1 “Ngoah pwehng kamwai in mehlel: ma emen ma joah dilda nehn wanihmwin kelin jihpw, a doau oang nehn oau joangoan al sohrohr, ioar ih jounpirap men, apel mwoarjuwed men. 2 A ih ma kin dilda nehn wanihmmwo, ioar ih ma jilepen jihpw. 3 Jilepen wanihmmwo kin risingdahng jilepen jihppwo; nah jihpw kan kin rong ngiloa, nehn ah kin panginki irai oadoarai, a ih kin kahlwahla irai likin. 4 Nehn ah kadilihla irai, Ih kin wudla mwohn irai, apel jihpw kan kin kauj ih, pwa irai ahnla ngiloa. 5 Irai jehpirin kauj emen sohrohr; irai nen kau jang joangoan armaj meno, pwa irai jahn ngiloa.”

6 Jesus pwehng irai karajraj pase, a irai johpwa kidal ia woahwoahn.

7 Jesus pel pwuroahng pwehng irai, “Ngoah pwehng kamwai in mehlel: Ngoah ma wanihmwin kelin jihpw. 8 Irai ohroj ma ne indoa mwohioa, jounpirap apel mwoarjuwed pwi, a jihppwok joah rong irai. 9 Ngoah ma wanihmmwo. Ma emen dilda nehn wanihmw oauwe pirin mourla. Ih pirin dilda apel dilla, apel kapangda kanah mwinge. 10 Jounpirap kin indoa pwa en pirapoa, kojukdi, apel koauwehla. A Ngoahi indoa pwa irai en anki mour — mour unjek.

11 “Ngoah ma jilepen jihpw mwehu. Jilepen jihpw mwehu men mihndahkihla Ah mour ki Nah jihpw kan. 12 Sohndoadoahk men, ma jaudi jilepen jihpw, apel jaudi uhdahn nah jihpw kan, nehn ah kin kapangda wolf ah allaluhdo Ih kin kerpwihla irai ih kaula. Wolf kin koldi jihpw kan apel kaujpijoang irai. 13 Sohndoadoahk men kin kaula pwa ih doadoahkkoar pwa en oaloa dupkoa, a joh kin injinohki jihpw kan. 14 [a]Ngoah ma jilepen jihpw mwehuwa. Ngoah kidal Noai jihpw kan, irai pel kidal Ngoahi. 15 Doahroar Jahm ah kidal Ngoahi, apel Ngoah kidal Jahmmo. A Ngoah pirin mihndahkihla Oai mour pwa irai. 16 Pel mine epwi Noai jihpw ma joah mine nehn kel oauwe. Ngoah uhdahn pirin wahdo irai, apel irai pirin rong ngiloaihoa. Doari, irai pirin wiahla pwihnin jihpw oauwoar, apel jiloapoarai pirin emennoar.

17 “Joamoai kin ipwilki ngoahi, pwa Oai kin mihndahkihla Oai mour, pwa Ngoah en kak pwuroahng oaloa. 18 Joh emen pirin kihjang Oai mour, a pein Ngoah ma mihndahkihla. Mine Oai manman en mihndahkihla, apel pel mine Oai manman in pwuroahng oaloa. Ioar doahroar ma Joamoaiho inoaukihoang Ngoahi pwa Ngoah en wia.”

19 Doari, mihn Jew-ok pel pwuroahng liaksohrohr ki lal pwiai. 20 Armaj dir nehn pwungarai pwa, “Ngen jaus mine ipoa, apel pweipwei men Ih! Dahkij kahrehda kamwai rong Ih?”

21 A pel epwi pwa, “Armaj ma ngen jaus mine ipoa joh kak sikoa mehpwiai. Mindoahr ngen jaus ah kak kapoahdpijoang pwoaroan mijen armaj majkun men?”

22 Doari, anjoau in pokon in kajarawihn Umw Joarwiho[b] nehn Jerusalem nehn johnpwong in kopou. 23 Jesus allaluhjili nehn Umw Joarwiho nehn Palang in Solomon. 24 Mihn Jew-ok ken pidekihpene, idoakkoang Ih, “Ia woaroaihn amai pirin joujowihki koawoa? Ma ioar koawoa [c]Messiah, kadehdehng kamai in janjal!”

25 Jesus japoang, “Ngoah ne pwehng kamwai, a kamwai joah nimen kamehlele Ngoahi. Doadoahkkok ma Ngoah ne wiahda in manman in Joamoaiho, ioar ma ne kadehdehda. 26 A kamwai jehpirin kamehlele, pwa jaudi kijehn Noai jihpw kamwai. 27 Noai jihpw kan kin rong ngiloaihoa; a Ngoah kidal irai, a irai kin pwilpwili Ngoahi. 28 Ngoah kioang irai mour joahsuk, a irai jehpirin mehdi. Joh emen kak doapwoahjang irai Ipoai. 29 Da Joamoaiho kioang Ngoahi koalikjang mehkan ohroj. [d] A joh emen ma kak doapwoahjang nehn poahn Joamoaiho. 30 Joamoaiho apel Ngoahi emennoar.”

31 Mihn Jew-ok ken pwuroahng rik sakai pwa irai en kasoahki Ih. 32 Jesus pwehng irai, “Ngoah ne wiahda doadoahk mwehu dihrdir mwohn kamwai ma Jahmmo kioang Ngoahi pwa Ngoah en wia. A doari, doadoahk dahioau nehn pwungen doadoahk pwiai kamwai nimen kasoahki Ngoahi?”

33 [e]Mihn Jew-ok japoang, “Jaudi doadoahk mwehu ma kamai nimen kasoahkihdi Koawoa, a pwa Oamw kin lahlahwe Koahs! Pwa Koah, armaj men, Koah kin wiahki pwa Koah Koahs!”

34 [f]Jesus japoang, “Ne insingdi nehn amwai kojonneddo ma Koahs pwa, ‘Kamwai kohs pwi.’ 35 Doari, kisai kidal pwa dahkij Puk Joaroawi sikoa pwen mehlel anjoau ohroj; a Koahs panginki irai koahs pwi, irai armaj kan ma Ah mahjan ne aluhwoang. 36 A Ngoah, Jahm ne pilda kadardo nehn jampah. A doari, da kamwai kak sikoahki pwa Ngoah lahlahwe Koahs pwa Oai pwa Ngoah Nihn Koahs? 37 Ma Ngoah johkin kapwaihahda doadoahk kan en Joamoaiho, doari, kamwai ken joah kamehlele Ngoahi. 38 A ma Ngoah kin wiahda, mihnda ma kamwai johpwa kamehlele Ngoahi, a kamwai en kamehlele Oai doadoahk kan, pwa kamwai en kidalkihda apel woahwoahkihda pwa Jahm kin minmine nehn Ngoahi, apel Ngoahi kin minmine nehn Jahm.”

39 Irai pel pwuroahng rapahki pwa irai en jipoardi Ih, a Ih joaloang jang nehn pwungarai.

40 [g]Jesus japahlla oaloap Pillap Jordan wijahu ma John kin wia poapdaij mehjwa; Ih ken minmine wijahu. 41 Armaj dihrdir pokondohng ipoa. Irai ken pwa, “Joh manman John wiahda, a joang ohroj ma ih pwahki doahroar Woal mene inenin mehlel.” 42 Doari, armaj dir wijahu ken pwojonla Jesus.

<- John 9John 11 ->