―Ananías, coo miic̈hä mnaax̱ tøø mdoogy, cujjiä xädøꞌøñ tøø mmämähmøꞌøy mäduhṉ̃tiä tøø xquiujuuyyä. Cooc̈h miic̈hä xädøꞌøñ cujjiä tøø xmioꞌoy, jaduhṉ miic̈h tøø mmänaꞌañ cooc̈h tyijy cøx̱iä tøø xmioꞌoy. Coo naax̱ hänajty mgaꞌa toogyñä, mjeꞌehajpyñä hänajtyñä. Coo tøø mdooꞌnä, miic̈h mjeꞌe hijty jeꞌe jaꞌa naax̱tsow̱. Coo jaduhṉ tøø mhøhṉdaꞌagy, mgädiehy jaduhṉ. Jaꞌa Dios miic̈h mja wiinhøønaaṉ, caꞌa yhøjtsä. Jaꞌa møjcuꞌugong miic̈h jaduhṉ xyajcapxtägooyy, paadiä Dioshespíritu jaduhṉ mja wiinhøønaaṉ̃ ―nøm̱ä Ananías ñämaayyä.

5 Coo Ananías jaduhṉ miädooyy, mänitiä hoꞌogy quiädaayy. Pønjaty jaduhṉ mädoyhajt coo Ananías jaduhṉ yhoꞌcy, mänit hajxy chähgøøbiøjcy. 6 Mänitä høxcujc‑hänaꞌc‑hajxy näjeꞌe miejch. Mänitä hoꞌogyjiäyaꞌay hajxy ñähbijty. Mänit hajxy hoy yajnaax̱tägøꞌøy.

7 Cudägøøghorä, mänitä Ananías tioꞌoxiøjc piamejtspä, jaꞌa hänajty xøhajpä Safira. Cahnä Safira hänajty miädoyhatyñä coo ñihyhap hänajty tøø yhoꞌogy. Mänitä Safira tiøjtägøøyy maa Pedro hänajtiän. 8 Mänitä Pedro jaꞌa Safira miäyajtøøyy:

―Nej, jaduhṉä mnaax̱ hajxy mjaanc̈h yejquiä, neby hajxy tøø mnägapxiän.

―Jaduhṉ ―nøm̱ä Safira yhadsooyy.

9 Mänitä Pedro miänáaṉgumbä:

―Tii hajxy coo mja cojyquiapxytiuuṉ̃ coo hajxy hänajty mhøhṉdaꞌagaꞌañ. Nej, cab hajxy mnajuøꞌøyä coo Dioshespíritu hotyiijä yajcopcøꞌøy. Cab hajxy jaduhṉ hoy mwiinhǿønät. Coo mnihyhap yhøhṉdaacy, paady tøø yhoꞌogy. Xii hänaꞌc‑hajxy jeꞌe tiøjtägøꞌøy, jaꞌa hajxy hoy tøø miäyajnaax̱tägǿꞌøyäbä. Nøcxaam̱b miic̈h yøꞌø hänaꞌc xyajnaax̱tägøꞌøwaam̱bä ―nøm̱ä Safira ñämaayyä.

10 Tuuṉä Safira jaduhṉ ñäꞌä mädooyy, mänitiä Pedro tiecyquiädaw̱øøyyä hoꞌogy. Coo høxcujc‑hänaꞌc‑hajxy tiøjtägøøyy, mänitä Safira hajxy yhijxy coo hänajty tøø yhoꞌogy. Mänit hajxy yhøxcøøbiädsøøm̱y. Mänit hajxy hoy yajnaax̱tägøꞌøy maa ñihyhapä ñähmøjcän. 11 Pønjaty jaduhṉ mädoyhajt nebiä Ananíashajxy hänajty tøø jiaty tøø yhabetiän, mänit hajxy nägøx̱iä chähgøøbiøjcy, møødä mäbøjpädøjc‑hajxy nägøx̱iä.

