4 Ahinaya urwaca wurupani, alopwana othene o miphantte cothene co Sotoma, ukhuma acikani ni oolupale yahovirelaca inupa eyo. 5 Ni yahomwiihanaca Loti amwiirelaka: Ari vayi alopwana awacile wapuwani waa ayo ula uhiyu ula? Uniwiihere vate va nimphavela waarupana. 6 Loti ahokhuma mpani mmo, ni ahotthyaa nkhora uyo nttuli nttuli, 7 ni aheerelaca: Mena asimpwanaka! Nhipankace itthu yoonanara! 8 Moonace, kihaana asaana eeli asithiyana asimwarusi. Kinawawana wiira nyu mwapankace itthu imphavelenyu. Nanso ala asilopwana ala nhaapankace itthu, kontha ari mmatatani mwaka ni ankhikicera ipuwa aka. 9 Yahokhuwelaca yiiraka: Ukhume va! Ni yaheeraca tho: Ula nlopwana ula ri nletto, vano nophavela ukhala mayoohukhumu! Ninkowupanka we itthu yootepa wavikana ayo. Vano yahonkakhaca Loti wonkhitto ni yahorwaca uhoolo wiira yaakace nkhora. 10 Commo, aletto eeli ale yahonvaraca Loti nuumpurulela mpani ni yahotthyaca nkhora oyo. 11 Vano yaharakalihaca ni iretta yohoona alopwana yari wankhora wonupa ayo, ukhuma acikani mpaka asuulupale ayo, mpaka wahinooryaya uphwanya nkhora.
15 Ukhuma waya ncuwa, ancelo ale yahonkhanyererihaca Loti yiiraka: Wakuve! Wakuse amwaaraa na asaanaa eeli, atthuna ni nyu nnaahala ukhwaca wanhalaya uttarusiya iparasa eyo. 16 Amananihaka ukhotta, asilopwana ale yahommaraca moono oyo, wamoca na amwaarawe na asaanawe, ni yahaakumihaca nipuro nno wokuru ni yahohiyaciya uta waya iparasa, kontha Mwaneene Nluku ahoonelaca ikiriri. 17 Ukumihiya waya mparasa mmo, ncelo mmoca ahomwiirela Loti: Ntthawe mwanlattu wofenta ukumi! Uhiwehe uttuli wala uheemele nipuro nnikuwani! Utthawele umyakoni, atthuna we unaahala wiiviya!
18 Wahoolo Loti aheerelaca: Mena, Pwiya aka! 19 Karumeyi inyu hokhala uwoopwa mwanlattu wokiriri cinyu, kontha nyu nhokoonela ikiriri nrattavelelaka ukumi aka. Akinoorya utthawela mpaka umwakoni, wiira yowerya ila ihikiphwanye ni mi kikhwaaka. 20 Vakhiviru va ihaawo iparasa yankani. Iri vakhiviru cinenne wahoreera utthawa mpaka uphiya wonwo. Nkihiye kirwee wonwo! Hata ikhale yankani cinenne, kinkokhala uwoopwene. 21 Ule ahaakhula: Wahoreera. Mi kinaahala wukavihera yeeyo ivekenlyaa eyo. Akinhala ukwanyula iparasa inhimilya eyo. 22 Wakuve utthawe. Akinhala upanka itthu we uhinaya uphiya wonwo. Phimaana iparasa iyo yiihaniyaka Sowari, manaaya ikani.
23 Loti, uphiya wawe uSowari, ncuwa nahokhuma mwilaponi mmo. 24 Vano Mwaneene Nluku ahokurusela ilapo yo Sotoma nuKomora mooro wowopiha wookhuma wirimu. 25 Commo yahokwanyula nye iparasa nye ni nikuwa nothene, wamoca na atthu yakhalaca ayo ni imatta caya nyo. 26 Nanso amwaarawe Loti yahoweha uttuli ni yahothatuwa iruwa yo maakha.
27 Wasilyaya, Aparahamu ahonwa ni ahoturuwela nipuro namoonananyawe Mwaneene Nluku. 28 Ni ahoweha uSotoma nuKomora, nu nikuwani nothene, ni ahoona mwiisi mwinci uwelaka ukhuma vathi, toko mwiisi wo nttukutthani.
29 Ukati wakwanyunlyawe iparasa ciri unikuwani, Nluku ahomuupuwela Aparahamu ni ahonkumiha Loti mmasakhani wokwanyuliya iparasa cakhalawe.
31 Nihuku nimoca, mwana mwanthiyana omuulupale, ahomwiirela omwankani uyo: Apaapehu ahooluvala, ni khaawo nlopwana vakhiviru unithela toko ilemalelo yolapo yothene. 32 Nrwee naavahe nipha apaapehu ni wahoolo va nathukumananeke wiira nloko nihu nihikhwelakhwele. 33 Yoole uhiyu ule yahaavahaca nipha apaapaya. Vano mwana mwanthiyana oomuulupale uyo ahokela ni ahaathukumanana athumwane. Ni ale khayaacuwelenle ukati warupilyawe ni wonwilyawe. 34 Usa waya, mwana mwanthiyana omuulupale uyo ahomwiirela omwankani uyo wiira: Uhiyu kihaathukumanana apaapa. Nrwee naavahe tho nipha ula uhiyu ula, ni we unaahala waathukumanana, wiira nihikhwelakhwele nloko na apaapehu. 35 Vano tho yahaavahaca nipha athumwanaya yoole uhiyu ule, ni mwana mwanthiyana omwankani uyo ahorwaa wathukumanana. Ni ayo khayaacuwelenle ukati warupawe ni wonwilyawe. 36 Commo, asaana oyeeli a Loti yahorupalihaciya na athumwanaya.
37 Omuulupale uyo ahonnyara mwana, ni ahommaha ncina na Mwape. Yooyo phiri athumwane Amwape oleelo. 38 Omwankani uyo ciicammo ahonnyara mwana, ni ahommaha ncina na Pin-Amii. Ula phiri athumwane atthu Amonii oleelo.
<- Mphattuwelo 18Mphattuwelo 20 ->