Lucas 8

Ñiñaha tsa jatyinyee̱ tsi ra Jesús

1 Tsa yaha̱ can, tan cuahán ra Jesús tsicá ra iin iin ñuu nahnu tan iin iin ñuu nyihi. Tan caahán ra tsihin nyɨvɨ. Tan jacotó ra tsi ñi tuhun vaha nácaa cuñí Nyoo cundaca ñaha ra tsi ñi. Tan tsa utsi uvi taahan ra tsa tava̱ tyiñu ra, cuahán ra naha tsihin ra. 2 Tan cuahán tucu juhva ñiñaha tsa janduvaha̱ ra: ñi cuhvi̱ tan ñi yɨhɨ̱ tatyi ña vaha. Tan tsihin ñi cuahán ña María tsa quee̱ ñuu Magdala, tan juvin ña cuví ña yɨhɨ̱ utsa tatyi ña vaha tan nduvaha̱ ña. 3 Tan cuahán tucu ña Juana, ñasɨɨhɨ ra Chuza, ra cumí tyiñu cuenda ra Herodes, tan ña Susana tsihin tandɨhɨ ca ñiñaha tsa jatyinyeé tsi ra Jesús tsihin tsa iyó tsi ñi.

Nu caahán ra Jesús tyin tumaa iin ra tatsí tacan cuví ra caahán tuhun Nyoo

(Mt. 13.1-9; Mr. 4.1-9)

4 Tan cuaha xaan nyɨvɨ quee̱ ñi iin iin ñuu, tyin cua nyehe ñi nu caahán ra Jesús tuhun Nyoo. Tan tuvi xaan ñi nyecú, tan quitsaha̱ caahán ra tsihin ñi tsihin iin cuhva tsaha̱ cuenda ra, tan catyí ra:

5 ―Quita̱ iin ra vehe ra. Cuahán ra nu iyó tyiñu jahá ra, tyin cua tatsi ra tsɨtɨ trigu nu ñuhu ra. Tan cuhva tsa tatsí ra quɨtɨ́ ra tsɨtɨ can, tan cucoyo̱ juhva yuhu ityi. Tan tsañi̱ nyɨvɨ tsata can. Tan quitsi̱ saa tan tsatsi̱ tɨ. 6 Tan juhva ca tsɨtɨ can cucoyo̱ tyañu yuu. Cana̱ tsɨtɨ ican. Maa tyin na ityi̱ tsi tyin luxu cuii ñi ñuhu yɨhɨ́ tsaha tsi. Tan nduve catsin. 7 Tan juhva ca tsɨtɨ cucoyo̱ tyañu iñu. Maa tyin quɨvɨ cana̱ trigu iin caa ñi tsihin iñu can, iñu can tsahñi̱ tsi trigu can. 8 Maa tyin juhva ca tsɨtɨ cucoyo̱ nu ñuhu vaha. Tan quɨvɨ tsahnu̱ tsi, vaha xaan tsaha̱ tsi tsɨtɨ. Tyin tsa iin ñi tsɨtɨ ican, cientu tsɨtɨ quita̱ tsihin tsi ―catyí ra Jesús.

Tan tsa yaha̱ tsaha̱ ra cuhva can, tan quitsaha̱ caná tsaa ra tyin na tyaa soho nyɨvɨ, tan catyí ra:

―Tatun iyó soho ndo, tya̱a soho ndo tuhun caahán yu ―catyí ra.

Nu jacoto̱ ra Jesús nacuenda jacuahá ra tsi nyɨvɨ tsihin cuhva caahán ra tsihin ñi

(Mt. 13.10-17; Mr. 4.10-12)

9 Yaha̱ can tan ra tsicá tsihin ra, nducu̱ tuhun ra naha tsi ra náa cuñí tsi catyi cuhva tsa caha̱n ra tsihin nyɨvɨ. 10 Tacan tan catyí ra tsihin ra naha:

―Tsi nyooho jacotó Nyoo tuhun xeehe, nácaa ndacá ñaha ra. Maa tyin tandɨhɨ ca ñi ican, tsihin cuhva ñi caahán yu tsihin ñi. Tacan tan nyehé ñi tan cuví tsi tumaa tsa ña nditsin nyehé ñi, tan tsiñí ñi maa tyin ña cua cutuñi iñi ñi náa tuhun cuví can.

