Apocalipsis 19

1 Mänítøch nmädooyy majiäyaꞌay hänajty jim̱ yaꞌaxy tsajpootyp:

Møj jaanc̈hä Dios jaduhṉ. Jaayaꞌay hajxy xyajwaats xyajtséjcäm.

Tsøg hajxy wiingudsähgǿøyyäm coo møcmäjaa miøødä.

2 Hoyyä Dios quiudiuuṉ̃ coo jaꞌa cuhhiṉdoꞌoxiøjc hoy piädaꞌagy haducytiuum, jeꞌeguiøxpä coo jaꞌa yhaxøøgcuhdujt piahíjxäxä jaꞌa jäyaꞌayhajxy nägøx̱iä, y coo tøø yaghoꞌogy jaꞌa Diosquex̱ypä møødä Dioshuung.

Coo jaꞌa Dios jaꞌa caꞌawiindøybä yajcumädow̱aꞌañ, yejpiä tøyhajt jaduhṉ; cab näꞌä nägoobä yajcumädoy.

3 Mänitä majiäyaꞌayhajxy miänáaṉgombä:

Møj jaanc̈hä Dios. Cøjxtaꞌaxiøø yøꞌø cuhhiṉdoꞌoxiøjc yhatoy yhapøgøꞌøwaꞌañ.

4 Mänitä majjäyaꞌay jaꞌa Dios hajxy wyiinjijcädaacy, jaꞌa hajxy nähiiꞌxmädaax̱pä møødä animalhajxy jaꞌa nämädaax̱pä. Mänit hajxy miänaaṉ̃:

―Tøyhajt jaduhṉ, møj jaanc̈hä Dios.

5 Mänitä jäyaꞌay jim̱ tuꞌug quiapxy maa jaꞌa Dios hänajty yhäñaꞌayän:

Nämaꞌaw jaꞌa Dios hajxy coo miøjjä coo jiaanc̈hä, pønjaty Diosquex̱y, pønjatiä Dios wiingudsähgøøby, miøjjä miuutscä.

6 Mänítøch nmädooyy coo majiäyaꞌay hänajty quiapxy. Jaduhṉ yajmädooyy nebiä mejy møc yhahøøc̈hän, nebiä hänee møc yaꞌaxiän:

Møj jaanc̈hä Dios jaduhṉ. Tøø tiägøøñä gobiernähajpä.

Jim̱ä møjcuhdujt miøødä.

7 Tsøg hajxy jootcugǿøyyäm, tsøg hajxy xooṉdáacäm. Tsøgä Dios hajxy møj jaanc̈h pädáacäm.

Tøø yhabaatnä coo jaꞌa Meeghuung piøgaaṉnä. Tøø jaꞌa jaxieꞌeb ñiyhahixǿøyyänä.

8 Howyit jaduhṉ jaanc̈h tehm̱ yajpøgøꞌøwáaṉäp, waꞌadspä, haam̱bä tsämaam̱bä,

nøm̱ä majiäyaꞌayhajxy miänaaṉ̃. Haa jaꞌa howyitä, jeꞌeduhṉ ñänøøm̱by coo jaꞌa Dioshuunghajxy hänajty hoy tøø wiädity hädaa yaabä naax̱wiin.

9 Mänítøc̈hä Diosmoonsä xñämaayy:

―Cujaay jaduhṉ: “Jootcujc hajxy yhity pønjaty tøø yajwoy tøø yajwich maa jaꞌa Meeghuung piøgaꞌañän.”

Mänítøch xñämáaguiombä:

―Tøyhajtä Diosmädiaꞌagy jaduhṉ.

10 Mänítøc̈hä Diosmoonsä nja wiinjijcädaacy. Nja wiingudsähgøꞌøwáaṉhøch jaduhṉ. Mänítøch xñämaayy:

―Caꞌac̈h xwyiingudsähgøꞌøy. Høøc̈hä Dios xmioonsähajp nej mijts xmioonsähajpän, coo mijtsä Jesucristo miädiaꞌagy hoy myajtuuṉä. Jaꞌa Dios mäbøcy mwiingudsähgǿꞌøwäp.

Tøyhajtä Jesucristo miädiaꞌagy. Tuꞌugmädiaꞌagy hajxy yhity, pønjatiä Jesucristo miädiaꞌagy yajwáꞌxäp, pønjatiä Jesucristo capxpaatp.

