1 [a]Anjoau in Joarwihn Pilahwa Joah Doal Ihs, ma adanki Passover, ne koaroan. 2 A jamwrou laplappok apel jounpadahk in Kojonned o raprapahki da irai en kak kojukkihdi Jesus; pwa irai inenin mijik armaj kan.

3 Jehsen ken dilloang nehn Judas, ma adanki Iscariot, emen in irai eijek roahmenno. 4 Judas inlahng ipen jamwrou laplap apel koaun in Umw Joarwihok pwehng irai doahroar ah pirin panglahng Jesus irai. 5 Irai malaukihda apel pwungkihpene irai en dupukki ih mwani. 6 Judas pwungkihla apel sapda joujowi anjoau mwehu ma en kak panngoang Jesus irai nehn en armaj kan ahr pirin jehjoa.

7 Joarwihn Pilahwa Joah Doal Ihs ne leldo, anjoau ma jihpw pwulopwul oang kamdipw in Passover kin kojkojdi. 8 Jesus kadarla Peter apel John, pwehng ira, “Kamwa alwe koaunopda asai sehpil in Passover.”

9 A ira pwehng Ih, “Ia wija Koah mwehuki kama en koaunopda?”

10 A Ih japoang, “Kamwa kapang nehn amwa pirin dilda nehn kahnihmmwo, kamwa pirin suhwoang woal men ma wa poakis in pil oau. Kamwa kauj ih oaroh in dilda nehn umw oau. 11 Kamwa pwehng koaun in ummwo, ‘Jounpadahkko kadardo kama ipoamw, pwa: Ia pere ma Ngoah apel Noai sohnpadahk kan pirin kang kamdipw in Passover loaloa?’ 12 Ih pirin kajalehioang kamwa pere koalik oau puwoa ma ne koajoanjoandi, ioar wijahwa ma kamwa pirin koaunopda joang ohroj.”

13 Ira inla kapangda joang ohroj doahr en Jesus pwehng ira. Ira ken koaunopda kamdipw in Passover.

14 Nehn anjoauwo ne lel, Jesus apel Nah wahnpoaroannok mwindihoang nehn dohiarai in sehpillo. 15 Ih pwehng irai, “Ngoah ngoangkihla mehlel pwili kamwai wia kamdipw in Passover oauwe mwohn Oai pirin loklok! 16 Kamwai en kidal pwa Ngoah ne johla pirin pwuroahng pwili kang Passover oauwe oaroh janjalda woahwoa in unjek nehn Wein Koahs.”

17 Jesus pwoakda mwoak oau, kapingkalahngan oang Koahs, pwa, “Kamwai oaloa mwoak oauwe kamwai ohroj nim. 18 Kamwai en kidal pwa Ngoah ne johla pirin pwuroahng nim wain oauwe jang me inla oaroh lel anjoauwo ma Wein Koahs pirin lel.”

19 Ih pel pwoakda pilahwahu, kapingkalahngan oang Koahs, Ih sipwangdi kioang irai, pwa, “Ioar palwoaroaioahwa me ma liklikkoang kamwai. Wia me oang mihn kasmanda Ngoahi.” 20 [b]Pel doahroar, mwerin mwinge Ih kioang irai mwoak oau, pwa, “Mwoak oauwe ioar en Koahs Inoau Kapw ma wiawihkihda insahihoa ma ne widekla ki kamwai.

21 [c]“A, kapang! Ih ma pirin pangla Ngoahi pwili mine in sehpil oauwe. 22 Nihn-Armaj pirin mehdi doahroar en Koahs ne koajoanehdi; ia woahr nen naunahng armajjo ma pirin pangla Ih!”

23 Irai sapda peidek pene nehn pwungarai, inje in irai ma pirin kak wia joang oauwe.

31 Jesus pwa, “Simon, Simon! Kapang pwa Jehsen ne oaloa mweimwei pwa en jong kamwai ohroj doahroar jounmwoaswel men ah kin pohkjang kilin wehn wihd. 32 A Ngoah kapkapki koah, Simon, pwa oamw pwojon en joah ohla. Apel nehn oamw pirin japahldo Ipoai, koah pirin kasihkeida pwojon in rioamw kan.”

