1 Mwalongu bangu nga ndaba jukunhandaki mwanganya malobi kupete kipindi nu nsimu wa majambu haga pagiipitila. 2 Ndaba mwabe mmanya lisoba laka Bambu liika ngati mwii hejuhika ikilu. 3 Bandu pabibia apwaga, “Lubii lukwali na kila sindu kibi sapi,” ndi ling'ai helanhabukia muda gogo! Majambu ge haga giipitila pee ngati lipyanda lukubeleka hegumpiti mmbomba jojubeleka, wala bandu nga biiwesi kugujepa. 4 Lakini mwaalongu bangu ngasemmbi kulwie, ni lisoba heli ngaselipalika kunhiki gapula ngati mwie. 5 Mwanganya mwaboka mwabandu montama pu unang'anu, mwabandu ba muhi. Twepani nga twabandu ba lwiye, wala nga twabandu bi ikilu. 6 Nala twiigone lugonu ngati bandu bangi, tutakiwa tukelukya nu kulilongo twabete. 7 Ndaba baagone, agone ikilu na baalobe, alobe ikilu. 8 Lakini twepani twabandu ba muhi tupalika kuba twabandu twetulilongosa twabeti. Nala tubia nukuhobale nu upali ngati ingobu jukulikenga pikigamba, nukuhobale kwitu kwa wokopu kubia ngati kopia jikisomasoma. 9 Ndaba Sapanga ngase jutuagula ili kutuhoa kwi inyela yaki, ila tuupata wokopu kupete Bambu witu Yesu Kilisitu, 10 jojwakuwa ndaba jitu, ili tutama pamu na jombi, tubia tuwi au twabomi. 11 Henu mpolisana mioju nu kujangatana mwabe kwa mwabe, ngati henhenga sajenu.

12 Mwalongu bangu tunndomba mwaatendila hisima bahenga lihengu kati jino, babundongosa nu kumbola kutama pamu na Kilisitu. 13 Mwapekia hisima ngolongu na kwaapala ndaba ji lihengu leahenga. Nkuba nu lukwali nkati jino.

14 Mwaalongu bitu tunndoba mwaakanakiya bandu baabi banga kupala kuhenga lihengu, mwaagangamalisa mioju bandu babii nu lujogopu, mwajangatia bandu banga na makili, mmbia monhinakali kwa bandu boti. 15 Nndingalia mundu jokapi jwaandepa jongi majambu mabaja kwa mabaja, ila nia jinu jibia kuhengiana majambu ga amboni muda goti na kwa ahenge majambu ga amboni bandu boti.

16 Ntogulia masoba goa, 17 mundoba Sapanga bila kukotoka, 18 munsengula kwa kila lijambu lelumpiti. Haga ndi gajugapala Sapanga mu kujongana kwinu na Kilisitu Yesu.

19 Mwampenga Loho jwa Sapi, 20 mwagulongama ulota kuhuma kwaka Sapanga. 21 Mpema kila sindu. Nzingatia sekibi sa amboni, 22 nu kujepa kila aina ubaja.

23 Sapanga mweni jojutupeke lukwali junnyambisa nu kunndenda mwanganya ngani yaani umundu winu woti na loho inu na mioju na nhyega yinu yanga ni kihakau sokapi kipindi su kuhika Bambu witu Yesu Kilisitu. 24 Sapanga jojunkema mwanganya jwiihenga hela ndaba jombi juhobaleka.

25 Mwaalongu bangu mutulobila na twepani kabee.

26 Mwaalamukiya alongu boti kupete nginyuli ju upali nkolongu.

27 Nundagalaki kupete lihina laka Bambu mwaasomila alongu bitu boti babunhobale Kilisitu balua jenze.

28 Tunndobe wa amboni waka Bambu witu Yesu Kilisitu.

<- 1 Atesaloniki 4