Ni catava de Jitoho yō nuū ní yɨndūji ya, te tu cájini yō ndé nuū ní cachune de ya, achí ña.

3 Te ni quendacoo Pedro jiín ɨnga tēe scuáha ún, cuácondēhé de yaū ndɨ̄yɨ. 4 Te cájinu tayɨ́ ndɨndúú de. Te ɨnga tēe scuáha ún, nīhin ga ni jinu de vēsú Pedro. Te xīhna gā de ni jinū yaū ndɨ̄yɨ. 5 Te ni scáyɨ de máá de, te ni jito nihni de ini yaū. Te ni jito de jeē tira sahma un cáyūcu máá na. Te tu ní quɨ́vɨ de. 6 Te sáá te ni jinū Simón Pedro jeē ndiquín jnáhan de vēji de jíín ɨnga tēe ún. Te ni quɨ̄vɨ de nuū ní yɨndūji Jesús. Te suni ni jito de jeē tira sahma cáyūcu máá na. 7 Te ni jito de sahma jeē ni ñúsúcún xínī Jesús, tu cátú jíín tira sahma, chi ni natuu te cátú sɨ́ɨn. 8 Yūcuán na te suni ni quɨ̄vɨ ɨnga tēe scuáha jeē ni jínū xīhna gā nuū ní yɨndūji ya. Te ni jito de ndese íyó, te ni candíje de jeē ní natecu yā. 9 Chi nde ná tu jinūcoo de yaū ndɨ̄yɨ, te tu ní jécūhun ni de jnūhun cáhán tutu iī, jeē jíni ñúhún natecu yā núu je ni jihī yā. 10 Yūcuán na te ndɨndúú tée cáscuáha ún cuanungoo de vehe de.

¿Najehē ndahyú rō?

Te ni cahān ña:

Ni catava de Jitoho ná, te tu jíní na ndé nuū ní cachune de ya.

14 Te jeē ni cáhān ña súcuan, te ni ndió cóto ña, te ni jito ña nuū Jesús jeē índichi yā yūcuán. Te tu ní nácuni ña jeē maá yá cúu. 15 Te ni cahān yā jiín ña:

¿Najehē ndahyú rō? ¿Ndé ɨɨn nánducú ró? achí yá.

Te máá ña jéni ni ña jeē tée ndíto huerto cúu ya. Te ni cahān ña jíín yá:

Núu máá ní ni quenehen ní yá, te cachi ní ndé nuū ni jéchune ní yá, te na quínuquihin ná yá, achí ña.

16 Te ni cahān Jesús jiín ña:

María, achí yá.

Te jeē ni cáhān yā súcuan, te ni nacuni ña ya, te ni ndió cóto ña, te ni cahān ña jíín yuhu hebreo:

Raboni, achí ña. Te jnūhun un cúní cahān, Maestro.

17 Te ni cahān Jesús jiín ña:

Ma quehé ró rúhū, chi ná tu ndaa ri quinuhun rī nuū Tatá rī. Te cuáhán núū tācá hermano rī, tēe ni cascuáha jíín rí, te cachi rō nuū de jeē ndaa ri quinuhun rī nuū Tatá rī, jeē suni Tátá maá ró jijnáhan ró cúu. Te cúu ya Yaā Dios maá rí jiín Yaā Dios maá ró jijnáhan ró. Achí yá.

18 Yūcuán na te María ñuu Magdala un, cuáhān ña, te ni castūhún ña nuū tée cáscuáha un jéē ní jito ña nuū maá Jítoho yō jiín jéē ni cáhān yā jnūhun yáha jíín ña.

Ndeyɨ́ sɨ́ɨ̄ coo ni rō jijnáhan ró, áchí yá.

20 Te ná ni cahān yā súcuan, te ni steén yā ndaha ya jiín xiin ya nuū de. Te ni cacusɨɨ̄ ni tēe cáscuáha un jéē ní cajito de nuū maá Jítoho yō. 21 Yūcuán na te ni cahān tucu Jesús:

Ndeyɨ́ sɨ́ɨ̄ coo ni rō jijnáhan ró. Te nájnūhun ni tají Tátá rī ruhū ini ñayɨ̄vɨ́, suni súcuan tájí rí rohó nacani ró jnúhun ri nuū ñáyuu. Achí yá.

22 Yūcuán na te ni tɨ̄vɨ tachī yā nuū de jíjnáhan de. Te ni cahān yā:

Vijna te ni canihīn rō Espíritu Santo. 23 Te tāca ñáyuu jeē cone cáhnu ni rō nuū cuéchi i, núu súcuan te coo jnūhun cáhnu ni nuū cuéchi i. Te núu tú cone cáhnu ni rō nuū cuéchi i, te ma cóo jnūhun cáhnu ni nuū cuéchi i. Achí yá.

24 Te Tomás, tēe ni cacu cuátí, ɨɨn jnáhan jeē uxí uū tēe cáscuáha jíín yá, tu ní íne de quɨvɨ̄ jeē ní nane Jesús nuū tāca gá tēe cáscuáha. 25 Yūcuán na te sava ga tēe cáscuáha un, ní cacahān de jíín Tomás:

Ni cajito ri nuū maá Jítoho yō.

Te ni cahān Tomás:

Núu tú coto ri nuū ni túji ndaha ya ni sáha ndūyu cāa, te núu tú chune ri xinī ndáha ri nuū ni íne ndūyu cāa, te núu tú chune ri ndaha ri xiin ya, te ma candíje cuɨtɨ rī, achí de.

26 Te nuū uná quɨvɨ̄, te tēe cáscuáha un cáhīin tútú tucu de ini ɨɨn vehe. Te íne Tomás jiín de. Yūcuán na te ni quee‑ni tucu Jesús, ni jecuɨñɨ̄ yā mēhñú de, vēsú cándihyū yehyɨ́. Te ni cahān yā jiín de:

Ndeyɨ́ sɨ́ɨ̄ coo ni rō jijnáhan ró.

27 Te ni cahān‑ni ya jiín Tomás:

Chune xinī ndáha ró ini ndaha ri yāhá te coto ró. Te scáá ndaha ró, te chune ró xiin ri nuū ni tújī. Te ma cáni sɨquɨ́ gá ni rō, chi sa suhva na cándíje ró.

28 Yūcuán na te ni cahān Tomás jiín yá:

Aī, Jitoho maá ná jiín Yaā Dios maá ná cúu ní, áchí de.

29 Te ni cahān Jesús jiín de:

Tomás, nde ni jito ró núū rī, te ni candíje ró. Te yōhyo ndetū tāca ñáyuu jeē candíje ruhū vēsú tu ní jíto i nuū rī, achí yá.

30 Te suni ni sáha Jesús cuehē gā jniñu jéhnu jeē ni stéén yā poder yā nuū tée cáscuáha jíín yá, jeē tu yósó núū tútu yáha. 31 Te tācá jniñu yáha ní tee ri návāha candíje ró jijnáhan ró jéē Jesús cúu Cristo, maá Séhe Yaā Dios. Chi jeē candíje ró yá, te cotecu rō nɨɨ́ cáni sáha ya.