1 Nihuku nimoca ukati woothana Mwaneene Nluku ahonkhumelela Aparahamu nonkomile wankhora wo heema ankhuruttunlyawe mmitthucini co mooko co Manree. 2 Aparahamu ahowusa miittho awe ni ahoona alopwana araru anamwemeleenle vakhiviru. Woona wawe ahonwa wankhora wonkomilyawe ni wowakuvyaca wene aheekamela ni ahooromela mpaka vathi. 3 Aheera: Pwiya, wakhala wiira wanakiphwanela, nhipwahe wakarumeya enyu, woheemela. 4 Kinaruma wiira awaaniye maasi wiira nrapihe inyaa cinyu ni mmumule vathi mwiri ula. 5 Kinawuwiiherani yoolya wiira mphwanye ikuru, wahoolo nnapwahaka ukhala wiira nhophiya wakarumeya enyu. Ale yahaakhulaca: Aye, upanke toko cuulumacilyaa.

6 Wowakuvyaca wene, Aparahamu ahokela nheemani ni aheerela Asaara wiira ahaawule iphepa yotteela ya atthu araru, ni anyatte ni apanke mikatthe. 7 Wahoolo ahorwaa muncicini ni ahonthanla mwaamope omaana, ahonvaha ipottha awe wiira antthenkace wowakuvyaca. 8 Ahowana nhuci wookikitthiya, ileeti ni ipilipica conama catthenkaciye ni ahaavahaca. Alyacaka ono, yaheemelelaca wantthucini.

9 Vano yahonkohaca: Amwaara Asaara ayo, ari vayi? Ule ahaakhula: Ari nheemani mwe. 10 Vano nlopwana mmoca aheera: Kinawuphwanya tho mwaahiyu ni amwaaraa Asaara kinhala waaphwanya ni mwana. Asaara yeera yiiwaka moolumo ayo nari wiithela nkhora wo heema.

11 Aparahamu ni Asaara yahooluvalaca venci ni Asaara wahaanvirela ukati wooyara. 12 Phimaana yahothyaa veekhawe yupuwelaka wiira, kinooluvanlene wanaahala ukitteeliha tho nrima?

13 Nanso Mwaneene Nluku ahomwiirela Aparahamu: Asaara ayo anthyani yiiraka: Khweeli kinaahala uyara mi kinooluvanlene? 14 Ihaawo itthu inolwanawe Mwaneene Nluku? Kinawuphwanya tho mwaahiyu yoola ukati ula ni Asaara kinhala waphwanya anayanre. 15 Vano Asaara yahoova phimaana yahoruna yiiraka: Mi akithyele. Ule aheerela: Nhirune, nhothyaa nyu.

16 Vano alopwana ale warwaya yahoona uhitto nwo ilapo yo Sotoma. Aparahamu ahaaveleela ni waleeha. 17 Vaavale Mwaneene Nluku aheera: Kinanvithela Aparahamu itthu inhalaka upanka, 18 ukhala wiira Aparahamu nohala ukhala athumwanaya ilapo yuulupale ni yokuru, ni mwanlattu wo yooyo ilapo cothene cinareerihiya. 19 Kontha mi kihonthanla wiira aahimerye asaanawe ayo ni ucuulu awe uyo wiira yiisunke mphironi mwa Mwaneene Nluku, apaankaka coosariya ni ceekhweeli wiira Mwaneene Nluku anvahe Aparahamu citthu cinkhuluvelihilyawe.

20 Mwaneene Nluku aheera tho: Cinriyeleliyaya a Sotoma ni a Komora ciri ciinci ni itaampi caya nnyo cihotepa. 21 Kinakhuruwela wonwo koone wakhala wiira cinhiminya nnyo ciri ceekhweeli, cakhala cowoothiya kacuwele.

22 Vano alopwana ale yahokhumaca arwaka uSotoma nanso Aparahamu ahohala ninlelo ni Mwaneene Nluku. 23 Aparahamu ahaattamerya ni aheerela: Unantankanyaa nasariya wamoca ni nkaafiri? 24 Kaahiki yakhalaka anasariya hansiini mparasa mmo nanlelo nnatankanyaa ni khannohala unemecera nipuro nno mwanlattu wo wafenta anasariya hansiini ariwo ayo? 25 Yukhaleni uttayi upanka yeeyo itthu iyo, umwiiva nasariya wamoca ni nkaafiri toko wiira oyeeli ayo analikana, yukhaleki uttayi! Khanhala wuuluma wosariya hukhumu olapo yothene?

26 Mwaneene Nluku ahaakhula: Mi kaaphwanyaka anasariya hansiini uSotoma nwo, mwanlattu wo wafenta yaayo, kinaahala unemecera iparasa eyo yothene.

27 Aparahamu ahaakulela tho: Kihocuwela wiira kihoocurweelani uwuulumanani Pwiya, mi kinari ntthupi ni ittura. 28 Nanlelo kinakoha: Kaahiki yahalaka athanu wiira aphiyere anasariya hansiini? Nnatankanyaa iparasa eyo mwanlattu wo yaayo athanu ayo? Ayo yahaakhula: Kaaphwanyaka nwo arupayini nathanu akintankanya.

29 Ahaakhanyereriha Aparahamu: Kaahiki mwaphwanyaka arupayini paahi? Ayo yahomwaakhula: Mwanlattu wowafenta atthu arupayini ayo, akintankanya.

30 Vano ule ahopwaherera: Nhiviruwe Pwiya, nkilevele kuulume. Kaahiki mwaphwanyaka talathini pahi? Mwaneene Nluku ahomwaakhula: Kaaphwanyaka talathini akintankanya.

31 Aparahamu aheera tho: Kihocuwela wiira kihoocurweelani uwuulumanani Pwiya; kaahiki mwaphanyaka nwo siriini? Mwaneene Nluku ahaakhula: Mwanlattu wowafenta siriini ayo, akintankanya.

32 Vano Aparahamu aheera tho: Nhiviruwe Pwiya, nanso nkilevele wiira kuulume ikwaha imoca pahi. Kaahiki mwaphwanyaka khumi pahi? Mwaneene Nluku ahaakhula: Mwanlattu wo wafenta khumi ayo, akintankanya.

33 Namanleene umuulumana Aparahamu, Mwaneene Nluku ahokhuma ni Aparahamu ahoturuwela uwaani.

<- Mphattuwelo 17Mphattuwelo 19 ->