Maatoosa Xaafeez Yesuus Kiristtoosa Wonggile
Gelo
Maatoosa Wonggilay, Yesuusa yi7ith ufayssay kase E bagga odintteezayinnee ashshizaya maaqqeezana Xoossii tiina caaqayid fa asayis inggeez ufayss qaala poleezay E baggar maaqqeezana odiza Wonggile. Yha Wonggilay Yesuusa u gancce yelinttii dicceez Ayihuditay aaddas baazin alame ubbayisii.
Maatoosa Wonggilay, lo7ithii naaginttor xaafintteez maxaafe. Maatoosa fa maxaafa Yesuusa yelintteezaypp aykkii, E xammaqinttannee E paacintta odii maaqqii, Galila biitta E sabbakeez baz, taamarsseez bazinnee harggintteezita patheez bazita odiza. Ezayillakka, Yesuusa Galilapp Yerusalaame yhanigeezanee E yha sa7all yezeez wode wurssith saamintta haneez bazita beeziza. Yeykka E sottintta, E yhayiqannee E dendda wolalli odiza.
Yha Wonggilay, Yesuusa Xooss higge billodayis mawuter yezannee Xooss kaatetith baz taamarssiza bayira asitamaare udii shiishiza. E timirttaypp gaanggiza baggay duma duma muurar ichchin aqo shaakinttiza.
1. Xooss kaatetitith asay hanotitha, ooso, mawutennee u wurisith anja odiza ambal afa Timirtte (Shem 5–7).
2. Taphpho nam77ii tamaaritay Wonggile sabbakodayis yhanigeez wode unttisi inggintteez higge (Shem 10).
3. Xoossa kaatetith baz tamaarssodayis shiiqeez duma duma aaziso (Shem 13).
4. E tamaare maaqqithis yez bilitha odiz timirtte (Shem 18).
5. Yha alamay wurssithannee Xooss kaatetithay folo yi7ithi baz odiz timirtte (Shem 24—25).
Maatoosa Wonggilay aykkeez qofita
Yesuus Kiristtoosa zare xussinnee e yelintto 1:1—2:23
Xammaqqiza Waannisa ooso 3:1-12
Yesuusa Xinqqatennee paacintto 3:13—4:11
Yesuusa Galila biitta fa ooso aykkeeza 4:12—18:35
Yesuusa Galilapp Yerusalaame hellodayis ootheez ooso 19:1—20:34
Yesuusas wurissithi saaminttannee, Yerusalaame heera 21:1—27:66
Goday yhayiqopp dendonnee bentithi 28:1-20

Yesuusa yeletith xussii

(Luq. 3:23-38)

1 Dawute na7a Afraame na7a maaqqeez Yesuus Kiristtoosa yeletith.

2 Afraame Isaaqa yeleeza;

Isaaqa Yayqqooba yeleeza;

Yayqqooba Yihudarannee e ishita yeleeza;

3 Yihuda Ti7imaaripp Paaresannee Zaara yeleeza;

Paaresa Asroome yeleeza;

Asrooma Raame yeleeza;

4 Raame Aminadaba yeleeza;

Aminadaba Na7asoona yeleeza;

Na7asoona Salmoone yeleeza;

5 Salmoona Ra7aabppe Boo7eeza yeleeza;

Boo7eeza Uritppe Iyobeede yeleeza;

Iyobeede Issaye yeleeza;

6 Issaye kaata Dawite yeleeza;

Kaat Dawite Ooriyo machchattippe Solomone yeleeza;

7 Solomone Robi7aama yeleeza;

Robi7aame Abiya yeleeza;

Abiye Asaafe yeleeza;

8 Asaafe Iyosaafexe yeleeza;

Iyosaafixe Iyoraame yeleeza;

Iyoraame Oozanee yeleeza;

9 Oozanee Iyo7ataame yeleeza;

Iyo7ataame Akkaza yeleeza;

Akkaza Hiziqasa yeleeza;

10 Hiziqasa Minaase yeleeza;

Minaase Amooxa yeleeza;

Amooxa Iyosaasa yeleeza;

11 Iyosaasa Ikonaanarannee e ishita yeleez ya laythate Isreele asay di7inttii Baabiloone biitta yhanigeeza.[a]

12 Baabiloone biitta Isreele asay di7inttii yhanigeezaypp guye Ikonaana Salatiyaale yeleeza.

Salatiyaale Zerubaabela yeleeza;

13 Zerubaabela Abdiyu yeleeza;

Abdiyu Eliyaaqeme yeleeza;

Eliyaaqeme Azoora yeleeza;

14 Azoora Sadooqe yeleeza;

Sadooqe Akime yeleeza;

Akime Eliyuuda yeleeza;

15 Eliyuuda Alaazara yeleeza;

Alaazare Maatane yeleeza;

Maatane Yayqqooba yeleeza;

16 Yayqqooba Yooseefa yeleeza;

Yooseefa Kiristtoosa giz Yesuusana yeleez Mayramii azina.

17 Yikkee, yeletithii Afraamepp Dawute hellodayis taphpho oydde. Dawutepp yhanigii Baabiloone di7a hellodayis taphpho oydde. Baabiloone di7aypp yhanigii Kiristtoosa hellodayis taphpho oyddii yeletithi maaqqiza.

Yesuus Kiristtoosa yeletithi

(Luq. 2:1-7)

18 Yesuus Kiristtoosa yelintto taarikay yhaypp kaalliza. E indat Mayrama Yooseefas oyccinttii yezar Yooseefar wolla aqekkazar geeshsha Ayyanapp woddexeeza.[b] 19 Yooseefa geesh as maaqqeez gisho izo asii ododay garkk koyekkazay gishos geemar ashshodayis qoppeeza. 20 E ye qofayil yezin Xoossa kiitanchchay abukkar ees benttii, «Dawute na7a, Yooseefa, Mayrama woddexeezay geesha Ayyanapp maaqqeez gisho izo ekkodayis yashittippe» yeegeeza. 21 Iza dhiirath na7a yeloda, E woyita u nagaraypp ashshizay gisho e suntha ne Yesuusa gi xeegoda.[c]

22 Goday nabay doonar, 23 «Yeezako wudirtta wodexxoda; dhiirath na7a yeloda; e sunthay Amanu7eela ginttinttoda» geezay polinttoday garkk yha ubbay haneeza. Amanu7eela guusayis birshshithay «Xoossay nuuri yeza» guussii.[d]

24 Yooseefa genttapp barkkii Goday kiitanchchay kiitteezay garkk Mayramo fa kara kanggeeza. 25 Zin fa bayra na7a yelod gatho izo bochchekaya;[e] yelintteez na7akka Yesuusa gi xeegeeza.[f]

Maatoosa 2 ->