Matthew 8:23-27; Mark 4:35-41)

22 Oau rehn Jesus apel Nah sohnpadahkkok doaudahng pohn pohs pas, a Ih pwehng irai, “Kisai jeiwe dauluhllahng loappoauwo pillo.” Irai ken doauda apel kijoula. 23 Nehn irai kijkijoula nehn pillo Jesus moairla, a eng koalikla kamwoakidihda pillo, pohsso dirkihla pil, ekij oar ken mweidi. 24 Sohnpadahkkok ken pokon pene ipen Jesus pwa irai en kapwohrihda Ih, irai pwa, “Maing Jounpadahk, kisai enken mweidi!”

Jesus pwohrda lipwoarehda enngok apel nohk, doar nehn anjoauwohr enngok pispis oar uhdi, apel pillo molundi mehlel. 25 Ih pwehnglahng irai, “Ia amwai pwojon en?”
A irai ken pwuriamweikihla apel majpwehkda, pwahpene nehn pwungarai, “Inje woal mene? Ma pwen lallal oar eng apel no kan, peikkoang Ih!”
Jesus Kemwehuwihla Woal men ma Ngen Jaus pwi Dilingla Ih
(Matthew 8:28-34; Mark 5:1-20)

26 Jesus apel Nah sohnpadahkkok lella wein Gerasa loappo janjallahng Galilee. 27 Nehn en Jesus doaudi jang pohn pohsso woal men jang nehn kahnihmmwo suhwoang Ih, ma ne woaroaila en ngen jaus minehki ipoa. Anjoau roairoai ih kin kilkiljoaujili, joh kin mine nehn umw, a ih kin allaluhjili nehn pwungen joaujoau kan. 28 Nehn ah kapangda Jesus, ih rahula apel poardi mwohn Ih, ngil koalikla, pwahla, “Maing Jesus nihn Koahs Laplap! Dahkij Koawoa nimen wiahng ngoahi? Ngoahi poaki ipoamw, Koawoa en joah koalkoa ngoahi!” 29 Ih pwahla me pwa Jesus ne pwehng ngen jausso en diljang ipoa. Pehn dir ngen jausso kin dilingla ih, nehn armajjok kin piroahdi ehn apel poah kan, ih kin uhdahr mweidla joal kan ma piroahdi ih, ngen jausso kijoukihla ih nehn japwsoahn.

30 Jesus idoak ipoa, “Ia oadoammwen?”

Ih japoang, “Karej,” pwa ngen jaus dihrdir kin dilingla ih. 31 Ngen jaussok ken poakihda ipen Jesus en joah kajroahla irai oang nehn pwoar loal joh kapinno.

32 Pwihnin pij oau minmine wijahu, mwingmwingehjili in kilin dol. Ngen jaussok poakihda ipen Jesus en mweidoahng pwa irai en inla dilloang nehn pijjok, Ih ken mweidoahng. 33 Ngen jaussok ken diljang ipen woallo inla dilloang nehn pijjok. Nehn anjoauwohr pijjok kijoudihla duhla nehn pillo.

34 Nehn en sohn apwali pijjok arai kapangda dahkij wiawi, irai kaula kalohkihjili mwoakid oauwe ipen armaj kan nehn kahnihmmwo nehn jappwo. 35 Armajjok aluhla pwa irai en pein kadehde mehu. Nehn ahr lel ipen Jesus, irai kidalda pwa woallo ma ngen jaussok ne injang ipoa, ih ne onohn ipen ehn Jesus, a ih ne likkoauda, mwomwen armaj mwehumwehu men. Irai ken majpwehkda. 36 Iraihok ma kapang da ma wiawi, pwehng sohn kahnihmmwo doahroar en woallo ah ne mwehula. 37 Mihn Gerasa kan ohroj wiahkioar oau pwehng Jesus pwa en inlahjang iparai, pwa irai inenin majpwehkda koalik. Jesus doaudahng pohn pohs pas kijoujang iparai. 38 A woallo ma ngen jaussok injang ipoa, poaki ipen Jesus, “Koawoa en mweidoahng ngoahi en pwilihwe koawoa.”