Nu tsaha̱ cuenda ra Jesús cuenda ra tsa tatsí

(Mt. 13.18-23; Mr. 4.13-20)

11 ’Cuhva tsa tsaha̱ yu tsi ñi, cuñí tsi catyi tsi tyehen: tsɨtɨ can, tuhun Nyoo cuví tsi. 12 Tan nu cucoyo̱ tsɨtɨ trigu ican yuhu ityi, nyɨvɨ tsa tsiñi̱ tuhun Nyoo cuví can. Maa tyin quitsi̱ nu ña vaha tan quinyaa̱ nu tuhun Nyoo tsi ñi tan coto tsinu iñi ñi tan cacu ñi. 13 Tan nu cucoyo̱ tsɨtɨ can tyañu yuu, juvin ñi nyɨvɨ tsa tsiñi̱ tuhun Nyoo cuví can. Sɨɨ xaan naquihi̱n vaha ñi itsi juhva ñi quɨvɨ. Maa tyin ña yɨhɨ́ vaha yoho ñi, juhva ñi quɨvɨ tsinu̱ iñi ñi, tan quɨvɨ tsa quitsaha̱ nyehé ñi tundoho, tan jandɨhɨ̱ ñi tsa tsinú iñi ñi. 14 Tan nu cucoyo̱ tsɨtɨ tyañu iñu, juvin ñi nyɨvɨ tsiñi̱ tuhun Nyoo cuví can. Tsiñi̱ ñi tuhun Nyoo maa tyin ña nasama̱ ñi cuhva iyó ñi. Tyin yɨhɨ́ ñi, tyaá ca iñi ñi tuhun tundoho tan ñavin ca tuhun Nyoo. Tan inga ñi, nyiyo ca iñi ñi tsa cuca. Tan inga tucu ñi sɨɨ ca cuñí ñi tsihin tsa sɨɨ caá tsa iyó nu ñuhu ñayɨvɨ. Tan cuví ñi tumaa cuví yutun tsa ña tsaha̱ tsɨtɨ. 15 Maa tyin nu cucoyo̱ tsɨtɨ nu ñuhu vaha, yacan cuví nyɨvɨ tsa tsiñi̱ tuhun Nyoo, tan vaha añima ñi tyin tsinú iñi ñi tsihin tanɨɨ añima ñi. Tan vaha tyaá soho ñi tuhun Nyoo, tan ña naá maa iñi ñi tuhun ra. Tan javahá ñi tandɨhɨ tuhun caahán ra.

Nu caha̱n ra Jesús tyin ña cua tyihi xeehe yo ñuhu̱ tsa jandunditsín Nyoo añima yo coto quinyaa ra itsi

(Mr. 4.21-25)

16 ’Ndi intuhun yo ña tyaá yo ñuhu̱ tyuma tan tyihí xeehe yo xuu tsito a inga nu xeehe. Tyaá yo ñuhu̱ tyuma maa tyin tsaquín nyaa yo can iin nu sucun, tacan tan quɨhvɨ́ nyɨvɨ tsitsi vehe maa tyin nditsin. 17 Tyin nduve iin tsa nyií xeehe, tan ña cua quituvi can. Tan ndi intuhun tsa xeehe, tan ña cua quita tsi nu nditsin, tan tsahan nacoto yo. 18 Yacan cuenda tya̱a soho ndo tuhun caahán yu. Tyin tatun tyaá yahvi ndo tuhun caahán yu, cuaha ca cua janaha yu tsi ndo. Maa tyin tatun ña cua tyaa soho ndo, tacan tan cua quinyaa Nyoo nda cuanda tsa luxu ñi tsa cuñí maa ndo tyin cumí ndo.

Nu tsaha̱ cuenda ra Jesús tyin tumaa yañi ra, tan tumaa sɨhɨ ra, tacan cuví nyɨvɨ tyaá yahvi tuhun Nyoo

(Mt. 12.46-50; Mr. 3.31-35)

19 Tacan tan tsaa̱ sɨhɨ ra Jesús tsihin yañi ra nu nyií ra. Maa tyin ña cuvi̱ tsaa ñi tyin tuvi xaan nyɨvɨ. 20 Tacan tan jacoto̱ nyɨvɨ nyecú ican tsi ra Jesús, tan catyí ñi:

―Sɨhɨ un tsihin ra yañi un naha ra nyecú ñi tsata vehe. Tan cuñí ñi cahan ñi tsihin un.

21 Tacan tan nacaha̱n ra Jesús, tan catyí ra:

―Tandɨhɨ maa nyɨvɨ tsa tyaá soho tuhun Nyoo tsa caahán yu tan tyaá yahvi ñi itsi, juvin ñi cuví sɨhɨ yu, tan juvin ñi cuví yañi yu ―catyí ra Jesús.

