1 “Ioangoai mihn Jew kan apel joamoai kan, rong ngoahi nehn oai kawoahwoa ngoahi mwohmwai kan.” 2 Nehn ahr rong ah lallalloang irai in lal in Hebrew, irai ken koalikla ahr nennenla.
3 [a]“Ngoah mihn Jew men, ma noaisikdi nehn Tarsus nehn Cilicia, a koakoairda nehn Jerusalem apel wia emen sohn sukuhl nihn Gamaliel. Ngoah oaloahdi kaweid sihkei nehn Kojonned in jamasai koalikkok. Ngoah pel inenin poadidi oang Koahs doahroar kamwai ohroj ma mine me rehn oauwe. 4 [b]Ngoah ne pel koalkoa irai ok ma pwilpwili Alin Koaunno, pwa irai en kojkojdi. Ngoah pel joalihdi woal kan apel lihkan, peiddoang irai nehn kalpwuhj. 5 Jamwrou Laplappo apel ohroj Sohn Mwoalen Koapwunngo kak kadehde pwa da ngoah siksikoa pwen mehlel. Ngoah oaloahjang irai kijilikoau pwi ma insingda oang riasai mihn Jew-ok nehn Damascus. Doari, ngoah ken inla Damascus pwa ngoah en joalihkihdi irai joal pahrang, ngoah kajpahlihdo irai Jerusalem pwa irai en koaloklok.”
6 “A nehn oai kijkijoula koaroanlahng Damascus dapwa injauwaj, maram oau jang nehnloannge doahroar joarom dakarda apel pidekihpene ngoahi. 7 Ngoah ken kipdi oang nehn pwirej apel rongda ngilloau ma pwa, ‘Saul, Saul, amwda koah ke kin kojkojuk ngoahi?’ 8 Ngoah ken japoang, ‘Inje Koah maing?’ Ngillo japoang ngoahi pwa, ‘Ngoah Jesus mihn Nazareth ma koah kin kojkojuk.’ 9 Woallok ma pwili ngoahi pel kapang marammo, a irai johpwa rong ngillo ma laldohng ngoahi. 10 Ngoah ken idoak, ‘Koaun, da ngoah anahne wia?’ Koaunno pwehngdohng ngoahi, ‘Uhda alwe nehn Damascus, pwa koah pirin kidalda joang ohroj ma Koahs ne koajoane oang koawoa en wia.’ 11 Ngoah ken majkunkihla dak in marammo. Doari, irai ok ma pwili ngoahi, koldi poaihoa, ukla ngoahi nehn Damascus.
12 “Mine woal men adanki Ananias; ih woal joaroawi men ma kin poadidi apel peikkoang asai Kojonneddo, woal men ma inenin kenken ipen irai mihn Jew ohroj ma koaukoaujoan Damascus. 13 Ih indoa uhda ipoai ih pwa, ‘Rioai Saul, pwuroahng kapangda wija!’ Nehnnoar anjoauwo ngoah ken kapangda wija apel jipwoaldahng ih. 14 Ih pel pwa, ‘Koahs in jamasai koalikkok ne pilda koawoa pwa koah en kidal kupwuroa, kapang Nah Papah Pwunngo, apel rong Ah mahjan jangin pein ngiloa. 15 Pwa koah pirin wiahla Nah jounkadehde pwa koah en sikoahng armaj ohroj dahkij koah ne kapang apel rong. 16 Doari apkas da koah joujowi? Uhda poapdaijla pwa dipoamw kan en kamwkelda nehn oamw pirin kapkap.’ ”
22 Armajjok ken rong en Paul sikesik oaroh lel ah pwahla iroahioauwe, irai sapda rahrahuki, “Kajroahla ih! Kojukdi ih! Ih joah koanoahng mour!” 23 Irai ken rahrahu apel jeioahlki arai likkoauwok apel peipeidda pwirej par nehn woahwoa. 24 Koaun in jounpei in Rome-o pwehng nah jounpei kan en ukla Paul nehn arai kel in jounpeiho. Ih pel pwehng irai en poki pwa ih en woahwoahkihla kahrpoan en mihn Jew-ok ahr rahrahu apel palpallan ih. 25 A nehn arai joalihdi pwa ih en pokpok, Paul pwehng emen irai laplap in jounpeihok ma mine wijahu, “A pwen pwung kamwai en poki sowoa mehlel in Rome men ma kahjik kadeikkihda dihp oau?”
26 Nehn en laplap in jounpeiho rong me, ih ken inla ipen koaun in jounpeiho pwehng ih, “Dahkij koah wihwia? Woal meno wia sowoa mehlel in wein Rome men!”
27 Koaun in jounpeiho inla ipen Paul kalelpoak, “Pwehng ngoahi pwa koah sohn wein Rome mehlel men?”
28 Koaun in jounpeiho pwa, “Ngoah wiahla sohn wein Rome mehlel men nehn oai dupukla uhwen mwani koalik oau.”
29 Nehn anjoauwo woallok ma pirin kadeik Paul ken sohjang ipoa. A koaun in jounpeiho pel majpwehkda nehn ah woahwoahkihda pwa Paul uhdahn sowoa mehlel men in wein Rome a ih ken joalihkihdi Paul joal pahrang.