Jesus johpwa mweidoahng. Ih pwehng, 39 “Pwurwe in umwoammwo kalohkihoang armaj kan manman ma Koahs ne wiahda ipoamw.”
Woallo pwurla kalohki wija ohroj nehn kahnihmmwo manman ma Jesus ne wiahng ih.
Nihn Jairus Jerpeinno apel Liho ma Pukkoang Ikin en Jesus Likkoauwo
(Matthew 9:18-26; Mark 5:21-43)

40 Nehn en Jesus japahldo jang loappoauwo pillo, armajjok kajamwo Ih, pwa irai ohroj pwen joujowi Ih. 41 A woal men adanki Jairus, koaun in jinakoke men. Ih leldo apel poardi oang in ehn Jesus, poaki Ih en inlahng in umwahu, 42 pwa nah jerpein iehroj men ma johnpar eijek riau nimenoar mehdi.

Nehn en Jesus allaluhla armaj kan jakahpajihla ih. 43 Lihmen pwili mine wijahu ma anki johmwehu in insa pwilpwil johnpar eijek riau; joh kak mwehula. Ih ne kejpwihkihla me ohroj ma ih anki oang in koadoahkpen ah johmwehuwo ipen jounwini kan. 44 Ih dildahng nehn pokonno likinjarkin Jesus pukkoangdi ikin Ah likkoauwo. Nehnnoar anjoauwo ah johmwehu in insa pwilpwillo uhdi. 45 Jesus idoak pwa, “Inje ma pukkoang Ngoahi?”
Irai ohroj japoangki pwa jaudi irai. Peter japoangla Jesus, “Maing, imdoahr en armaj kan pideki pene pel jakahpajihla koawoa?”

46 A Jesus japoang, “Mine armaj pukkoang Ngoahi pwa Ngoahi ne poahmda manman oau ne injang Ngoahi.” 47 Liho ne kidalda pwa ih ne diarekda, ih ken roarroarroar sohla ipen Jesus, rukdihoang ipen ehn Jesus. Ih pwehng Jesus mwohn armaj kan ohroj kahrpoan ah pukkoang Jesus apel doahroar ah mwehula nehnnoar anjoauwo ma ih pukkoang. 48 Jesus pwehnglahng, “Noai jerpein, oamw pwojon ne kasihkeida koawoa. Alwe nehn popohl.”

49 Nehn en Jesus pwahpwahpwa mehpwiai, jounpakair men ne leldohng ipen koaun in jinakokehu pakairkihoang, “Nihmw jerpeinno ne mehdi; koawoa en joah kadroapwoahki Jounpadahkken.”

50 A Jesus ne rongda pakairro, Ih pwehnglahng jemen jerpeinno, “Joah mijik, pwojonnoar, a ih pirin pwen mwehu.”

51 Nehn Ah leldohng in ummwo Ih joah mweidoahng emen en pwili dilda loaloa, likin Peter, James apel John, apel jemen jerpeinno apel inahu. 52 Armaj ohroj in ummwo joangjoangjoang apel injinjuwedki jerpeinno. Jesus pwehnglahng irai, “Kamwai joah joang, pwa jerpeinne johpwa mehdi, ih moair!”

53 Irai wia kauruhrki, pwa irai kidal pwa jerpeinno ne pwen mehdi. 54 Ih kadilihjang ihr ohroj nehn perehu, Ih pwoakda poahn jerpeinno ngil koalikda, pwa, “Jerpein, pwohrda!” 55 Nehnnoar anjoauwo mour pwur oang jerpeinno apel ih pispis oar uhda. Jesus pwehng irai en kamwingehla. 56 Jamahu apel inahu, ira inenin pwuriamweikihla mehlel. A Jesus pwehng ira en johpwa pwehng emen da ma ne wiawihlahu.

<- LUK 7LUK 9 ->