Nu jacutaxi̱n ra Jesús tatyi ñihi nu miñi

(Mt. 8.23-27; Mr. 4.35-41)

22 Cuví tsi iin quɨvɨ quɨhvɨ̱ ra Jesús tsitsi iin yutun ndoo tsihin ra tsicá tsihin ra. Tan catyí ra tsihin ra naha:

―Co̱hon ndo inga tsiyo miñi ihya.

Tacan tan cuahán ra naha tsihin yutun ndoo ican. 23 Tan tsa ndi cuahán ca ra naha mahñu miñi ican, quixí ra Jesús. Tacan tan sana iñi ra naha tan tsaa̱ tatyi ñihi xaan. Tan quitsaha̱ tyihí tsi ndutya tsitsi yutun ndoo ican. Tan cuñí nyee yutun ndoo can tyin cuaha xaan ndutya quɨhvɨ̱. 24 Tacan tan jandoto̱ ra naha tsi ra Jesús. Tan catyí ra naha tsihin ra:

―¡Maestro! ¡Maestro! Tsa cuñí nyee yo tsitsi ndutya ―catyí ra naha.

Tacan tan nduvita̱ ra Jesús. Tan caahán ra tsihin tatyi can tan tsihin ndutya can, na cutaxin tsi. Tan cutaxi̱n tsi. 25 Tacan tan catyí ra tsihin ra tsicá tsihin ra:

―[¿Nacuvi yuuhví ndo?] ¿Numaa cuahán tsa tsinú iñi ndo? ―catyí ra tsihin ra naha.

Maa tyin ra ican naha ra, nayuhvi̱ xaan ra naha. Tan iyo xaan cuñí ra naha. Tan quitsaha̱ tsicá tuhun tahan ra naha:

―¿Yóo ra cuví ra ihya? Tyin nda cuanda tatyi tan ndutya tan tyaá yahvi tsi tsa caahán ra.

Nu nduvaha̱ iin ra yɨhɨ̱ tatyi ña vaha nda Gadara

(Mt. 8.28-34; Mr. 5.1-20)

26 Tacan tan tsaa̱ ra naha nda Gadara tsa canyií yuhu miñi ityi nuu Galilea tsa canyií inga tsiyo miñi can. 27 Tan quita̱ ra Jesús tsitsi yutun ndoo ican. Tan ican tsaa̱ iin ra ñuu tsa canyií Gadara can tsijataha̱n ra tsi ra. Tan tsanaha xaan yɨhɨ́ tatyi ña vaha tsi ra, tan ña nditsí ca maa ra jahma. Tan ña iyó ra vehe ra. Tsicá nuu ñi maa ra nu ñaña cumí santu. 28-29 Tan tuhvá tatyi ña vaha ican jacunú sana nu tsi ra. Tan yacan cuenda tuhvá ñi tsaahñí ndaha ra tan tsaha ra tsihin cadena. Maa tyin tatyi ña vaha ican tsahá tunyee iñi tsi ra tsa cahnya ra can. Tan jacunú nu tsi ra. Tan tsindacá nu tsi ra iin nu nduve maa nyɨvɨ iyó. Ra ican tsaa̱ ra nu nyií ra Jesús. Tan cuhva tsa nyehe̱ ra can tsi ra Jesús, tsicuɨñɨ̱ tsɨtɨ ra nuu ra. Tan caná tsaa ra tan catyí ra:

―¿Nacuvi tyihí un tsi un tsihin yuhu, yooho Jesús, Sehe Nyoo nyaá gloria? Tsicán yu tsi un ña ja̱nyehe un tundoho tsi yu ―catyí ra yɨhɨ́ tatyi ña vaha ican tsihin ra Jesús, tyin ra Jesús tava̱ tyiñu ra tsi nu tsa quita nu tsi ra ndaahvi ican.

30 Tan nducu̱ tuhun ra Jesús tsi tatyi ña vaha ican, tan catyí ra:

―¿Náa nañí un?

Tan tatyi ña vaha ican jacaha̱n nu tsi ra can, tan catyí ra:

―Nyuhu nañí ndi, Legión.

