Oroome 15

Hara asita ufaysso

1 Nu minthitay daabureezitay daabura tookkodayis beeziza. Nuunii nuna ufayssodayis beezooya. 2 Nuunii woli minthodayis zhamita maaddodayisnnee ufayssodayis beeziza. 3 Kiristtoosa fana ufayssibe7ekkaya. Zin Geeshsha Maxaafayid, «Asay nena cazheez cashshay tana helleeza»[a] ginttinttii xaafintteezay garkk haneeza. 4 Geeshsha Maxaafay inggiza garzhorannee minthathora nu ufayssa ekkod garkk Geeshsha Maxaafayid xaafintteez ubbitay nuna tamaarssodayis xaafintteeza.

5 Garzhonnee minotith inggiza Goday yinttii Yesuusa Kiristtoosa kaallodar pettepettith yinttis inggo. 6 Yeykka, nu Goda Yesuus Kiristtoosa Ada, Xoossa, pettii wozinarannee pettii qaalar yi bonchchod garkke.

Wongilay as ubbitayis

7 Kiristtoosa yinttan ekkeezay garkk Xooss bonchchos pettay petta ekkoytta. 8 Xoossii binii aditayis inggeez ufayssay polinttod garkk e tumatithay erinttoday garkk Kiristtoosa dookalinttos aylle maaqqii ye7eezana ta yinttis odiza. 9 Kiristtoosa dookalinttos aylle maheez bazay ma Ayihude baa asay Xoossa e maarotithay gishos galatod garkke. Geeshsha Maxaafayid,

«Ta nena Ayihude baa as gancce galatoda;

ne suntha sabboda»[b]

ginttinttii xaafintteezay garkk haneeza.

10 Ma, «Ayihude baa asayis,

Xooss woyayira ufayttoytta»[c] yeegintteeza.

11 Ma mahii, «Ayihude baa asay ubbay,

Goda galatooytta;

kaatetithii ubbitay eza sabboytta»[d]

yeegintteeza.

12 Yey garkk Isiyaasa,

«Issaye xaphopp yelintteez pettay ye7oda;

E fa kaatetithita ubbita aqisoda.

U fa ufayssa ezalli afa gaddoda»[e]

yeegeeza.

13 Geeshsha Ayyana wolqqar yi diccod garkk ufayss inggiz Xoossay, yi ammanay baggar yinttis ufayssara sarotithar kunthii inggo.

14 Ta ishuntho yintt lo77otithinne eretithii kumeezana ma pettay petta zorodayis danda7izana ta geeshshii eriza. 15 Taanii yinttan pettii pettibaz gujjii akaakisodayis koy yashittekkazar yha dabddaabba yinttis xaafeeza. 16 Taanii Kiristtoos Yesuusa aylle maaqqii, Ayihude maaqqekka asayis qeese garkk oothii, wongile odod garkke Xoossay taas aadho keehetithi inggeeza. Ayihude baa asay Geeshsha Ayyanar geezhii, Xooss ufayssiza yarshsho maaqqad garkk Xoossay yeya ootheeza.

17 Taanii Kiristtoos Yesuusar maaqqii Xoossis oothiza oosor ceeqinttiza. 18 Ayihude baa asay Xoossayis kiittinttod, Kiristtoosa ta qaalannee ta ooso baggar ootheez oosaypp attin hara ta ceeqinttizabaz baaya. 19 Xooss yeya malatarannee Geeshsha Ayyana wolqqar wayizii ootheezakko ta yinttis ododa. Taanii Yerusalamepp aykkii, Iliwarqoonnee hellodayis Kiristtoosa wongile sabbakeeza. 20 Taanii hara as baaseez aqayid keexxodayis koyooya. Kiristtoosa sunthay xeeginttekka aqo wongile sabbakodayis amottiza. 21 Geeshsha Maxaafayid,

«E bagga odinttekka asay eza be7ada;

E bagga si7ekka asay akaakoda»[f]

ginttinttii xaafintteeza.

Phawuloosa Oroome yhammadayis qoppeeza

22 Yey baggar, taanii gaame wode yinttiko ye7odayis koyin danda7inttekkaya.[g] 23 Zin taanii yhatte yha heerar yez aqo ubba helleez gishos gaame laythapp aykkii yinttan be7adayis laamoteez gishos 24 taanii Ispheenee yhanigitar yinttan be7adayis qoppeeza. Ma xiqqa wode yinttar ufaytteezaypp guye Ispheenee yhanigodar yi ta ogayis tana maaddod garkk koyiza.

25 Zin yhatte taanii Xoossa asita maaddodayis Yerusalaame yhanigiza. 26 Maqadoonarannee Akkaya yez Xooss asitay, Yerusalaame geeshshitay gancce yez manqqita miisher maaddodayis kozheeza.[h] 27 Unttii manqqita maaddoday unttis attowa baz maaqqeez gishos fa ubbas yeya oothodayis qofa acceeza. Ayihuditay Ayihude baazitayira ayyana anjjo shaaginttiko, unttii ma paas yezabazar Ayihudita maaddodayis beeziza.[i] 28 Yey gishos, taanii ye shiiqeez miisha unttisi inggezayppennee ekkeezana ereezapp guye Ispheenee yhanigitar yi lanqqer aadhoda. 29 Taanii yinttiko yhanigiza wode Kiristtoosa anjjo kunthar yhammadana ta eriza.

30 Ta ishuntho, taasi Xooss woossittar ta butinttodar taar eqqod garkk Goda Yesuus Kiristtoosarannee Geeshsha Ayyana siiqayir yinttan woossiza. 31 Xoossay tana Yihuda gancce yez ammanoowa asitaypp ashshod garkkennee Yerusalaame ta oothod ooso Xooss asay lanqqe ekkinttod garkk taas woossoytta. 32 Ma Xooss giiko, taanii yinttiko yhanigii ufayisar yinttar shemppod garkk taasi woossoytta. 33 Sarotith Xoossay yinttar ubbayir maaqqo. Amin7e.

<- Oroome 14 Oroome 16 ->