12 Mänitä apóstoldøjc‑hajxy jim̱ tiägøøyy mäbaꞌamyajnajxpä cajptooty. Jaanc̈h tehm̱ yhoy‑yagjuøøñä hajxy hänajty tiuṉ̃. Jaduhṉ hajxy hänajty yajcähxøꞌøgy coo Dios mäjaa jiaanc̈h tehm̱ miøødä. Jim̱ä mäbøjpädøjc‑hajxy hänajty yhamugøꞌøyhaty tsajtøgooty maa hänajty xiøhatiän jaꞌa Pórtico de Salomón. 13-14 Tehṉgahnä mäbøjpädøjc‑hajxy hänajty miayøꞌøy näyaꞌay‑nädoꞌoxy, jaꞌa hajxy hänajty mäbøjpä jaꞌa Jesucristocøxpä. Haa jaꞌa jäyaꞌayhajxy hänajty caꞌa mäbøjpä, cab hajxy hänajty jim̱ ñäꞌägädä nøcxy maa mäbøjpädøjc‑hajxy hänajty nax̱y yhamugøꞌøyän, hoyyä mäbøjpädøjc‑hajxy hänajty jiaanc̈h tehm̱ quiumayii jaꞌa cúꞌugäm. Paady hajxy hänajty jim̱ quiaꞌa nøcxaꞌañ, jaꞌa hajxy hänajty caꞌa mäbøjpä, coo hajxy hänajty chähgøꞌøy. 15 Coo apóstoldøjcä paꞌamjäyaꞌay hajxy hänajty may yajmøcpøcy, paadiä paꞌamjäyaꞌayhajxy hänajty jim̱ quiøøñøcxyii tuꞌhaam maa Pedro hänajty ñaxøꞌøwaꞌañän. Jadúhṉägä paꞌamjäyaꞌayhajxy jaduhṉ näjeꞌe miøcpǿgät coogä Pedro yhahapc hajxy ñäꞌä páatät maa hajxy hänajty quioꞌnaꞌayän cøjxcøxp, møød toꞌogyquiøxp. 16 Mayyä paꞌamjäyaꞌayhajxy hänajty jim̱ yajmec̈hii Jerusalén, møød jaꞌa hajxy haxøøgpä caꞌa hoybä møødpä, jaꞌa hajxy hänajty tsohm̱bä Jerusaléncajptpaꞌa mäwiingóṉ. Nägøx̱iä hajxy hänajty yajmøcpøgyii.

17 Coo teedywiindsøṉhajxy jaduhṉ miädoyhajty coo paꞌamjäyaꞌayhajxy hänajty may tøø wyiꞌi miøcpøcy, mänit hajxy nägøꞌø nädecypiä jiootmaꞌty, møødä saduceodøjc‑hajxy. Hix̱, cabä apóstoldøjc‑hajxy hänajty yajmädsogyii coo hajxy hänajty tehṉgahnä wyiꞌi yajnähixøꞌøy jaꞌa Jesúscøxpä. 18 Mänitä apóstoldøjc‑hajxy hoy chumyii. 19 Mänitcoodsä Diosmoonsä jaꞌa pujxtøghaaw hoy yaghawaꞌac̈h. Mänitä apóstoldøjc‑hajxy yhøxwoobädsøøm̱ä jaꞌa Diosmóonsäm. 20 Mänit hajxy ñämaayyä:

―Coo jiobǿꞌøwät, mänit hajxy jim̱ mnǿcxät maa tsajtøjcän. Jim̱ä cuꞌug hajxy myajnähixǿꞌøwät neby hajxy ñähwáꞌadsät, neby hajxy jaduhṉ jiugyhádät cøjxtaꞌaxiøø nebiä Dios jiugyhatiän ―nøm̱ä Diosmoonsä miänaaṉ̃.

21 Coo jiobøøyy, mänitä apóstoldøjc‑hajxy jim̱ jiaanc̈h nøcxy tsajtøgooty neby hajxy hänajty tøø ñämaꞌayiijän jaꞌa Diosmóonsäm. Mänitä cuꞌug hajxy tiägøøyy yajnähixøøbiä.