Tacan catyí ra tyin cuaha xaan tatyi ña vaha yɨhɨ́ tsi ra. [Cuenda mil nahnu yɨhɨ́ tsi ra.] 31 Tacan tan catyí nahnu tsihin ra Jesús tyin ña jacuhun ra tsi nahnu tsitsi Yavi Cunu nu cua nyehe nahnu tundoho tan ña cuvi maa quita nahnu. 32 Tan tsica̱n nahnu tsi ra Jesús na cuhva ra quɨhvɨ nahnu tsitsi quɨnɨ tsa yucú yuhu miñi ican tsatsí tɨ naha tɨ. Tacan tan tsaha̱ ra Jesús ndatu tsa quɨhvɨ nahnu tsitsi quɨnɨ ican naha tɨ. 33 Tan quita̱ nahnu tsi ra ndaahvi can. Tan quɨhvɨ̱ nahnu tsitsi quɨnɨ ican naha tɨ. Tacan tan tsinu̱ quɨnɨ can naha tɨ. Tan yatyin ican nyaá iin xahva cunu yuhu miñi ican. Ican cucoyo̱ tɨ naha tɨ tsitsi miñi ican. Tan tsihi̱ tɨ naha tɨ tsitsi ndutya.

34 Tacan tan ra jahá cuenda tsi quɨnɨ ican naha ra, nayuhvi̱ xaan ra naha. Tan tsinú ra naha cuahán ra naha cua nacatyi tuhun ra naha tsa cuvi̱ can tsihin nyɨvɨ nda ñuu. Tan tandɨhɨ ñi nyɨvɨ tsa nyehe̱ ra naha, tan nacatyi̱ tuhun ra naha tsa cuvi̱ ican. 35 Tacan tan tsaha̱n nyɨvɨ tsinyehe̱ ñi náa tsa cuvi̱, tan tsaa̱ ñi nu nyií ra Jesús. Tan nañihi̱ ñi tsi ra tsa tsa yaha̱ quita̱ tatyi ña vaha can. Nyaá ra tsaha ra Jesús. Tan tsa ñuhú ra jahma. Tan tsa vaha cuñí jiñi ra. Tan nayuhvi̱ xaan ñi cuvi̱. 36 Tacan tan tandɨhɨ ñi tsa nyehe̱ tsa cuvi̱ ican, nacatyí tuhun ñi tsihin tandɨhɨ ca nyɨvɨ nácaa quita̱ tatyi ña vaha tsi ra ndaahvi can, tan nduvaha̱ ra. 37-39 Tacan tan tandɨhɨ nyɨvɨ iyó Gadara can quitsaha̱ caahán ñi tsihin ra Jesús na cunuhu ra ityi nu quee̱ ra. Tyin nayuhvi̱ xaan ñi tsa javaha̱ ra tsihin nu tatyi ña vaha ican. Tacan tan ra tsa quita̱ nu tatyi ña vaha can nahnu, caha̱n ndaahvi ra tsihin ra Jesús, na cuhva ra cuhun ndɨhɨ ra tsihin ra. Maa tyin catyí ra Jesús tsihin ra:

―Cu̱anuhu yuvehe un. Tan cu̱hva cuenda un tsi nyɨvɨ vehe un náa ndɨhɨ tsa javaha̱ Nyoo tsihin un ―catyí ra.

Tacan tan ra Jesús quɨhvɨ̱ ra tsitsi yutun ndoo ican. Tan cuanuhu̱ ra tsihin ra tsicá tsihin ra. Tacan tan ra ndaahvi tsa nduvaha̱ ican, cuanuhu̱ ra nda ñuu ra. Tan ityi cuahán ra nacatyí tuhun ra tsihin tandɨhɨ nyɨvɨ ñuu ican nácaa janduvaha̱ ra Jesús tsi ra.

Nu nduvaha̱ ña sehe ra Jairo tan ñaha tsa tɨɨ̱n jahma ra Jesús

(Mt. 9.18-26; Mr. 5.21-43)

40 Quɨvɨ tsa tsaa̱ ra Jesús inga tsaha tsa tsaha̱n ra inga tsiyo miñi can, cuaha xaan nyɨvɨ ndatú tsi ra. Tan sɨɨ xaan cuñí ñi tyin tsaa̱ nyico ra. 41 Tacan tan tsaa̱ iin ra tsa nañí Jairo, ra cuví ityi nuu vehe ñuhu, tan tsicuɨñɨ̱ tsɨtɨ ra nuu ra Jesús. Tan quitsaha̱ caahán ndaahvi ra tsihin ra na cuhun ra vehe ra. 42 Tyin iyó iin ñaha sehe ra, tan iyó utsi uvi cuiya ña. Tan tsa cuñí cúu ña jahá cuehe. Tacan tan cuahán ra Jesús vehe ra. Tan cuaha xaan nyɨvɨ cuahán tsihin ra, tan tyañu xaan nu cuahán ra tyañu ñi. 43 Tan tsihin nyɨvɨ ican cuahán iin ñaha cuuhví. Tsa iyó utsi uvi cuiya ndohó ña cuehe tsa cuún nɨñɨ ña. Tan tsa ndɨhɨ maa xuhun ña janaa̱ ña tsihin doctor tan ña nduvaha̱ ña. 44 Maa tyin tsaa̱ ña nu cuahán ra Jesús, ityi tsata ra. Tan tɨɨ̱n ña jahma ra. Tan iin yaha ñi, tan tsicuɨñɨ̱ tsa cuún nɨñɨ ña.

