1 “Ngoah padahkihoang kamwai mehpwiai pwa kamwai en joah kerpwihla amwai pwojon. 2 Irai pirin kainoapwihjang kamwai nehn arai jinakoke kan. A anjoau allaluhdo, ma emen ma pirin kojuk kamwai pirin lemlemehioang pwa ih kin papah Koahs. 3 Armaj pirin wiahng kamwai mehpwiai pwa irai jehjoa Jahmmo ke Ngoahi. 4 A Ngoah ne pwehng kamwai mehpwiai pwa nehn anjoauwo pirin leldo ma irai en wia mehpwiai, kamwai nen lemehda Oai sikesik pwiai.”
12 “Pel mine joang dir ma Ngoah nimen pwehng kamwai, a apkas ne inenin apwal oang kamwai en oaloahda. 13 A nehn Ngenin Mehlello ah pirin indoa, Ih pirin kajalehda mehlel in Koahs, Ih pirin kahlwahng kamwai oang nehn mehlel ohroj. Ih jehpirin padahk ki jang in pein Ah manman, a Ih pirin padahkihoang kamwai da ma Ih kin rongda, apel padahk ki doahroar mehkan ma pirin indoa. 14 Ih pirin kalingihla Ngoahi, pwa Ih pirin padahkihoang kamwai dahkij ma Ih rongjang Ngoahi. 15 Meohroj ma Joamoaiho anki, ioar Oai; kahrehda Ngoah pwehng kamwai pwa Ngenno pirin oaloa dahkij Ngoah kioang Ih, a Ih padahkihoang kamwai.”
17 Epwi Nah sohnpadahkkok idoak pene nehn pwungarai, “Ia woahwoahn me, ma Ih pwehngkihoang kisai, ‘Mwerin anjoau kij kamwai johla pirin kapang Ngoahi; apel mwerin anjoau kij kamwai pirin pwuroahng kapang Ngoahi?’ A Ih pel pwa, ‘Ngoah allaluhlahng ipen Joamoaiho.’ 18 Ia woahwoahn lal oauwe, ‘Mwerin anjoau kij?’ Kisai johpwa woahwoahki dahkij Ih siksikoa!”
19 Jesus kidal pwa irai nimen kalelpoak Ipoa, Ih pwehnglahng irai, “Ngoah pwa, ‘Mwerin anjoau kij kamwai johla pirin kapang Ngoahi, apel mwerin anjoau kij kamwai pirin pwuroahng kapang Ngoahi.’ Ioar mehwa kamwai iddidoak nehn pwungamwaikan? 20 Ngoah pwehng kamwai in mehlel: kamwai pirin joang apel injinjuwed, a jampah oauwe pirin peren. Kamwai pirin injinjuwed, a amwai injinjuwed pirin wikkoang in peren. 21 Nehn en li men ah pirin koaroannoang en noaisik, ih pirin injinjuwed, pwa ah anjoau in moadoak ne lel. A in anjoau ma jeriho noaisikdi, ih pirin moalkoahla ah moadoak; ih pirin perenda, pwa jeri men ne noaisikdi nehn jampah. 22 Ioar pel doahroar kamwai, anjoau oauwe kamwai injinjuwed, a Ngoah pirin pwuroahng suhwoang kamwai, a mohngiongimwai kan pirin dirkihla peren, joangoan peren ma joh emen kak kihjang kamwai.
23 “Nehn rehnno pirin leldo, kamwai jehpirin poaki Ipoai mehkij. Ngoah pwehng kamwai in mehlel: Jahmmo pirin kioang kamwai meohroj ma kamwai pirin poaki Ipoa in Oadoaihoa. 24 Leldo anjoau oauwe kamwai kahjikkoar poaki mehkij in Oadoaihoa. Poaki a kamwai pirin oaloa, pwa amwai peren en unjekla.”
29 Doari, Nah sohnpadahkkok ken pwehng Ih, “Maing, apkas Koah sikesik janjal, a johla doadoahkki karajraj. 30 Apkas kamai kidal pwa Koah kidal joang ohroj, a Koah johpwa anahne emen en kalelpoak mehkij Ipoamw. Me kahrehioang kamai en kamehlele pwa Koah indoa jang ipen Koahs.”
31 Jesus japoang irai, “Apkas kamwai ne kamehlele? 32 Anjoauwo pirin indoa, a ne leldo, ma kamwai ohroj pirin mwoarpijoang, emenemen inlahng nehn pein ah wija; Ngoah pirin kalahpwukla. A Ngoah johpwa pirin kalahpwukla, pwa Joamoaiho kin pwilpwili Ngoahi. 33 Ngoah ne padahkihoang kamwai mehpwiai pwa kamwai en anki popohl ki Ngoahi. Jampah pirin koalkoa kamwai, a kamwai en sihkei, pwa Ngoah ne kalwehdi jampah!”
<- John 15John 17 ->