Mänitä teedywiindsøṉhajxy miänaaṉ̃ coo hajxy nägøx̱iä yhamugǿꞌøwät juntahajpä, møødä majtøjc‑hajxy israelítabä. Mänit hajxy miänaaṉ̃ coo tsum̱yhänaꞌc‑hajxy jim̱ yajmedsǿøjät maa junta hajxy hänajty yagjadyiijän. 22 Coo policíashajxy jim̱ miejch maa pujxtøjcän, cab pøṉ hänajty jiibiän. Mänitä policíashajxy wyiimbijty. 23 Mänit hajxy miänaaṉ̃:

―Coo højts jim̱ nmejch maa pujxtøjcän, jeꞌenä hänajty hoy yhaawguiic̈hä. Jim̱ä soldadohajxy hänajty yhadänaꞌayñä maa pujxtøghaawän. Pero coo højts jiiby nja tøjtägøøyy, cab pøṉ hänajty jiibiän ―nøm̱ä policíashajxy miänaaṉ̃.

24 Coo teedywiindsøṉhajxy jaduhṉ miädooyy, møødä tsajtøjcueendähajpä wyiindsøṉhajxy, møødä møjteedywiindsǿṉ, mänit hajxy jiaanc̈h tehm̱ yagjuøøyy. Cab hajxy hänajty ñajuøꞌøy tii hänajty jájtäp túuṉäp. 25 Mänitä jäyaꞌay tuꞌug miejch maa teedywiindsøṉhajxy hänajty jiuntahatiän. Mänitä craa miänaaṉ̃:

―Xim̱ä cuꞌug wyiꞌi yajnähixǿøyyägumbä tsajtøgooty ―nøm̱ä teedywiindsøṉhajxy ñämaayyä.

26 Mänitä apóstoldøjc‑hajxy hoy wioyii. Jaꞌa tsajtøjcueendähajpähajxy hoy miäwoy møødä policíashajxy. Hahoy haweenä apóstoldøjc‑hajxy jaduhṉ jim̱ yajmejtsä maa junta hänajty jiadyiijän. Hix̱, tsähgøøbiø policíashajxy hänajty coo hajxy ñäꞌä pagaꞌads ñäꞌä pawobǿøjät jaꞌa cúꞌugäm. 27 Coo apóstoldøjc‑hajxy jim̱ wioomejtsä maa junta hänajty jiadyiijän, mänit hajxy jim̱ yajnøcxä maa møjteedywiindsøṉä wyiinduumän. Mänitä apóstoldøjc‑hajxy ñämaayyä:

28 ―Tøø højts mijts nja nämaꞌay coo hajxy mgaꞌa näꞌägädä yajnähixǿøñät jaꞌa dijuuntä Jesúscøxpä. Pero cab højts mijtsä nmädiaꞌagy tøø xquiudiuuṉä. Tøø cuꞌug hajxy jaduhṉ mgøx̱y yajnähixøꞌøy, mäduhṉ̃tiä hajxy yaa chänaꞌay Jerusalén. Y højts mijts jaduhṉ xjia wiꞌi yajnähdsømaam̱b cooc tyijy højtsä dijunto Jesús nyajyaghoꞌcä.

29 Mänitä Pedrohajxy yhadsooyy møødä jiamiøødhajxy:

―Cab yhahixøꞌøy coo højtsä jäyaꞌay miädiaꞌagy ngudiúuṉät, cahnä højtsä Dios miädiaꞌagy hänajty ngudiuuṉä. 30 Coo mijtsä Jesús myajyujmänooṉä cruzcøxp, mänitä Dios jaꞌa Jesús yagjujypiøjtägajch, jaꞌa højtsä nhapä ndeedyhájtäm jecy wyiingudsähgǿøyyäbä. 31 Mänitä Dios jaꞌa Jesús cuhdujt miooyy coo Jesús jim̱ miähanéꞌemät tsajpootyp maa Dios yhahooyhaampiän. Coo judíos jaꞌa yhaxøøgcuhdujt hajxy ñajtshixǿꞌøwät, jaduhṉä piojpä quiädieeybä hajxy jaduhṉ yajnähwaats yajcuhwáatsäxät Jesúsäm. 32 Højtsä tøyhajt nyejpy coo Jesús jiujypiøjtägajch coo hänajty tøø yhoꞌogy. Jaanä jaduhṉä Dioshespíritu tøyhajt yejpä coo Jesús jiujypiøjcy. Pønjatiä Dios jaꞌa miädiaꞌagy jaduhṉ cudiúuṉäp, jeꞌe jaꞌa Dios jaꞌa yhEspíritu miooby ―jaduhṉä Pedrohajxy miänaaṉ̃.