45 Tacan tan catyí ra Jesús:

―¿Yóo tɨɨ̱n jahma yu?

Tan tandɨhɨ ñi cuahán tsihin ra catyí ñi:

―Yoñi.

Tan ra Pedro tsihin ra cutahan tsihin ra, catyí ra naha tsihin ra Jesús:

―Maestro, cuaha xaan nyɨvɨ cuahán tsihin un, tan tyañu xaan nu cuahán un. Tan juvin ñi maa ñi tyandahñí tsi un. Tan nducú tuhun ca un “¿Yóo tɨɨ̱n jahma yu?” ―catyí ra naha.

46 Maa tyin ra Jesús catyí ra:

―Tsitó maa yu tyin iyó iin nyɨvɨ tɨɨ̱n jahma yu, tyin tuvi̱ iñi yu cuahán juhva tunyee iñi tsa iyó tsi yu ―catyí ra.

47 Tacan tan ñaha can nyehé ña tyin tsa tsitó ra. Tan quitsaha̱ nɨhɨ́ ña tsihin tsa yuuhví ña. Tan tsicuɨñɨ̱ tsɨtɨ ña nuu ra. Tan nacatyi̱ tuhun ña tsihin ra nacuenda tɨɨ̱n ña jahma ra, tan nácaa nduvaha̱ ña iin yaha ñi ican. Tan tsiñí tandɨhɨ nyɨvɨ tsa nacatyí tuhun ña. 48 Tacan tan catyí ra Jesús tsihin ña:

―Tsa nduvaha̱ un tyin tsinú iñi un tsi yu. Cu̱aahan tsihin tsa vaha ―catyí ra.

49 Ndi caahán ca ra Jesús, tan tsaa̱ ñi iin ra quee̱ vehe ra Jairo, ra cuví ityi nuu vehe ñuhu. Tan catyí ra tsihin ra Jairo:

―Sehe un tsa yaha̱ tsihi̱ ña. Ña cuhva ca un tɨsɨhɨ tsi ra Maestro ihya ―catyí ra.

50 Maa tyin tsa tsiñi̱ ra Jesús tsa caha̱n ra ican, tan catyí ra tsihin ra Jairo:

―Ña nayuhvi un. Tsi̱nu iñi. Tan ña sehe un cua nduvaha ña ―catyí ra.

51 Tan cuhva tsa tsaa̱ ra Jesús vehe ra Jairo, ña tsaha̱ ra quɨhvɨ nyɨvɨ tsitsi vehe. Maa ñi maa ra Pedro tan ra Jacobo tan ra Juan tan jutu ñaha luhlu can tsihin sɨhɨ ña quɨhvɨ̱ ñi tsitsi vehe nu canyií ñaha luhlu tsa tsihi̱ can. 52 Tan tandɨhɨ ñi tsacú xaan ñi tsa cuenda tyin tsihi̱ ña. Maa tyin ra Jesús catyí ra tsihin ñi:

―Ña va̱cu ca ndo. Tyin ña tsihi̱ ña. Quixí ña ―catyí ra.

53 Maa tyin tsacú naaha ñi tsa caahán ra tacan. Tan ña tsinú iñi ñi, tyin tsitó ñi tyin tsa tsihi̱ ña. 54 Tacan tan tɨɨ̱n ra Jesús ndaha ña. Tan tsaa nacaha̱n ra tan catyí ra tsihin ña:

―Ndu̱vita, ñaha luhlu ―catyí ra.

55 Tacan tan nandoto̱ ña. Tan iin yaha ñi nduvita̱ ña. Tan catyí ra Jesús:

―Cu̱hva ndo tsa catsi ña.

56 Tan jutu ña tsihin sɨhɨ ña, iyo xaan cuñí ñi. Maa tyin catyí ra Jesús tsihin ñi tyin yoñi maa tsihin cua cahan ñi tsa cuvi̱ ican.

<- Lucas 7 Lucas 9 ->