1 A rehn jiluh mwerin en Festus ne leldo nehn jappwo, ih injang Caesarea indahlahng Jerusalem. 2 Wijahu jamwrou laplappok apel koaun in mihn Jew-ok kadipoa Paul. Irai poaki ipen Festus 3 en kapwaihahda injenarai pwa ih en kadardo Paul Jerusalem, pwa irai ne koaunopda pwihn oau en kojukdi nehn allo. 4 Festus japoang irai, “Paul joajjoal nehn kalpwuhj in Caesarea, a ngoah pirin pel pwurdahlahng wijahu anjoau koaroan. 5 Mweidoahng amwai koaun kan en pwilihda ngoahi inla Caesarea kadipoa Paul, ma ne mine mehkij ih wiahda japwung.”

6 Festus minminehki iparai rehn waluh ke eijek ih ken japahldihlahng Caesarea. Rehn wa mwerin ih mwindi nehn mwoalen koapwunngo ih pwa Paul en ukkukdo. 7 Anjoauwo ma Paul leldo, mihn Jew-ok ma indoahjang Jerusalem ken pidekihpene ih apel kadpoahki kadip soausoau pwi ma pein irai joh kak kadehdehda in mehlel. 8 A Paul pein doaroa pein ih, ih pwa, “Ngoah johpwa wia mehkij ma uhwoang Kojonned in mihn Jew kan ke Umwen Joarwiho ke Caesar in Rome.”

9 Festus mwehuki ih en admwehu ipen mihn Jew kan, ioar kahrehda ih idoak ipen Paul, “Koah pwungki koawoa en inla Jerusalem kadeik ipoai oang in iren kadip pwiai?”

10 Paul japoang, “Ngoah minmine mwohn mwoalen koapwung in Caesar, wija ma ngoah uhdahn en kadeik. Ngoah johpwa wia japwung oau oang mihn Jew kan doahroar oamw woahwoahki. 11 Ma ngoah koauwehla kojonned oau, ke wiahda mehkij ma pirin kahrehng ngoah en oaloa koaloklok in kojkojdi, ngoah johpwa poaki ngoahi en pisjang. A ma arai kadip kan ma arai kadpoahki ngoahi pwen likamw, a johpwa emen ma kak pangla ngoahi oang iparai. A ngoah poaki koapwung japahl ipen Caesar.”

12 Mwerin Festus wia lamlam oang nah jounkaweid kan, ih en japoang, “Koah poaki koapwung japahl ipen Caesar, apel koah pirin inla ipoa.”

13 Mwerin rehn pwi nahmwarki Agrippa apel Bernice indoahng Caesarea pwa ira en suhwoang apel kajamwo Festus. 14 Mwerin rehn pwi ira minminehki wijahu, Festus ken kawoahwoahng nahmwarkiho doahr iren kadippok ma uhwoang Paul. Ih pwa, “Mine woal men ma Felix joalihdi, kihdi me. 15 Nehn anjoauwo ma ngoah inlahng Jerusalem, jamwrou laplap in mihn Jew-ok, apel koaun in mihn Jew kan kadipoa apel poakpoaki ngoahi en kojukdi ih. 16 Ngoah pwehng irai pwa mihn Rome kan johkin oapwoahnki pangla armaj men ma dipkihda dihp oau mwohn ah kahjikkoar suhwoang irai kan ma kadipoa ih nehn wijahn koapwung, apel pirin anki anjoau in doaroa pein ih jang kadippok ma uhwoang ih. 17 Nehn anjoauwo ma irai ohroj ne indoa wijahi, ngoah johpwa kakosihla oai mwindi oang nehn mwoalen koapwunngo apel iloaklahng irai en ukdo Paul. 18 Irai kan ma kadipoa ih uhda, a irai johpwa kadpoahki joangoan dihp nauna oau ma ngoah lemehkihoang pwa irai pirin wia, 19 mehwahr irai wia, irai akmaikihoang doahr pein arai loapin joarwiho apel doahr woal men adanki Jesus ma ne mehdi, ma Paul kin pwa ih pwen mourroar. 20 Ngoah johkak koajoanehdi imdoahr oai pirin kak oaloa iroa dehde oau jang in iroa pwiai. Ngoah ken idoak ipen Paul, ma ih pirin pwungki en inla Jerusalem ih kadeiki kadip pwiai. 21 Paul poaki ih en pwen joajjoalloar, a ngoah en kadarlahng ih ipen Caesar, pwa Caesar en koajoanehdi ah iroahu. Doari, ngoah koajoanehdi pwa ih en joajjoalloar oaroh ngoah en kak kadarla ih ipen Caesar.”

22 Agrippa pwehng Festus, “Pein ngoahi nimen rong woal mene.”

Festus japoangki, “Koah pirin rong ih lakapw.”

23 A rehn wa mwerin, Agrippa apel Bernice indoa nehn ara kapwas inenin ling dilda nehn umwen koapwunngo, pwilihki koaun in jounpei laplappok apel koaun in kahnihmmwo, Festus ruwoj pwa Paul en ukkukdo. 24 Festus pwa, “Maing nahmwarki Agrippa apel ohroj ma pwili kamai mine wijahkije, kamwai kapang woal mene, ma mihn Jew kan ohroj ma mine me apel nehn Jerusalem kadipoa ipoai. Irai rahrahuki pwa ih en kojkojdi. 25 A ngoah johkak diarda mehkij ipoa ma ih en kojkojkihdi. A pwa jang in ah koapwung japahl ipen Caesar, doari ngoah koajoanehdi pwa ngoah pirin kadarla ih ipen Caesar. 26 A pwen johpwa japwung oau ma ngoah diar jang ipoa ma ngoah en insingkihlahng Caesar. A ioar ih me mwohn koawoa Maing Nahmwarki Agrippa. Mwerin oai pirin raprapahki doahroar ah iroahk, ngoah ne kak kilelehdi mehkij apel insingkihlang Caesar. 27 Pwa japwung oang ngoahi ma ngoah kadarla armaj joaldi men nehn ah johpwa dehde kadippok ma uhwoang.”

<- Wihwia kan 24Wihwia kan 26 ->