Link to home pageLanguagesLink to all Bible versions on this site
3
Ayihuditay ammano ixo
1 Yeezin, Ayihudetithii ab maadee yenee? Woy dookalintto ab maadee yenee? 2 Tuma Ayihude maaqqithay gaame oger maaddiza. Ubbapp tiin Xoossay fa qaala hadara Ayihuditayis inggeeza.

3 Yeezin, unttapp pettay pettay qaala ammanaam ixxiko, u ixay Xooss geeshshetitha kayinenee? 4 Kayooya! As ubbay worddo maaqqikokka Xoossay tuma maaqqo. Geeshsha Maxaafayid,

«Neqaalayir ne xilloda;
nena mootizana pirddar laththoda»
ginttinttii xaafintteeza.[a]

5 Yeezin, nu worzhay Xoossay geeshsha maaqqizana beeziza baz maaqqiko, nu waagodee? Xoossay nu nagara gishos nuul afa pirddiko, luulo baasanee? Yhaya taanii as qofa garkk giza. 6 Yeya baaya. Yey garkk haniko, Xoossii yha alamayil afa wayizii pirddode?

7 Zin ta worddotithay Xooss tuma qoncisii, e bonchcha dammisii beeziza baz maaqqiko, yeezin, abis taal afa nagaranchcho garkk pirddinee? 8 Pettii pettii asay, «Lo77o baz ye ye7od garkk iita oothiza» yeegii tamaarssizay garkk udii tana mootiza. Yey garkk asal yi7iza Xooss pirdday beezizaya.

Xillo pettakka Baaya
9 Yeezin, nuunii waagodee? Nu aathonee? Yeya baaya! Ayihude maaqqin, Grike maaqqin ubbitay nagara oommo yezana taanii tiinatii yinttis odeeza.

10 Geeshsha Maxaafayid,

«Xillo as pettakka baaya.[b]
11 Akakiza as baaya,
Xooss koyiz oonkka baaya.
12 Ubbitay balintteeza pettippe adoozita maaqqeeza haayotith oothizay baaya.
Pettii askka baaya.
13 U doonay dooyintteez duufo,
fa iranthayir dooshshiza.
U doonaypp,
shooshii marze keziza.[c]
14 U doonayid camo odannee baadithii kumeeza.[d]
15 U tokay suuth laalodayis ellisiza.[e]
16 U ogayid dhabonnee daburssii yeza.
17 Unttii sarotith oge erooya.
18 Fa yessayid Xoossis yashittooya»
ginttinttii xaafintteeza.[f]

19 As ubba doona aythodayisnnee alama muumer Xooss pirddepp oommor shiishodayis, higge inggintteezay higgepp oommo aqizitayis maaqqeezana nu eriza. 20 Yey gishos, oonkka higges kiitinttii Xooss tiina xillodayis danda7ooya. Higge as ubbitay nagaranchcho maaqqeezana beeziza.[g]

Xillotithi ammanora
21 Zin yhatti higgennee nabitay markatteez Xooss xillotithay higge baazin qoncceeza. 22 Yha xillotitha, Xooss Yesuus Kiristtoosa ammano baggar as ubbas shaako baazin inggiza.

23 Asii ubbay nagara ootheeza; Xoossii unttis inggeez bonchchaypp facceza. 24 Zin unttii Xooss aadho keehatithar, woziza Kiristtoos Yesuusa baggar cer xilleeza. 25 Xoossa Yesuus Kiristtoosa yarshsho udii inggeezay, eza ammaniza ubbitay e suuthayir nagara maarotith demmad garkke. Xoossay yeya ootheezay fa danda7ayir tiina nagara taybekka ashshii, fa xillotithi beezodayis. 26 Yha wodayid Yesuusa ammaniza ubba xillisor, Xoossay fa ubbas xillo maaqqeezana beeziza.

27 Yeezin, nu ceeqinttay aba yenee? Yeykka atteeza. Nuunii ceeqinttizay higges kiitinttiza gishonnee? Wa77a! Ammano higgerapp attin. 28 Xoossii as xillisizay ammanorapp attin higge naagor baazana nu eriza.

29 Woy Xoossay Ayihuditayis aadda Xoossonee? Ayihude baazitayis Xooss baasannee? Tuma, Ayihude baazitayiskka E Xoosse. 30 Xooss petto; Ayihuditannee Ayihude baazitayissikka ammanor xillisizay eza.[h] 31 Yeezin, nuunii higge ammano gishos shaaroda guussonnee? Yeya baaya! Higge minthodaypp attin.

<- Oroome 2Oroome 4 ->