1 Isirayeli ahokhuma ni citthu cothene carinawe. Uphiya wawe uPeresepa, ahovaha citthu anlapelaka Nluku a Isaki, athumwane. 2 Ni Nluku ahomuulumana Isirayeli uhiyu nnyoonini eeraka: Yakopi, Yakopi! Uyo ahaakhula eeraka: Kiri va. 3 Nluku aheera: Mi kiri Nluku, Nluku a athumwana. Uhoove urwaa Wiciipitu, kontha wonwo kinkowupanka nloko nuulupale. 4 Mi kinaahala urwaa Wiciipitu wamoca ni we, ni khweeli kinaahala wuuhokolosa. Ni ntata na Yusufu ninaahala uputthaputtha miitho aa. 5 Vaavale Yakopi ahokhuma uPeresepa. Asaana a Isirayeli yahaakusaca athumwanaya, asaanaya ni asaaraya mwampakhira yakumihilyawe Farawoo. 6 Ciicammo yakokusa inama caya ni mihakhu cothene caphwannyilyaya uKanaa. Commo Yakopi ahorwaa Wiciipitu ni ucuulu awe wothene. 7 Ahaakusa Wiciipitu asaanawe, ucuulu awe, asaanawe asithiyana na asiculawe asithiyana, manaaya wiira, nloko nawe nothene.

8 Ala phi macina a atthu o nloko na Yakopi yarwele Wiciipitu: Rupeni, ntthaara na Yakopi. 9 Ala phaari assana a Rupeni: Enoki, Palu, Esiroomi ni Karimu. 10 Ala pha asaana a Simeyoni: Yemuweli, Yamini, Owati, Yakimi, Sowari ni Sawulu, mwana a nthiyana nKanaa. 11 Ala phaari asaana a Levi: Kerisoni, Kowate ni Merari. 12 Ala phaari asaana a Yutta: Eri, Onani, Selaa, Peresi ni Seraa. Eri ni Onani yakhwile ilapo yo Kanaa. Ala phaari asaana a Peresi: Esiromi ni Hamuli. 13 Ala phaari asaana a Isakaari: Tolaa, Puwaa, Yaasupe ni Sinromi. 14 Ala phaari asaana a Sepuloni: Serete, Eloni ni Yaleeli. 15 Ala phaari asaana yayanryawe Leya ni Yakopi uPatani-Aramu, unhiya mwanawe Tina. Ucuulu awe wothene waari talathini na araru (33). 16 Ala phaari asaana a Kaate: Sefomi, Haaci, Suuni, Esipomi, Eri, Aroti ni Areli. 17 Ala phaari asaana a Aseri: Imina, Isivaa, Isivii ni Periyasi, ni mwanrokoraya Sera. Ala phaari asaana a Periya: Heperi ni Malekiyeli. 18 Ala pha asaana khuumi na siita yayanryawe Yakopi ni Siilipa, ipottha ya Lapanu, anvahaka mwanawe Leeya. 19 Ala phaari asaana a Rakeli, amwaara a Yakopi: Yusufu ni Pencamii. 20 Asenate, mwana a Potifera, nhooleli osataka yo Oni, ahommaha asaana eeli Yusufu Wiciipitu: Manasesi ni Farayimi. 21 Ala phaari asaana a Pencamii: Pelaa, Pekeri, Asipeli, Sera, Namani, Eyi, Rosi, Mupimi, Hupimi ni Aarite. 22 Ala phaari asaana a Rakeli ayanryawe ni Yakopi othene yaari khumi na cese. 23 Mwana a Tani aari Husimi. 24 Ala phaari asaana a Nafitali: Yaseeli, Kuni, Yeseri ni Silemi. 25 Ala phaari atthu saapa onrukulu na Piila, ipottha ya Lapanu aamahilyawe mwanawe Rakeli, ayanryawe ni Yakopi ahomwiihana Yakopi. 26 Othene yarwele Wiciipitu ni Yakopi, ucuulu awe wothene woohalikelela asaara asaanawe, yaari sitiini na siita atthwene. 27 Woncerera asaana eeli a Yusufu yayanryawe Wiciipitu, nloko na Yakopi naarwele Wiciipitu nahophiya Sapiini (70).

28 Vano, Yakopi ahonhooliha Yutta wa Yusufu, wiira acuwele maphiyero o Koseni. Uphiya waya nwo, 29 Yusufu, na ampakhira awe oolikana, ahorwaa uKoseni wiira aakumanane athumwane. Vano woona wawe, aheekamela ni waakapatta, vano nakapattilene, ahoonla ukati mwinci.

30 Isirayeli ahomwiirela Yusufu: Nna miva pooti ukhwa, kontha kihoona ikhove aa ni kihocuwela wiira ninlelo we uri nkumi. 31 Vano Yusufu aheerela asunnawe na amuci aya othene athumwane: Kinarwa unhimerya Farawoo wiira asunnaka na amuci aya apaapa yakhala uKanaa ahowa woono. 32 Kinkowiira, alopwana ayo ahakheli, anhakhela inama ni ahowana ikhontwaa caya, imope caya ni cothene ciri cawaya. 33 Farawoo awiihanakani ookohakani wiira: Nnovarani va? 34 Mmwaakhuleke coo: Arumeyi aa anhuwa inama ikhumelo ni nari acikani, toko capankaya amuci ihu okhalayi. Commo phinhalenyu utthuniheriya ukhala nttetthe wo Koseni, kontha ahakheli othene anathanyiya na annaciipitu.

<- Mphattuwelo 45Mphattuwelo 47 ->