1 Mwerin mehpwiai, Jesus jeijeiloakjili nehn Galilee; Ih johpwa mwehuki jeiloak nehn Judea, pwa koaun in mihn Jew‑ok ma mine wijahu irai kin nimen kojukdi ih. 2 [a]Doari, joarwi laplap oau in mihn Jew‑ok, ma adanki Joarwihn Umpwal, ne koaroando. 3 Riahkan ken pwehng Ih, “Alwehjang me, inla Judea, pwa nihmw sohnpadahk kan en kapang doadoahk kan ma Koawoa kin wihwia. 4 Pwa joh emen kin oakihla dahkij Ih kin wihwia, ma Ih anahne indand. Doari, pwa oamw wihwia mehpwiai, mweidoahng jampah pwon en kidal da koawoa wihwia!” 5 Pwa pel riah kan johpwa kamehlele Jesus.

6 Jesus pwehng irai, “Uhdahn oai anjoauwa pe kahjikkoar lel. Oang kamwai pwen anjoau ohroj. 7 Jampah johkak lioassoang kamwai, a ih kin lioassoang Ngoahi, pwa Oai kin pwehpwehpwehng ih pwa ah wihwia kan nauna. 8 Kamwai indahla pwili joarwiho, pwa Ngoahi jehpirin indahla pwili joarwi oauwe, pwa oai anjoau kahjikkoar leldo.” 9 Ih ken pwehng irai mehpwiai, doari Ih ken minminehr nehn Galilee.

10 Mwerin riahkan irai ne indahlahng joarwiho, Jesus pel indahla. Ih joah indahla in janjal, a Ih indahla in rir. 11 Koaun in mihn Jew‑ok raprapahki Jesus nehn joarwiho. Irai idoak, “Ia Ih?” 12 Armajjok ngudngudngudki nehn pokonno mwomwen ih. Epwi armaj kin pwa, “Woal mwehu men Ih.” A epwi kin pwa, “Joah! Ih kin kapweipwei armaj.” 13 A joh min siksikoa in janjal mwomwen Jesus, pwa arai mijik koaun in mihn Jew‑ok.

14 Nehn Ah lel nehn lopkoan wihk in joarwiho, ioar anjoauwa ma Jesus indahlahng in Umw Joarwiho ken sapda padahk. 15 Koaun in mihn Jew‑ok inenin pwuriamweikihla ken pwa, “Ia mwomwen Woal mene Ah inenin kidal mehkan nehn Ah johkin pwili sukuhl?”

16 Jesus ken japoang irai, “Jaudi pein oai padahk ma Ngoahi kin kihda, a en Ih ma kadardo Ngoahi. 17 Ma emen ma anahne kapwaihahda kupwuren Koahs, ioar ih ma pirin woahwoahki mwomwen Oai padahk kan, ma jang ipen Koahs ke jang pein Oai manman. 18 Armaj men ma siksikoa doahroar pein ih kin jongjongjong in oaloa ah wahu. A ma emen ma anahne kalingihla Inje ma kadardo Ih, ioar Ih ma mehlel apel joh likamw kij mine ipoa. 19 Jaudi Moses ma kioang kamwai Kojonneddo? A joh emen nehn pwungamwaikan ma kin kapwaihahda Kojonneddo. Amwda kamwai ke enngengdehnki en kojukdi Ngoahi?”

20 Sohn pokonno japoang Ih, “Ngen jaus mine Ipoamw! Inje ma enngengdehnki en kojukdi Koawoa?”

21 Jesus japoang, “Doadoahk manman oauwoar ma Ngoahi wiahda, a kamwai ohroj pwuriamweikihla. 22 [b]Pwa Moses ah koajoanehdihoang kamwai en jorkomjaijihla nihmwai jermwein kan — a jaudi jang Moses, a jamamwai koalikkok ma sapkihda siahk oauwe — kamwai pel kin jorkomjaijihla emen jermwein rehnin Sabbath. 23 [c]Doari, ma jermwein emen jorkomjaijla nehn rehnin Sabbath, pwa Kojonned in Moses en joah ohla; a da kahrehda kamwai lioassoangki ngoahi pwa Oai kemwehuwihla woallo nehn rehnin Sabbath? 24 Joah kajawi wihwiahn armaj, a en kajawihki uhdahn me mehlello.”

25 Epwi armaj in Jerusalem pwa, “Jaudi ioar Woal mene ma irai laplappok raprapahki pwa irai en kojukdi? 26 A kapang! Ih kin padpadahk in janjal, joh pwa emen ma pwa mehkij pwa en pallan! Imdoahr, koaun kan joah ne pwen kidal pwa ioar Ih Messiah wa? 27 Imdoahr en kak wiawi? Nehn anjoauwo ma Messiah pirin indoa, joh emen pirin dehdehki ia wija ma Ih indoahjang. A kisai ohroj kidal ia wija ma Woal mene indoahjang.”