33 Coo teedywiindsøṉhajxy jaduhṉ miädooyy, mänit hajxy jiaanc̈h tehm̱ jiootmaꞌty. Mänit hajxy jaduhṉ jia mänaaṉ̃ coo Pedrohajxy yaghoꞌogǿøjät. 34 Jim̱ä fariseo hänajty tuꞌug teedywiindsøṉhagujc. Jueꞌe hänajty xiøhaty Gamaliel. Ley‑yajnähixøøbiä hänajty tiuuṉghajpy. Jaanc̈h tehm̱ wyiingudsähgǿøyyäp hänajty jeꞌe jaꞌa cúꞌugäm. Mänit tiänaayyøꞌcy. Mänit yhanehm̱y coo apóstoldøjc‑hajxy nøcxy yajpädsøm̱yii tuꞌhabaquiä. 35 Mänitä Gamaliel jaꞌa jiamiøødtøjc ñämaayy:

―Mäguꞌughajpädøjc, huuc wiinmahñdyhat hajxy hodiägaamby neby yøꞌø hänaꞌc hajxy mdunaꞌañ. 36 Huuc jahmiets hajxy nebiä Teudas jecy jiajtiän. Mänit jootmøj ñibiädaacä. Mänit ñiñänøøm̱ä cooc tyijy miøjjäyaꞌay jiaanc̈hjäyaꞌayä. Mänit piaduꞌubøjcä nämädaax̱mägoꞌx jäyaꞌay. Mänitä Teudashajxy tiägøøyy tsiptuum̱bä. Mänitä Teudas yaghoꞌcä. Jaꞌa soldadohajxy jaduhṉ mäyaghoꞌc. Mänitä Teudas jiamiøødhajxy xii yaa ñøcxøøyy. Mänitä tsip jaduhṉ yhamaadiujnä. 37 Mänitä tsip wiingpä jadähooc chohṉdáaccumbä mänaa censo hajxy hänajty yajpädøꞌøguiän. Jaꞌa craa Judas jaꞌa tsip jaduhṉ yajtsohṉdaac, jaꞌa hänajty jim̱ tsohm̱bä Galilea. Mänitä cuꞌug may piaduꞌubǿjcäbä. Mänitä Judas yaghóꞌcäbä jaꞌa soldadohajxy. Jaduhṉä Judas jiamiøødhajxy xii yaa ñøcxøøbiä. 38 Paady, høxmats yøꞌø hänaꞌc hajxy. Cab jaduhṉ yhahixøꞌøy coo hajxy nej mdúnät. Hix̱, pø yhamdsoo wiinmahñdy hajxy jaduhṉ yajtuum̱by, cab jaduhṉ yhoyǿꞌøwät; tuꞌumáꞌadäp jaduhṉ. 39 Pero pø yøꞌø hänaꞌcä Dios wyiinmahñdy hajxy yajtúuṉäp, cab hajxy jaduhṉ hoy mgapxhadúgät. Hix̱, jaduhṉ quiähxǿꞌøgät nejpiä Dios hajxy hänajty mmädsiphajpiän ―jaduhṉä teedywiindsøṉhajxy ñämaayyä.

Jiaanc̈h mäbøjc hajxy jaduhṉ nebiä Gamaliel miänaaṉ̃än.

40 Mänitä apóstoldøjc‑hajxy jadähooc quiuyaaxøøyyä tøgooty. Mänit hajxy wiobhoꞌcä. Mänit hajxy yhanehm̱ä coo Jesús hajxy quiaꞌa capxpáatnät. Mänit hajxy ñajtsmadsøøyyä. 41 Xooṉdáacäp hajxy tiøjpädsøøm̱y maa junta hänajty jiadyiijän. Paady hajxy hänajty xiooṉdaꞌagy, hix̱, hahixøøby hänajty jaduhṉ coo hajxy hoc̈hähdiuuṉnä chaac̈hpǿgät jaꞌa Jesúscøxpä. 42 Mänit hajxy tiägǿøguiumbä yajnähixøøbiä jaꞌa Jesúscøxpä, tsajtøgooty møød tøgootypaady. Tehṉgahnä hajxy hänajty yajnähixøꞌøy jøjwidsøꞌø.

<- Hechos 4Hechos 6 ->