1 Nehn Jesus Ah pwahla mehpwiai, Ih ken jipwoaldahlahng nehnloannge, pwa, “Joamoai, Oai anjoau ne lel. Kalingihla Nihmw mene, pwa Nihmw mene en pel kalingihla Koawoa. 2 Pwa Koawoa kioang Nihmw mene manman in koaun armaj ohroj, pwa en kak kioang mour joahsuk irai ohroj ma Koawoa kioang Ngoahi. 3 A mour joahsuk woahwoahki en kidalla Koawoa, pwa Koawoahr Koahs mehlelwa, apel kidalla Jesus Christ ma Koawoa ne kadardo. 4 Ngoahi ne kajalehda Oamw ling nehn jampah; apel Ngoahi ne kadoarihla doadoahk kan ma Koawoa ne kioang Ngoahi en wia. 5 Maing Joamoai! Kalingihda Ngoahi mwohn Mijoammwen anjoau oauwe, kalingihkihda Ngoahi linngohr ma Ngoahi ne anki nehn Oai minmine Ipoamw mwohn jampah oauwe ah kahjikkoar wiawihda.

6 “Ngoahi ne kajalehda Koawoa ipen armajjok ma Koawoa kioang Ngoahi nehn jampah. Irai nihmw, a Koawoa kioang Ngoahi irai, irai ne kapwaihahda Oamw lal. 7 A apkas irai ne kidal pwa mehkan ohroj ma Koawoa ne kihdoahng Ngoahi pel indoahjang ipoamw. 8 Pwa Ngoahi ne kioang irai padahk kan ma Koawoa kioang Ngoahi, a irai ne oaloahda. Irai ne kidal pwa ioar me mehlelwa: ma Ngoahi indoa jang ipoamw, a irai kamehlele pwa Koawoa ma kadardo Ngoahi.

9 “Ngoahi kin kapkapki irai. Ngoahi joah kapkapki jampah, a irai kan ma Koawoa kioang Ngoahi, pwa irai ioar nihmw. 10 Meohroj ma Oai ioar Oamw; a meohroj ma Oamw ioar Oai; a Oai ling janjalda nehn irai. 11 Apkas Ngoahi pirin allaluhwoang Ipoamw. Ngoahi johla pirin minmine jampah; a irai pirin minminehr nehn jampah. Maing Joamoai ma Joarwi! Nekidki irai oadoammwen ma manman, addo ma Koawoa ne kihdoahng Ngoahi, pwa irai en wiahla oau doahroar asa kin wia oau. 12 [a]Nehn Oai minmine iparai, Ngoahi ne jiloahkihdi irai oadoammwen ma manman, addo ma Koawoa kihdoahng Ngoahi. Ngoahi ne apwali irai, a joh emen nehn pwungarai ma kak joaloangla; ioarroar ih ma ne kileldi en joaloangla, pwa lal in Puk Joarwi en pwoaida. 13 A apkas Ngoahi pirin allaluhwoang Ipoamw, a Ngoahi ne pwahla mehpwiai nehn jampah, pwa irai en kak anki Oai peren nehn mohngiongirai kan, in unjek mehlel. 14 Ngoahi ne kioang irai Oamw lal, a jampah ne lioassoangkihda irai pwa irai jaudi kijehn jampah, doahroar Ngoahi ma jaudi kijehn jampah. 15 Ngoahi joah poaki Ipoamw pwa Koawoa en kihjang irai nehn jampah, a pwa Koawoa en poaroahjang irai me Naunahu. 16 Doahroar Ngoahi ma jaudi kijehn jampah, pel ioar doahroar irai jaudi kijehn jampah. 17 Kajarwihkihla irai me mehlello; Oamw lal ioar ma mehlel. 18 Ngoahi ne kadarla irai nehn jampah, doahroar Oamw kadardo Ngoahi nehn jampah. 19 A ki irai, Ngoahi kajarwihkihoang Koawoa pein Ngoahi, pwa irai en pel kajarwihoang Koawoa.

20 “Ngoahi joah kapkapki irai kalahpwuk, pwa pel irai kan ma pirin pwojon Ngoahi ki arai padahk. 21 Ngoahi kapkap pwa irai ohroj en wiahla oau. Maing Joamoai! Irai en wiahla oau Ipasa, doahroar Oamw mine Ipoai, a Ngoahi Ipoamw. Irai en wiahla oau, pwa jampah en kamehlele pwa Koawoa ma kadardo Ngoahi. 22 Ngoahi ne kioang irai linngohr ma Koawoa ne kihdoahng Ngoahi, pwa irai en wiahla oau, doahroar Asa wia oau: 23 Ngoahi iparai a Koawoa Ipoai, pwa irai en uhdahn wiahla oau, pwa jampah oauwe en kidal pwa Koawoa ma kadardo Ngoahi, a Koawoa ipwilki irai doahroar Oamw ipwilki Ngoahi.

24 “Maing Joamoai! Koawoa ne kihdoahng Ngoahi irai, a Ngoahi anahne irai en pwili Ngoahi mine wijahu ma Ngoahi pirin mine, pwa irai en kak kapang Oai ling, linngo ma Koawoa ne kihdoahng Ngoahi ki Oamw ipwilki Ngoahi mwohn jampah oauwe ah kahjikkoar wiawihda. 25 Joamoai, Koawoa ma Pwung! Jampah oauwe jehjoa Koawoa, a Ngoahi ma kidal Koawoa, a irai pwiai ne kidal pwa Koawoa ma kadardo Ngoahi. 26 Ngoahi ma kahrehioang irai en kidalla Koawoa, a Ngoahi pel pirin doaudoaulahr pwa limpoakko ma Koawoa ne wiahng Ngoahi en pel mine iparai, a Ngoahi en pel kak mine iparai.”

<- John 16John 18 ->