28 Doari, nehn en Jesus Ah padpadahk nehn Umw Joarwiho, Ih ken ngil koalikda, pwa, “Kamwai uhdahn kidal Ngoahi, apel kidal ia wija ma Ngoahi injang? Ngoahi joah indoahki pein Oai manman. A Ih ma kadardo Ngoahi, ioar Ih ma mehlel. Kamwai jehjoa Ih. 29 Ngoahi kidal, pwa Ngoahi indoahjang ipoa, apel Ih ma kadardo Ngoahi.”

30 Irai jong en koldi Ih, a joh emen pukkoangdi Ih, pwa Ah anjoau kahjikkoar leldo. 31 A irai dir nehn pwungen pokonno ma pwojonla, apel pwa, “Imdoahr, in anjoauwo ma Messiah‑o indoa, Ih pirin wiahda kilel manman dirjang en woal mene ne wiahda?”

32 Doari, Pharisee‑ok rongda doahroar joang pwiai ma pokonno ngudngudngudki, irai apel jamwrou laplappok ken kadarla sohnjilajil pwi pwa irai en joalihdi Jesus. 33 Jesus pwa, “Ngoahi pirin mine ipamwai ekij woaroai; doari, mwuhr, Ngoahi pirin pwurlahng ipen Ih ma kadardo Ngoahi. 34 Kamwai pirin rapahki Ngoahi, a kamwai nen johpwa kapangda ngoahi; pwa wijahu ma Ngoahi pirin mine, kamwai johkak inla.”

35 Koaun in mihn Jew‑ok ken pwahpene nehn pwungarai, “Ia wija ma Ih pirin inla, ma kisai johkak kapangda? Ih pirin inlahng nehn kahnihmw in mihn Greece kan, wijahu ma mihn Jew kan koaukoaujoan, apel padahk oang mihn Greece kan? 36 Ih pwa, ‘Kamwai pirin rapahki Ngoahi, a kamwai nen johpwa kapangda Ngoahi’; apel, ‘Kamwai joh kak inlahng wijahu ma Ngoahi pirin mine.’ Ia woahwoahn me?”

37 [d]Nehn rehnno ma joarwiho pirin doarihla ioar rehnwa keiou kajampwal, Jesus uhda pwahla in ngil koalik, “Emen ma ne maroauda en indoa ipoai ih nimpil. 38 [e]Ioar doahr Puk Joarwi pwa, emen ma pwojon Ngoahi, pilin mour nen koardahjang nehn ih.” 39 Jesus sikoa me doahr Ngenno, pwa ma iraihok ma kamehlelehla Ih pirin anki mwuhr. Pwa anjoauwo Ngenno kahjik indoa, pwa Jesus kahjikkoar lingla. 40 Epwi armaj nehn pokonno ma rongda Jesus pwa me Ihr pwahla, “Woal mene ioar uhdahn Joukohp wa!”

41 Epwi pel pwa, “Ih ioar Messiah!”

A pel epwi idoak, “Imdoahr Messiah‑o en kak indoahjang Galilee? 42 [f]Pwa puk Joarwi pwa Messiah‑o pirin injang kadaudokin Nahmwarki David, apel Ih pirin noaisikdi nehn Bethlehem, nehn kahnihmmwo ma David kin koaujoan.” 43 Pokonno ken liaksohrohr nehn pwungarai ki Jesus. 44 A epwi nimen jipoardi Ih, a joh emen pukkoang Ih.

45 Doari, sohnjilajillok pwurlahng ipen jamwrou laplappok apel Pharisee‑ok. Irai idoak iparai, “Amwda kamwai ke joah wahdo Ih?”

46 Sohnjilajillok japoang, “Joh emen ma kin padahk doahroar Woallo!”

47 Pharisee‑ok ken idoak iparai, “Imdoahr, Woallo pel kapweipweidi kamwai? 48 Kamwai kidal ma mine emen jang nehn pwungen min laplap kan ke Pharisee kan ma pwojonla Ih? 49 Pokon oauwe joah woahwoahki Kojonnedin Moses, ioar kahrehda irai riahkila!”

50 [g]Nicodemus, emen Pharisee‑ok, ma inlahng ipen Jesus anjoaukij mwohn me, ih ken pwehng irai, 51 “Oang asai Kojonneddo, kisai johkak kadeik armaj men mwohn asai kahjikkoar rongda apel kapangda dahkij ih wiahda.”

52 Irai japoang, “Imdoahr, koawoa pel emen mihn Galilee? Sukuhlki Puk Joarwi, koawoa nen kidalda johpwa joukohp men indoahjang Galilee.” 53 [Armaj ohroj ken inla in umwaraihok.]

<- John 6John 8 ->