Phawuloosa Titos Xaafeez Kiita
Gelo
Tito Ayihude baaya, zin guyepp ammanii, Phawuloosa Wonggile kiita oosa oothittar zhame maaqqii eza maaddeez asii. Ye wode Tito, woosa keeth be7adayisinnee naagodayis Qarxeesa biitta atteeza. Yha kiitay hayidzii aafe qofita aykkiza.
1. Woosa keeth aqisiza asay, iita yess yez Qarxeesa asay lanqqayid ab garkk lo77o yess yezodayis beezizako Titona akaakisiza.
2. Woosa keeth gancce yez duma duma cugita, yeykka, cima asita, yelaga na7itannee ayllita wayizii tamaarssodayis beezizako Titona zoriza.
3. Ammaniza asay ammano yess baz, sarotitharannee siiqor yezod, woosa keeth ganccepp kachchii, palamannee phaliqqithii dhaboday garkk Titos zore inggiza.
Tito kitay aykkeez qofita
Gelo 1:1-4
Woosa keeth kaalithizitay bagga 1:5-16
Woosa keetha yez duma duma cugitay ooso 2:1-15
Zorennee naagiso 3:1-11
Kusitte qofa 3:12-15

1 Yesuus Kiristtoosa hawaarennee Xooss aylle maaqqeez, Phawuloosa, xaafeez dabddaabbe. Xoossii dooreez asay ammana dichchod garkkennee tuma ayyana yess wayizii yessadazako beeziza tuma eretithiko unttan kaalithodayis taanii kiitintteeza. 2 Ye ammanay medhina de7o ufayssal afa eqqeeza. Yeyi gaame wodepp tiina worddotoowa Xoossay nuus inggod gi qaala geleezaya. 3 Nuna ashshiza Xoossay fa wode hellin yha kiita ododay garkk taas hadara inggeeza.

4 Nuus koththe maaqqeez ammanayid taas tuma na7a maaqqeez Titos,

Xooss Adayppennee nuna ashshiza Yesuus Kiristtoosapp aadho keehetithay, maarotithaynnee sarotithay nees maaqqo.[a]

Tito Qarxeesa ootheez oosa

5 Taanii nena Qarxeesa ashsheezay, neenii atteez baz lo7ithod garkkennee taanii kiitteezay garkk katama ubbayid woosa keeth aqisizita doorod garkkesii. 6 Woosa keeth cima bornttooza, pettii machchat azin, yeda yessar woy kiitintto ixor asii boroowa ammaniza na7itay yez as maaqqodayis beeziza.[b] 7 Woosa keeth aqisizitay Xooss ooso hadara ekkeez gishos borinttooza, utirttooza, ellissii yilottooza, mathooza, oda koyoozannee beezoowa adas kukkurooza maaqqodayis beeziza. 8 Zini imath mokkizaya, lo77o baz ubba qadhdhizaya, akaakar yezaya, suure, geeshshinnee fana haarizaya maaqqodayis beeziza. 9 Tuma timirtte tamaarsora, zorerannee ye timirtta ixxizitayis mahith inggodayis fa tamaareez ammanthiza qaalayil miinggii eqqoo.

10 Kiitinttozitay, pathoowa oda odinttizitay, doshshizitay ubbarakka dookalintto woga naagiza gaame asitay yeza. 11 Unttii beezoowa oger miishe denggodayis koyii, beezoowa baz tamaarssittar kara as ubba buqqiz gishos u timirtta teqqodayis beeziza. 12 Unttapp pettay unttis nabe maaqqeezay, «Qarxeesa asay ubba wode worddo odinttizita; iita do7itannee azaalla nafisaamita»[c] yeegeeza. 13 Yha markkatithay tuma. Yeyi gishos, unttis tuma ammano yezoday garkk unttan kaccoytta. 14 Tuma ixxiza asay timirttannee Ayihuditay pathoowa tossa si7aamay garkk unttan miinthii seeroba. 15 Geeshshitayis ubba baz geeshshii, zin tunitayssinnee ammanozitayis u qofayinnee kahay tuneez gishos unttis abikka geeshshii baaya. 16 Unttii nu Xooss eriza giza, zin fa oosayir eza kaddiza. Unttii Xoossar ixintteezita, kiitinttoowazitannee lo77o ooso ubba oothodayis piilizita.

Tito 2 ->