John 12

Soal oau nehn Bethany

(Matthew 26:6-13; Mark 14:3-9)

1 Rehn wonou mwohn Joarwihn Passover, Jesus inlahng Bethany, wijahu ma Lazarus kin koaukoaujoan, woallo ma Jesus kamourihda jang mehdi. 2 Irai ken koaunopda mwingehn joausik wijahu. Martha pwili jeuweje nehkpijoang mwingehu, Lazarus ioar ih emen ma pwili Jesus mwindihoang in sehpillo. 3 [a]Mary ken wahdo le oau ma inenin koalik dupkoa ma wiawihkihda suhkoahu ma adanki nard, a salipki ehn Jesus, pel limwihki pisen moangehu. Karahdin in lehu ken pisoahla nehn ummwo pwon. 4 Emen Nah sohnpadahkkok, Judas Iscariot — ih ma pirin pangla Jesus — pwa, 5 “Dahkij kahrehda lehioauwe joah noasla in mwani silper[b] 300 (jilipwiki), pwa mwanihe en inlahng armaj joamwoahmwoa kan?” 6 Ih pwa me, jaudi jang in ah kin injinohki armaj joamwoahmwoa kan, a pwen jounpirap men ih. Ih ma kin wahwahwa nihrai pehkin mwaniho a kin kihkihjang mwani loaloa.

7 Jesus pwa, “Kamwai joah kadroapwki lihe! Kamwai mweidoahng en nekidla dahkij ih ankiho oang in rehnno ma Ngoahi pirin joajjoardi. 8 [c]Armaj joamwoahmwoa kan pirin minminehr ipamwai anjoau ohroj, a Ngoahi jehpirin mine ipamwai anjoau ohroj.”

Pwihnno ma Pallan Lazarus

9 Nehn pokon koalik in mihn Jew oau irai rongda pwa Jesus minmine Bethany, irai ken inla, jaudi pwa irai nimen kapanngoar Jesus, apel Lazarus ma Jesus ne kamourihda jang mehdi. 10 Jamwrou laplappok ken wia lamlamki doahroar mwomwen irai pirin pel kojukdi Lazarus, 11 pwa ih ma kahrehda mihn Jew dihrdir irai kerpwihla irai a pwojonla Jesus.

Dilda Jerusalem ki Rojon in Kalwehdi

(Matthew 21:1-11; Mark 11:1-11; Luke 19:28-40)

12 Rehnno mwerin, pokon koalikko, ma indoahng pwili Joarwihn Passover, rongda pwa Jesus allalu indoahng Jerusalem. 13 [d]Irai ken oaloa soahn suhkoa palm a inlahng pwa irai en suhwoang, irai ken rahrahuki, “Kapnga Koahs![e] Koahs en kapaiahda Ih ma indoa in oadoan Koaunno! Koahs en kapaiahda Nahmwarkihn Israel!”

14 Jesus kapangda ejel pwulopwul men Ih ken doaudahng puwoa, doahroar ma insingdi nehn Puk Joarwi:

15 [f]“Kahnihmw Zion, koawoa joah mijik!

Me oamw Nahmwarki allalu indoa ipoamw,

Ih mine pohn ejel pwulopwul men.”

16 Nah sohnpadahkkok joah woahwoahki me in anjoauwo. A in anjoauwo ma Jesus iejda apel poukdahla, irai ken lemehda da Puk Joarwi pwahki Ih, a irai pel wiahng Ih mehpwiai.

17 Armajjok ma pwili Jesus nehn Ah pangin Lazarus jang nehn joaujoauwo, kamourihda jang mehdi, ken kalohkihjili da ma ne wiawi. 18 Ioar kahrpoan en pokonno irai inlahng suhwoang, pwa irai rongda pwa Ih wiahda manman oauwe. 19 Pharisee‑ok ken pwahpene nehn pwungarai, “Kamwai kapang! Kisai johpwa pwoaida! Pwa me sohn jampah ohroj ne pwilihla Ih!”

Epwi mihn Greece Rapahki Jesus

20 Doari, mihn Greece pwi ma mine nehn pwungen irai kan ma inlahng Jerusalem pwa irai en joarwi in kajarwiho. 21 Armaj pwiai ken inla ipen Philip (ih mihn Bethsaida nehn Galilee), pwehng ih, “Maing, kamai nimen suhwoang Jesus.”

22 Philip ken inla pwehng Andrew, a ara ken inla pakairkihoang Jesus. 23 Jesus japoang ira, “Anjoauwo ne leldo ma Nihn‑Armaj pirin lingla. 24 Ngoahi pwehng kamwai in mehlel: pwa liporro in wihd oau johkak dirla ma ih jehpirin kipdihoang nehn pwirej mehdi. Ma ih mehdi, ih pirin wiahda liporro dir. 25 [g]Ma emen kin ipwilki ah mour uhdahn pirin luhj jang; a ma emen kin mihndahkihla ah mour in jampahioauwe, ioar ih ma pirin anki mour joahsuk. 26 Ma emen ma nimen papah Ngoahi, ih uhdahn pirin pwilpwili Ngoahi, pwa wija ma Ngoahi pirin mine, ih pel pirin mine. A Joamoaiho pirin kawahuwihla emen ma kin papah Ngoahi.”

