1 Yusufu ahorwaa wa Farawoo unvaha ihapari eeraka: Apaapa na asunnaka ahowa. Ankhuma uKanaa ni ikhontwaa caya, imope caya ni mihakhu cothene cirinaya. Nna ari uKoseni. 2 Wahoolo ahaathanla asunnawe athanu ni ahonthoonyihera Farawoo.

3 Farawoo ahaakoha: Nnovara ntekoni? Ayo yahomwaakhulaca: Karumeya aa ari ahakheli onama toko amuci ihu okhalayi. 4 Yahomwiirelaca tho: Naawile ukhala mu ukati vakani kontha itala uKanaa nwo inaatepa, ni inama ca karumeya aa khacinoona yoolya. Sontte, watthunihere karumeya aa ukhala uKoseni.

5 Vano Farawoo ahomwiirela Yusufu: Athumwana na asunnaa yowenle we 6 ni ilapo yo Wiciipitu iri ni we. Upanke mananna ooreera, wiira athumwanaa na asunnaa akhale mapuro omaana. Waahiye akhale uKoseni. Woona wiira akina ayo ari atthu ankhili, waavahe nteko woohakhela inama caka.

7 Vano Yusufu ahaakusa athumwane mpaka wa Farawoo, ni Yakopi ahonreeriha Farawoo. 8 Farawoo ahonkoha Yakopi eeraka: Urina myakha mikavi? 9 Yakopi ahomwaakhula Farawoo eeraka: Myaaka caka co weettakaca ciri iminya wo talathini (130). Ciri vakani ni coorika, ni khacimphiya toko cakhalaya mayapaapa. 10 Vano Yakopi ahonreeriha Farawoo ni ahorwaa.

11 Yusufu aheesa ni waavaha athumwane ni asunnawe mapuro oocayira olapo yo Wiciipitu, nttetthe wo uRamacese, toko calamunlyawe Farawoo. 12 Ahaavaha yoolya yo watosa, ukhuma athumwane, asunnawe ni amucyawe othene mpaka asaana yarinawe khula ntthu.

13 Khayaariwo yoolya ilapo yothene kontha itala yanatepa, ukhuma Wiciipitu mpaka uKanaa wanaakhwiya nlattu wotala. 14 Yusufu ahototokaniha ncurukhu wothene waari Wiciipitu mpaka uKanaa wathumeliye itiriku ni ahorwana waFarawoo. 15 Waamanlyaya ncurukhu wothene Wiciipitu mpaka uKanaa, annaciipitu yahorwaa unlepela Yusufu yiiraka: Univahe yoolya! Uhinihiye nikhwaaka itala nlattu woomala ncurukhu ihu.

16 Yusufu aheerela, paahi mmwihe inama cinyu nnyo mwaakakhanihe ni itiriku, kamana ncurukhu inyu uyo uhomala. 17 Yusufu ahowiiheriya inama nnyo ni ule ahaavaha itiriku akakhanihaka ni ikhavalu, ikhontwaa, imope ni apuuru. Mwakha wothene ahaaliha annaciipitu yakakhanihaka yoolya ni inama.

18 Mwakha oyo wahovira ni wawilyaya mwakha nkina, yahoturuwela tho wa Yusufu yiiraka: Khaninoona tho mananna oowiipitha we kontha ncurukhu ihu uyo uhomala ni inama cihu nnyo cihokhala cawaa, khiiwo tho inihalenle uvaha cihikhanle irutthu cihu ni imatta cihu. 19 Uhinihiye nikhwaaka ni ukhwelakhwela imatta cihu wa miithoni waa, unithume hi ni uthume imatta cihu nnyo wakakhanihaka ni itiriku, vano hi ni imatta cihu nnyo, ninakhala ipottha ca Farawoo. Univahe yoolya wiira nikhale akumi, nihikhwe itala ni ciicammo imatta cihu cihihononyee.

20 Commo Yusufu ahothuma imatta cothene co Wiciipitu anthumelaka Farawoo. Annaciipitu yahothumiha imatta caya cothene kontha itala pheerihile commo. Phimaana ilapo yothene yahokhala ya Farawoo. 21 Ukhuma wariyari mpaka mmaceresere mothene molapo yo Wiciipitu, Yusufu ahaapanka ipottha atthu othene.

22 Cahanle coohithuminya caari paahi imatta ca ahooleli osataka kontha Farawoo aholamula uvahiya coolya, cennyo phaapisiha nrima phimaana ahithumihaka imatta caya.

23 Vano Yusufu aheerela atthu ale: Nviriyane. Ilelo kihoothumani nyu ni imatta cinyu nnyo, nna vaa nri a Farawoo, ipyo phi ila, nlimeke ni waala ittima nnyo. 24 Nanso nhaana munvahaka Farawoo mphantte woneethanu wo coolya cinhalenyu wuurula. Mphantte woneecese uyo unhala ukhala wawinyu wiira mpanke ipyo ni yoolya yawinyu ni ya asaana enyu ni atthu othene ankhala uwaannyu nwo. 25 Ale yahomwiirelaca: Nkunya, we uhoopola ukumi ihu kamana uhonipanka nnema ninakhala ipottha ca Farawoo.

26 Toko coo, itthaya yothene yo Wiciipitu, Yusufu ahokumiha nlamulo niriwo mpaka ilelo. Mphantte wonethanu wo coolya unkhala wa Farawoo, nanso imatta ca ahooleli osataka khacinkhala ca Farawoo.

27 Annasirayeli yahokhala Wiciipitu, ncoko wo uKoseni. Wonwo yahophwanya imatta cinci ni yahoyaranaca ni wuncereranyaa venci. 28 Yakopi ahokhala myakha khumi na saapa Wiciipitu ni myakha cookumi awe cari iminya wa arupayini na saapa (147). 29 Wonnyawe wiira uhaattamerya ukati wookhwa, Isirayeli ahomwiihana mwamwanawe ni ahomwiirela: Wakhala wiira unakifenta, ukivare mweetto ni ulupele wiira unaahala ukhala eekhweeli ni mi. Vano kinwiirela uhikivithe mWiciipitu mu. 30 Kakhwaka vale, uhikivithe mWiciipitu mu nanso ukirwaane mahiye avithiye mayapaapa uKanaa. Yusufu ahaakhula: Kinkopanka toko cinkilepelenyu. 31 Vano Isirayeli ahonkhanyereriha eeraka: Ulupele. Yusufu aholupela ni Isirayeli aheecatalela wankorini.

<- Mphattuwelo 46Mphattuwelo 48 ->