1 Vano Asaara yahokhala myakha iminya wo siriini na saapa (127) ceyarelo, 2 ni yahokhwa anari uKiriati-Arapaa uneehaninya Eforoni, ilapo yo Kanaa. Aparahamu aheekhupanya ni wonlela Asaara. 3 Ni Aparahamu ahiyaka mayithi awe ahonwa arwaaka wa asaana a Heti ni aheerela: 4 Mi ki nletto, ni mweettakaci. Kinaalepela nipuro noopanka mahiye wiira kivithe mayithi aka. 5 Vano asaana a Heti yahomwaakhula Aparahamu yiiraka: 6 Univiriyane muulupale, nhooleli a Nluku uri ni hi. Waavithe amwaaraa ayo mahiye anhalaa utthuna. Khaawo nohala wuuthuwa mahiye wiira waavithe amwaaraa.

7 Vaavale, Aparahamu ahonwa ni ahooromela vathi wamiithoni wasineene ilapo, asaana a Heti. 8 Ule aheera: Wakhala wiira nhokitthunihera wavitha amwaaraka mu, nkiviriyane. Mwakulumele Eforoni, mwana a Sowari, 9 wiira akivahe nikhuku no Makipela niri umaverihela imatta awe iyo, ni akihimerye ihisapu enoncivela wiira akhale mahiye aka.

10 Vano Eforoni onkomile wamoca na asaana a Heti, ni Eforoni, nHitita, ahomwaakhula Aparahamu, yiiwaka asaana a Heti ni atthu othene yaari wa nkhora woparasa eeraka: 11 Mena, muulupale, ukiviriyane. Imatta iyo kinawuvaha, ciicammo nikhuku niri mmattani ni kinawuvaha wa miithoni wa amucyaka, uvitthe mayithi aa ayo.

12 Vaavale Aparahamu ahooromela wiitho waya asineene ilapo. 13 Ni ahomwiirela Heporoni yiiwaka atthu othene: Ukiiwe, wakhala wiira unakupali ukihimerye ihisapu yomatta iyo mi kinawuliva, wakhelele ncurukhu aka uyo wiira kivithe mayithi aka.

14 Vano Eforoni ahomwaakhula Aparahamu eeraka: 15 Ukiiwe muulupale aka: Imatta iyo ncurukhu aya uri iminya cese wopheeta. Isiyani vava vaa we ni mi? Uvithe mayithi aa ayo. 16 Aparahamu ahokupali ihisapu ile ni ahokumiha ncurukhu nuunliva Eforoni wahimyacilyawe yiiwaka asaana othene a Heti, ncurukhu iminya cese wopheeta wathumeliya itthu nnakosoni.

17 Phimaana nthala na Efromi naari uMakipela uhoolo waya uManre; ukhuma nthala nno, nikhuku naari munthalani mmo, ni miri cari munthalani mmo ni nnyo cari nceresere nnyo, 18 cahokhala ca Aparahamu maana ahothuma yoonaka asaana othene a Heti naale yari wa nkhora woparasa.

19 Wahoolo Aparahamu ahaavitha amwarawe yeehaninya Asaara nnikhukuni niri imatta yo Makipela uhoolo waya uManre uneehaninya Eforoni, ilapo yo Kanaa. 20 Phimaana imatta iyo ni nikhuku nari mmattani mmo yahokhala mahiye Aparahamu kontha anotumiheriya na asaana a Heti.

<- Mphattuwelo 22Mphattuwelo 24 ->