Jesus Sikoa doahroar Ah pirin Mehdi

27 “Anjoau oauwe ngenihoa injinjuwedla; a dahkij Ngoahi pirin pwa? ‘Joamoai, koawoa joah mweidoahng awa oauwe en indoahng ngoahi’? Joah, pwa ioar kahrpoan oai indoa, pwa Ngoahi en lelloang nehn awahn loklok oauwe. 28 Joamoai, kalingihla oadoammwen!”

Doari, ngil oau ken indihdo jang nehnloannge, ma pwa, “Ngoahi kalingihla oadoaioa, a Ngoahi pirin pwuroahng kalingihla.”

29 Pokonno ma mine wijahu rongda ngillo, irai ken pwa, “Ngilen jouruhr!”

Epwi pel pwa, “Sohnloang men ma lalloang Ih!”

30 Jesus pwehng irai, “Jaudi Ngoahi ma ngil oauwe indihdohki, a pwen kamwai. 31 Anjoau oauwe ioar ma jampah oauwe pirin kadeikda. Anjoau oauwe koaun in jampah oauwe pirin kerpwihekla. 32 Doari, nehn Oai pirin pwoakpwoakda jang pohn jampah, Ngoahi pirin kahlwahdohng Ngoahi armaj ohroj.” 33 (Ih ken pwahla mehpwiai pwa en kajalehda joangoan mehdiho ma Ih pirin mehkihdi.)

34 [h]Pokonno ken japoang, “A pukin Kojonneddo kin padahkihoang kamai pwa Messiah pirin mour allaluhla. Doari, imdoahr Oamw kak sikoa pwa Nihn‑Armaj uhdahn pirin pwoakpwoakda? Inje Nihn‑Armaj mene?”

35 Jesus japoang irai, “Marammo pirin minminehr nehn pwungamwaikan nehn anjoau kij. A doari, kamwai allaluhki marammo nehn ah mine ipamwai, pwa rosso nen koanoahdi kamwai. Pwa ma emen ma kin allalu nehn ros johkin kidal wijahu ih kin allaluhwoang. 36 Kamwai ken pwojon marammo nehn ah minmine ipamwai, pwa kamwai en kak wiahla armaj in marammo.”

Joah Pwojon in Mihn Jew‑ok

Mwerin Jesus Ah pwa mehpwiai, Ih inla kajoaloangehla pein Ih jang irai. 37 Mihndahr ma Ih ne wiahda kilel dir pwiai mwohn mijarai, a irai johpwa pwojonla. 38 [i]Pwa dahkij joukohp Isaiah pwa en pwoaida:

“Maing amai Koaun, inje ma ne kamehlele dahkij kisai ne kadehde?

Oang inje ma Koaunno ne kajalehioang Ah manman?”

39 Ioar kahrpoa oauwe ma irai johkak pwojon, pwa Isaiah pel pwahla,

40 [j]“Koahs ma karosihla mijarai,

Ih ma risingdi arai lamlam kan,

pwa pwoaroan mijarai kan en joah kapang,

arai lamlam en joah woahwoahki,

a irai jehpirin pwurdohng Ngoahi,

pwa Ngoahi en kemwehuwihla irai.

Ioar me ma Koahs ne pwahla.”

41 Isaiah ne pwahla mehpwiai pwa ah ne kapang en Jesus ling apel sikoa doahroar Ih.

42 Doari, dir jang nehn pwungen koaun in mihn Jew‑ok pwojonla Jesus, a pwen Pharisee‑ok ma kahrehda irai johkin sikoa in janjal, pwa irai en joah kajroahkjang nehn jinakoke kan. 43 Pwa irai kajampwalki oaloa kaping jang ipen armaj koalikjang oaloa kaping jang ipen Koahs.

Kadeik ki da Jesus pwa

44 Jesus ken ngil koalikda, pwahla, “Ma emen ma pwojon Ngoahi, jaudi Ngoahi kalahpwuk ma Ih pwojon, pwa Ih pel pwojon Ih ma kadardo Ngoahi. 45 Ma emen ma kapang Ngoahi, ih pel kapang Ih ma kadardo ngoahi. 46 Ngoahi ne indoahng jampah doahroar maram oau, pwa irai ohroj ma kin pwojon Ngoahi irai en joah minminehr nehn ros. 47 Ma emen ma pirin rong Oai padahk, a johkin kapwaihahda, Ngoahi jehpirin kadeik. Ngoahi ne indoa, jaudi pwa Ngoahi en kadeikda jampah, a Ngoahi en koamoaurla. 48 Ma emen ma joah oaloahda Ngoahi, apel joah peikkoang Oai padahk, mine emen ma pirin kadeik. Sikesik kan ma Ngoahi ne sikoahda, ioar ma pirin kadeikda irai in imwin rehnno! 49 Me ioar mehlel, pwa Ngoahi johkin kihda padahk jang pein Ngoahi; a Joamoaiho ma kadardo Ngoahi, pein Ih ma kin pwa dahkij Ngoahi pirin sikoa apel kadehdehda. 50 A Ngoahi kidal ma Ah lal pirin kahrehda mour joahsuk. Doari, da Ngoahi kin sikoahda, ioar da ma Joamoaiho pwehng Ngoahi pwa Ngoahi en sikoahda.”

<- John 11 John 13 ->