11 Mänítøch tsajpootyp nhijxy coo tøø yhawaꞌac̈h. Mänítøc̈hä jäyaꞌay tuꞌug nhijxy coo jaꞌa caꞌawiindøybä hoy yajcumädow̱aꞌañ, coo hoy chiptunaꞌañ. Paady xiøhaty jaꞌa hoguiudiuum̱bä, jaꞌa tøyhajtyejpä. Poobcuaañähgøxp hänajty yhäñaꞌay. 12 Jaduhṉä wyiin hänajty quiähxøꞌøgy nebiä jøøn tioyyän. Mayyä cuhjéṉ hänajty miøødä cuhduum. Jim̱ä xøø hänajty miøødä cujaay. Ni pøṉ hänajty quiaꞌa najuøꞌøy tii xøø jeꞌe. Jeꞌeduhṉ nidiuhm̱ najuøøby. 13 Nøꞌtiä wyit hänajty tøø yaghucy. Jaꞌa Diosmädiaꞌagy hänajty xiøhaty. 14 Jaanc̈h tehm̱ miajiäyaꞌay hänajty panøcxp haagä poobcuaañähgøxp. Poobwit hoybä hajxy hänajty miøød, jaanc̈h tehm̱ pioob jaanc̈h tehm̱ wiaꞌads. 15 Jim̱ yøꞌøyaꞌay espada jaanc̈h tehm̱ jiøjp hänajty miøødä yhaawjooty. Jeꞌe jaꞌa jäyaꞌay hänajty yajpuxaam̱by. Jaanc̈h tehm̱ miøc guiobiernähadaꞌañ. Hoyhoyyä jäyaꞌay chaac̈htiunaꞌañ nebiä Dios jaꞌa jäyaꞌay yajcumädoyyän. 16 Jim̱ä xiøø hänajty miøødä cujaay wyitcøxp møødä piuuguiøxp: “Hädaa møjcuhdujtmøød; ni pøṉ møjcuhdujt jaduhṉ quiaꞌa møødä.”

17 Mänítøc̈hä Diosmoonsä tuꞌug nhijxy coo hänajty jim̱ tiänaꞌay maa jaꞌa xøøjän. Mänit jaanc̈h tehm̱ miøc yaax̱y. Jaꞌa luudhajxy møjyaax̱ä, jaꞌa hajxy cøxp jäyøøwiädijpä:

―Miṉ hajxy tsuꞌuds. Jaꞌa Dios hajxy jaduhṉ xmioꞌowaam̱b. 18 Jäyaꞌay hajxy nägøx̱iä mdsuꞌudsaam̱by, miøjjä miuutscä, hopiøṉä, møødä rediøjc‑hajxy, møød hajxy tuum̱bä soldadowiindsǿṉ, møød hajxy møcmäjaamøødpä, møødä cuaay, møød hajxy cuaayhäñaabiä.

19 Mänítøc̈hä animal nhijxy. Møødä reyhajxy hänajty jim̱ choonä møødä quiuꞌughajxy. Tsiptunaam̱b hajxy hänajty jaduhṉ møødä jaayaꞌaguiøxpä jaꞌa cuaañähgøxp wädijpä møødä quiuꞌug. 20 Mänitä animal miajtsä møødä craa jaꞌa jaanc̈h tehm̱ jiäyaꞌawyiinhøhm̱bä. Tøø jaꞌa craa hänajty yajcähxøꞌøgy hoy‑yagjuøøñäjaty maa jaꞌa animal wyiinduumän. Jaduhṉä craa hänajty tøø wyiinhøøñ pønjaty yøꞌø animal señä hänajty møødhájtäp, pønjaty yøꞌø animal yhahädiuuṉnax̱y hänajty tøø wyiingudsähgøøyyä. Mänit hajxy nämetsc jiøønjuipøøyyä maa azufre hänajty tioyyän. 21 Mänitä quiuꞌughajxy yaghóꞌcäxä. Jaayaꞌay jaduhṉ mäyaghoꞌc, jaꞌa hänajty cuaayhäñaabiä. Espadahaam miäyaghoꞌcy, jaꞌa jaanc̈h tehm̱ jiøjpä, jaꞌa hänajty jim̱ miøødpä yhaawjooty. Mänitä hoꞌogyjiäyaꞌayhajxy chuꞌtsä. Jaꞌa luudhajxy jaduhṉ mädsuꞌts jaanc̈h tehm̱ quiuꞌuxiä.

<- Apocalipsis 18 Apocalipsis 20 ->