1 Mwaneene Nluku ari ooloka ni Asaara, toko camwiirenlyawe, ni ahompanka toko cankhuluvelihilyawe. 2 Ukati wacilyawe Nluku, Asaara ahonnyara mwana ni ahommaha Aparahamu nooluvanle. 3 Mwana annyarannyawe Asaara, Aparahamu ahommaha ncina na Isaki. 4 Isaki wapiihenryawe mahuku mathanu na mararu ookumi, Aparahamu ahomuuliha icaantto, toko calamuleliyawe ni Nluku. 5 Ukati wannyanryawe Isaki, Aparahamu ahaana myakha iminya (100). 6 Asaara aheera: Nluku hokiteeha, ni othene anhala ucuwela ila itthu ila anaahala uthyaa ni mi wamoca. 7 Ni ahopwaherera eeraka: Aacuwela tipani wiira Asaara anhala umwaamwiha mwana? Mothene mmo, mi kihommaha mwana Aparahamu nooluvanle.

8 Isaki ahonnuwa ni ahohiihiya nipele. Ni nenno nihuku nno Aparahamu ahopanka isukuhuulu. 9 Woonnyaya Asaara wiira mwana a Akaari, munnaciipitu, annanveha Isaki, 10 yahomwiirela Aparahamu: Umoomole Akaari ni mwanawe uyo, kontha mwanaka mi khanhala ukhala nkelanupa wamoca ni ula mwana ula. 11 Iyo yahoncukuliha venci Aparahamu kontha ahokela mpwiini mmo mwanawe. 12 Nanso Nluku ahomwiirela Aparahamu: Uhicukulace nlattu wo mwana ni wopottha. Upanke yothene inhalaya uhimya Asaara, kontha nhina mwa Isaki phinhalaya ulemelihiya amucyaa ayo. 13 Nanso, ciicammo nhina wa mwana eepottha unakhala uneethi, kontha ni uyo ri mwanaa.

14 Wasilyaya wicisuru, Aparahamu ahokusa mikatthe ni nipinka no maasi oocareene, phunvahaka Akaari wiira akuse wanikhatani wawe ni ahonleeha wamoca ni mwanawe ule. Uyo ahottotta nttala, phurwaaka arukureryacaka itakhwa yo Peresepa.

15 Wamanlyaya maasi nnipinkani mmwe, ahonhiya mwanawe waniphumpuluni 16 ni ahonkoma vakhiviru wene, mattalivelo aya yaari toko wanvelavelaya muupa wovonyinya ni muura, kontha eera: Akintthuna umoona mwanaka akhwaka. Ni nonkomilene vaavale, ahopacera wunla.

17 Nluku aheewa wunla wo mwana, ni ncelo a Nluku o wirimu, ahomwiihana Akaari ni ahomwiirela: Unocukulani, Akaari? Uhoove, kontha Nluku heewa wunla wa mwanaa nwo nipuro nimweesilyaa nno. 18 Unkuse mwanaa uyo, kontha nhina mwa yooyo kimmopanka uneethi mwinci.

19 Vano Nluku ahontthukula wiitho Akaari ni ahoona iluusi. Ahorwaa mpaka nenne nipuro nne, ahocariha maasi nnipinkani mmwe nuunvaha mwanawe wiira awurye. 20 Nluku ari ni mwana uyo. Uyo ahonnuwa, ahokhala ntakhwani ni ahokhala mayolupattha ni muura. 21 Aakhala itakhwa yo Paraa, ni anumwane yahomphavelela nthiyana olapo yo Wiciipitu.

22 Yoole ukati ule, Apimeleke naveleeliyene ni Fikoli, nhooleli aanakhotto awe, ahomwiirela Aparahamu: Nluku ri ni we ni citthu cothene cimpankaa. 23 Vano, ukilupelele, wamiithoni wa Nluku, wiira khunkithepya tho, ukhuma mi mpaka asaanaka nu ucuulu aka wothene. Ulokihe ilapo iwakhelenle unari nletto ni malokelo yupakilyaka. 24 Aparahamu ahaakhula eeraka: mi Kiholupela.

25 Nanso Aparahamu ahonkuphula Apimeleke nlattu woluusi yakhiyaya ipottha cawe ni nkhitto. 26 Nanso Apimeleke ahomwaakhula: Akinoncuwela pankile iyo itthu iyo. Khunakihimerya itthu, ilelo va phincuwelaka.

27 Paahi, Aparahamu ahowiha ikhontwaa ni imope, phimmahaka Apimeleke ni othene yaholehana itthu imoca. 28 Aparahamu ahothanlela nipuro naya ikhontwaa saapa. 29 Apimeleke ahonkoha eeraka: Inthoonyera isiyani ikhontwaa saapa cikumihilyaa munhuwoni mmo? 30 Uyo ahaakhula: Utthune ikhontwaa cinoovahaaka nnya, toko usaahiti wocuwanyaa wiira thi mi kithipile ilusi ila.

31 Phimaana nne nipuro nne nihaaninyaka uPeresepa, kontha oyeeli wonwo phaatanacilyaya. 32 Anaatanacilene uPeresepa, Apimeleke ni Fikoli, nhooleli anakhotto awe, yahohokoleela ilapo yo mafilistiya. 33 Aparahamu arwaaka ahomphattyaa wepa uPerisepa ni vaavale aholapela ncina na Mwaneene Nluku Oohimala. 34 Ni Aparahamu ahokhala ukati mwinci ilapo yo mafilistiya.

<- Mphattuwelo 20Mphattuwelo 22 ->