Phawuloosa Qolaasiyasa Asayis Xaafeez Kiita Gelo Phawuloosa Qolaasiyasa asayis xaafeez kiitay xaafintteezay, Xiqqa Iisa, Efisonepp awa kess baggar yez Qolaasiyasa katamay yez woosa keethatisii. Ye woosa keetha esseezay Phawuloosa baa maaqqikokka, Oroome biitta Iisass waanna katama maaqqeez Efisonapp Wonggile sabaakita kiittizay eza maaqqeez gishos Qolaasiyasasayilakka adetithi ees yeza. Qolaasiyasa woosa keetha, «Xooss erodayisinnee kunth atotith denggodayis as ubbay ayyana wolqqitayisinnee mawutayis goynnodayis koshshiza» yeegiz worddo asitamaaritay yezana Phawuloosa si7eeza. Ye asitamaaritay taamarssiza hara baz, ma, «Asii ubbay dookkalintto yeegiz azazo wogitayis moodinttodayisinnee muuss woga ubba naagodayis koshshiza» yeegiza. Phawuloosa yha kiita xaafeezay, tuma ammano timirtta tamaarssii, u worddo timirtta laalodayisii. E maheez mahithitaypp waannatizay, «Yesuus Kiristtoosa kunth atotith inggiza; zin yha hara haymaanotitayinnee u oositay eepp haakithiza» yeegizaya. Xoossay Kiristtoosa baggar alame medheeza. Ma e baggar mahii faako ko7oda. Yha alamayis atotith ufayssi yezay Kiristtoosa ammano baggara. Yeyi gishos, Phawuloosa yha gita timirtta ammaniza as de7o wayizii oosol peeshshodayis beezizako odiza. Yha kiitannee Efesoona asayis xaafeez kiitay, fa aykkeez qofayrannee kiitay woli aaziza. Yha nam7i maxaafitay gancce yez dummatithay, Efesoone Kiristtoosa woosa keethis kustte yeegiza, zin Qolaasiyasa Kiristtoosa medhetithis kustte yeegiza. Yha kiita Phawuloosapp ekkii Qolaasiyasa hellodayis yhanigeez Tikiqoosar wolla yezay Anasmoosa maaqqeezana beezos maaddiza baz. Wayizii giiko, Phawuloosa Anasmoosa ginttinttiz fa oosanchchay bagga Filmoonas hara kiita xaafeeza. Qolaasiyasa kiitay aykkeez qofita Gelo 1:1-8 Kiristtoosa hanannee oosa 1:9—2:19 Kiristtoosar yez oroth de7o 2:20—4:6 Wurssith sarothonnee kustte qofa 4:7-18
1 Xooss shener Kiristtoosa Yesuusa hawaare maaqqeez Phawuloosapennee nu isha Ximaatoosapp, 2 Qolaasiyasa katama yez Kiristtoosas ammanintteez geeshshitayis xaafeez kiita.
7 Yi yeya nuur wolla Kiristtoosas oothiza ammanintteezannee, dosintteez Ephafirapp tamaareeza.[a] 8 E yeyil afa gujjii Ayyanay yinttis inggeez siiqor yi woli qadhdhizana nuus odeeza.
9 Yeyi gishos, nuunii yi baz si7eez gallasaypp aykkii, Xoossay fa shena yinttan beezoday garkke, Geeshsha Ayyanay inggiza eratithirannee ecetith ubbayir yinttan kunthoday garkk ubba wode yinttis Xooss woossizana ashaamii. 10 Yey garkkekka, Goday koyizay garkk yi yezod garkk, ubba wode e ufayttoday garkk, lo77o ooso ubbayid yi aafe aafod garkkennee Xoosse aathii erittar diccoday garkk Xoossa woossiza.
11 Xoossay fa gita wolqqayir minotith ubba yinttis inggo. Yi danda7arakka garzhoday garkk ufayssar giigintteezita maho. 12 Ma Xooss asita poo7o kaatetitha laattoday garkk yinttan ootheez Xooss Ada galatooytta. 13 E nuna dhuma wolqqapp shaakkii ashshii fa dosiza na7ay kaatetitha geloday garkk udeeza. 14 E wozin nu nu nagarayis atotithi denggeeza.[b]
19 Xoossii fa kunth Xoossatithay fa na7ay gancce yezodana koyeezay Xooss Aday shene maaqqeez gishosi yeykka haneeza. 20 Ma mazqalel afa laaleez fa na7a suuthayir sarotithi medhdhii salonnee sa7a yez ubba e baggar paar dabbotheeza.[d]
21 Yhaypp tiina yi qofayinnee yi ooso iitatithay yinttan Xoossapp shaageezannee ees morkkita udeeza. 22 Zini yhatti Kiristtoosa ashor yhayqqeez yhayiqay baggar Xoossii yinttan paar iginthii, geeshshita, bore baazitannee xillita udeeza. 23 Yi, yi ammanor eni7ekka miinggii xaphphii yezodayis beeziza. Yi Wonggile qaala si7eez wode ekkeez ufayssa miinthii aykkoytta. Ye Wonggila yi si7eezannee alame ubbayil sabbakintteeza. Ta, Phawuloosakka yha Wonggelayis oosanchcho maaqqeeza.
28 Yeyi gishos, pettii pettii asa Kiristtoosar kunth as udii shiishodayis ecetith ubbayir asa tamaarssorannee zorer Kiristtoosa bagga sabbakiza. 29 Xoossii fa damma wolqqar taal oothiza gishos yhanno hellodayis e wolqqar butitizannee daaburiza.
Qolaasiyasa 2 ->