33 Peter japoang, “Maing oai Koaun, ngoah ne onopda en pwilihla koah nehn kalpwuhj apel pwili koah mehdi.”

34 A Jesus japoang, “Peter, koah en kidal pwa rehn oauwe, mwohn joang jummwa koah pirin kahmahmkihla Ngoahi pehn jiluh pwa koah kidal Ngoahi.”

39 Jesus injang nehn kahnihmmwo, inlahng in Dolin Olip, doahroar ma Ih kin kalap wia; Nah sohnpadahkkok pel pwilihla. 40 Anjoauwo Ih lel wijahu, Ih pwehng irai, “Kapkap pwa kamwai en joah lel nehn jongjong.”

41 Ih ken sohrohrla jang irai, dohinoar armaj kin kasoahla sakai oau; Ih ken poadpwomwla kapkap, 42 Ih pwa, “Joamoai, ma koah mwehuki, a Koah kihwe jang Ngoahi dal en loklok oauwe. A joah, jaudi injenoai, pwa kupwuroamwen ioar en pwoaida.” 43 Sohnloang men jang nehnloannge pwokdohng Ih, kasihkeida Ih. 44 Nehn Ah ne inenin pwunod koalikda, Ih kasihkeila Ah kapkap; pwudohn Ih koardihoang pohn pwirej doahroar insa.[k]

45 Ih uhda jang Ah kapkap japahllahng ipen Nah sohnpadahkkok kapang irai pwen moair pwa johla engirai ki arai injinjuwed. 46 Ih pwehng irai, “Da kamwai moahmoahmoairki? Kamwai pwohrda kapkap pwa kamwai en joah lelloang nehn jongjong.”

47 Nehn anjoauwo ma Ih pe lallal, pokon oau leldo wijahu; Judas, emen ma sohnpadahk eijek roahmenno, ma uk irai. Ih sohlahng oar ipen Jesus kiski Ih. 48 A Jesus pwa, “Judas, kis oau ma koah pangkihla Nihn-Armaj?”

49 Nehn en sohnpadahkkok ma pwili Jesus kapangda dahkij ma pirin wiawi, irai pwehnglahng Jesus, “Maing amai Koaun, kamai en doadoahkki nihmai kodlaij kai?” 50 Emen irai ken poaloa nihn Jamwrou Laplap nah lidu men, poaloahjang sioa loap moaun.

51 Jesus pwa, “Ne isar, doari!” Ih ken pukkoang oar sien woallo ken mohdi.

52 Jesus pwehnglahng jamwrou laplappok apel koaun in Umw Joarwiho apel jounkaweid kan ma pwili indoahng oaloa Ih, “Kamwai indoa wa kodlaij apel mihn pok, doahroar ma Ngoah pwen lollap men? 53 [l]Ngoah kin minminehr ipamwai rehn ohroj nehn Umw Joarwiho, a kamwai johpwa jong in koldi Ngoahi. A apkas ioar amwai anjoau, apel anjoauwa ma in manman in rosros pirin koaunda.”

54 Irai joalihdi Jesus uklahng in umwen Jamwrou Laplappo; a Peter pwilpwilihla irai a ekij dohjang irai. 55 Nehn pwungen kello, oai kij jaunekda. Peter pwili mwindi ipen ihrrok ma mwindi pidekihpene oaiho. 56 Jerpein emen liduhwok kapangda ih pwili mwindi ipen oaiho, ih kakilihdi, ih pwa, “Woal mene pel pwili Jesus.”

57 Peter kahmahmki, pwehnglahng, “Li, ngoah pwanah jehjoa ih!”

58 Mwerin anjoau kij, woal men kapangda Peter, ih pel pwehnglahng, “Koah pel emen irai!”

63 Armajjok ma jiljiloa Jesus kapiski apel poki Ih. 64 Irai kin poaroahla mijoa apel idoak, “Inje ma poki koah? Kajawihda!” 65 Irai kin pwehng Ih joang nauna dir.

66 Nehn ah rehnpijoang, koaun in mihn Jew-ok, jamwrou laplappok, apel jounpadahk in Kojonneddok pokonpene, a Jesus ukkukdohng mwohn Sohn Mwoalen Koapwunngo. 67 Irai idoak Ipoa, “Pwehng kamai, Koah ioar Messiah?”[m]