Te cue tée‑áⁿ quɨ̌hu‑güedé ɨɨⁿ xɨtɨ́ vícó caa‑güedé andɨu, te nchaa ñáyiu cùu úhú iní ñáhá xìi‑güedé quiní ñáhǎ‑yu xii‑güedé caa‑güedé andɨu. 13 Te òré‑áⁿ nǐhi vìhi tnáa ñuyíú, te úxí xichi cùu‑xi ñuú núú cúndècu‑güedé‑áⁿ te ɨɨⁿ xichi ñuú‑áⁿ naa, te cuú úsá mǐl ñáyiu, te nchaa dava‑gá ñáyiu cácu vá cùú yùhú víhǐ‑yu, te cachí‑yu sá ǐo càhnu cuu Yá Ndiǒxí Yaá ndécú àndɨu.
14 Te tnúndòho‑a cuu‑xi tnúndòho cuu úú yáha, te vitna sa ndètu vií‑nǎ tucu sáá tnúndòho cuu uní.
Espíritú cúú ùsá tɨ̀ú‑xi cútú néhé‑xí
15 Te espíritú cúú ùsá ní tɨú‑xi cútú néhé‑xí, te òré‑áⁿ nǐ tecú níhi ní cáháⁿ tɨtnɨ́ sá nǐ cáháⁿ andɨu, te càchí‑xi:
Nchaa sá cúú cuèndá nchaa ñáyiu ñuyíú táxí tnùní‑yu ni cùu ní nduu cuèndá Tǎtá‑ó Dǔtú Ndiǒxí táxí tnùní‑gá,
Te tnàhá Yaá ní tendaha‑gǎ ní sáháⁿ ñuyíú táxí tnùní‑gá nchaa xíǎⁿ,
te dɨu‑gá taxi tnùní‑gá nɨ caa nɨ quɨ́hɨ́ⁿ.
Duha ní cáháⁿ nchaa sá nǐ cáháⁿ‑áⁿ. 16 Te ndɨ òcó cúmí cue tée sacuéhé xǐnucóo núú xìlé váha ní ngüɨ́ñɨ́ xɨ́tɨ́‑güedě núú Yǎ Ndiǒxí, te ní nuu núú‑güedě ndàa núú ñúhú te ní ngüíta‑güedé chíñùhu ñaha‑güedé xii‑gá, 17 te càchí‑güedé:
Ío ndàcáⁿ táhú‑ndɨ̌ núú yòhó Dútú Ndiǒxí,
Yaá ndácú quìde nchaandɨ túhú sá vǎha,
te dɨu‑ni‑n ndècu‑n ndéé cútnàhá ní ngáva ñuyíú, te dɨu‑ni‑n ndècu‑n vitna, te dɨu‑ni‑n cùndecu‑n ndéé núú cuàháⁿ núú věxi,
te ío càhnu cuu‑n te ní ngüíta‑n ǐo‑gá táxí tnùní‑n.
18 Te nchaa ñáyiu xǐndecu ñuyíú xǐcudéěⁿ‑yu núú‑n,
te vitna ní sáá nduu dàndohó‑n‑yu chi ñá túú cùu váha iní‑n nǔǔ‑yu,
te cada ndáá‑n cuěchi nchaa ñáyiu sa ní xíhí,
te ní sáá tucu nduu cuǎñaha‑n sǎ ndúú tǎhú nchaa ñáyiu ní xinu cuechi nǔú‑n nǐ cáháⁿ‑yu tnúhu‑n, ndɨhɨ nchaa dava‑gá ñáyiu cùu cuendá‑n, chi ñáyiu‑áⁿ néhě‑yu sá yɨ́ñùhu núú‑n,
te ní sáá tucu nduu dànaa‑n nchaa ñáyiu sàhni tnaha ñáyiu‑xi.
Duha càchí ndɨ òcó cúmí cue tée sacuéhé‑ǎⁿ xǎhaⁿ‑güedě xii Yá Ndiǒxí.
19 Te ní xiní‑í ní nacaáⁿ yuyèhe vehe Yá Ndiǒxí andɨu, te xɨtɨ́ vehe‑gá‑áⁿ nǐ xiní‑í ndécú càjá ñúhú sǎ yódó tnùní nàcuáa ní cundáá cada‑gá sá cúú‑xí ñǎyiu, te òré‑áⁿ nǐ xiní‑í ní sáá ndúté, te ní cáháⁿ ñúhu te ío dusaⁿ nǐ quide‑xi, te níhi vìhi ní tnáa, te súúní càhnu dáú ñɨ́ñɨ́ nǐ cuuⁿ.
