Waannisa Qonccitha 15

Wurssith boshita

1 Taanii salol hara dammannee pala malabaz be7eeza. Xooss wurssitha kachch poliza laappun boshita aykkeez laappun kiitanchchita ta be7eeza.

2 Yeypp guye tamar walakintteez burccuko abba aaziza baz ta be7eeza. Ye abbay gaxa do7a, e misilannee e sunthay tayba gameezita ta be7eeza. Xoossii unttis inggeez diitha aykkii burcuko abbal eqqeeza. 3 Unttii Xooss aylle Muse mazmurannee Duray mazmuura yhay garkk yeegii yexxeeza.

«Godayyo, Ubbapp Wolqqama Xoossayyo,

ne oosay dammannee malabazii.

Woya ubbayis kaatayyo,

ne ogay xillonnee tuma.[a]

4 Geeshshii ne aadda maaqqeez gishos

Godayyo, nees yashittoozayinnee

ne suntha bonchchoozay oonoo?

Ne xillo oosay as ubbayis qoncce maaqqeez gishos woya

ubbay ne tiina yi7ii goynnoda»

yeegii yexiza.[b]

5 Yeypp guye, salo dooyinttii yez Markkatith Dunkkaane maaqqeez Xooss Keetha ta be7eeza.[c] 6 Laappun boshita aykkeez laappun kiitanchchitay Xooss keethaypp kezeeza. Unttii geeshshinnee pociz liino ma7o ma77eeza; fa tiral worqqe dancco dancceeza. 7 Oyddii medhetithitaypp pettay, medhinas yez Xooss kachchii kumeez laappun worqqa xuu7ita laappun kiitanchchitayis inggeeza. 8 Xooss bonchchayppennee e wolqqaypp denddeezayid Xooss Keethay cuyar kumeeza. Laappun kiitanchchitay aykkeez laappun boshitay polinttod hellodayis Xooss Kara oonkka gelodayis danda7ekkaya.[d]

<- Waannisa Qonccitha 14 Waannisa Qonccitha 16 ->