6 Yūcuán na te ni cahān ndajéhé un jíín rí:

Tāca jnúhun yáha cúu jnūhun jeē jiní ndije ró jéē ndaā cúu. Te Jitoho yō Yaā Dios, máá yá sáha jíín tée cánacani jnūhun ya jeē jiín Espíritu yā cánacani de. Te suu máá yá ni tají yá ndajéhé yā návāha stéén nuū ñáyuu cácuu mozo yā tācá jniñu jeē yachī coo.

7 Ndiji yachī rī, achí yá.

Te nacā jeē ndetū ñayuu chusóhó jnúhun Yaā Dios jeē yosó núū tútu yáha.

8 Te ruhū Juan, ni jini sōho ri tāca jnúhun yáha, te ni jito ri tācá jniñu yáha. Te ná ni jini sōho ri ni jito ri, yūcuán na te ni jecuɨñɨ̄ yɨtɨ́ rí nuū jehé maá ndajéhé jeē ni stéén tācá jniñu yáha núū rī, jeē chiñúhún rí yā nuú. 9 Te ni cahān ndajéhé un jíín rí:

Ma sáha ró súcuan. Chi ruhū suni mozo Yaā Dios cúu ri, nájnūhun máá ró jiín táca hermano rō jeē cánacani jnūhun ya, jiín ndɨhɨ ñayuu cájetáhú jnūhun yósó nuū tútu yáha. Sa suhva nuū maá Yaā Dios chiñúhún ró. Achí yá.

10 Te ni cahān gā ndajéhé un jíín rí:

Ma chísāhi ró táca jnúhun Yaā Dios jeē yosó núū tútu yáha, chi je cuacuyajni tiempo jeē cúndaā ndɨhɨ. 11 Te ñayuu casáha jniñu néé, na sáha ga máá i jniñu néé. Te ñayuu jnehén ánuá, na quéndōo máá i súcuan. Te sa ñayuu casáha jniñu ndaā, na sáha ga i jniñu ndaā. Te ñayuu cáhīyo ndoo ánuá, na cáca ndoo ga i súcuan. Achí ndajéhé un.

12 Jendaá jeē ndiji yachī rī, achí Jesús. Te quiji ri jiín táhū cuāha ri nuū ɨɨn ɨɨn ñayuu, núu ndese jniñu ni casáha i. 13 Máá rí cúu nájnūhun letra A xīhna ñúhún jíín letra Z jeē sándɨ̄hɨ́ na, chi íyó rí nde xīhna ñúhún te coo ri nɨɨ́ cáni.

14 Nacā jeē ndetū ñayuu jeē jéhe i jnūhun ndundoo ánuá i nájnūhun ndúndoo sahma. Chi cuu caji i ndehē yujnu jeē sáha jeē cótecu i nɨ́ɨ́ cáni, te cuu quɨ̄vɨcoo i yéhyɨ́ ñuu iī ún. 15 Te ichi fuera ñuu ún cuɨñɨ ñayuu tu cácandíje, jíín ñáyuu casáha tásɨ́, jíín ñáyuu cájica jnéní, jíín ñáyuu cájehni ndɨ̄yɨ, jíín ñáyuu cáchiñúhún ídolo, jiín ñáyuu cácusɨɨ̄ ni stahú jnáhan.

16 Máá rúhū Jesús, ni tají rí ndajéhé rī návāha castūhun yá tāca jnúhun yáha nuū tāca grupo ñayuu cácandíje. Te máá rí ni sáha jeē ni íyo rey David, te ni quiji ri nuū yucún David. Te cúu ri nájnūhun lucero ndíndēe cáne cúndijin. Achí yá.

17 Te máá Espíritu Santo jiín máá ñahan jeē nándāha jíín Yaā cúu Londe, cácahān:

Nehen, quɨ̄vɨcoo ró ndaha ya, achí.

Te tāca ñáyuu jeē jíni sōho, suni na cáhán i:

Nehen, quɨ̄vɨcoo ró ndaha ya.

Te tāca ñáyuu cájichī jeē cácuni i coho i, na quɨ́vɨcoo i ndaha ya, te súcuan‑ni na cóho i ndute jeē cótecu i nɨ́ɨ́ cáni sáha.

18 Te tāca ñáyuu jíni sōho jnūhun Yaā Dios jeē yosó núū tútu yáha, cáhán nīhin ri jiín i: Núu ndé ñáyuu chisóó i nuū jnúhun cáhán tutu yáha, te Yaā Dios chisóó yá jnūndóho cáhán tutu yáha, ndoho i. 19 Te núu ndé ñáyuu quende i jecu jnūhun cáhán tutu yáha, te Yaā Dios quende yā tahū i jeē yosó núū libro jeē yosó sɨ́hvɨ́ ñayuu cotecu nɨɨ́ cáni, te ma nihín i tahū i ini ñuu iī ún. Te tutu yáha cúu jeē cahán sɨquɨ̄ tācá un.

20 Te Yaā jeē ni cáhān tāca jnúhun yáha, suhva cáhán yā:

Jendaá jeē ndiji yachī rī, achí yá.

Amén. Súcuan na cóo. Jitoho ná Jesús, jícán tahú na jéē ndíji yachī ní.

21 Te ñúhun ni rī jeē Jítoho yō Jesucristo na sáha ga yā jeē váha róhó jíjnáhan ró. Amén.

<- APOCALIPSIS 21