Phixiroosa Xaafeez Nam7intho Kiita

Gelo

Hawaare Phixiroosa xaafeez nam7intho kiitay xaafintteezay, duma duma aqo yez binii ammaniza asayisii. Yha kiitayis aafe qofay, worddo asitamaaritay iita oosonnee u timirttaypp denddeezayid medhintteez yeellathiza yessa ixxoday garkkesii. Ye medhintteez metita kayodayis oge maaqqodayisi, Yesuusana fa aafer be7eez asaynnee E taamarssiza wode fa hayayir si7eez asitay taamarsseez timirttay baggar Xooss bazinnee Goda Yesuus Kiristtoosa bagga ammanthiza eratith demo. Xaafay miinthii odeezay, «Kiristtoosa nam7intho ye7ooya» yeegiz worddo timirttay bagga. Ye qofa miinthii odittar, «Kiristtoosa maaqqii ye7ekka gam7eezay, as ubbay fa nagaraypp maaqqoday garkkepp attin oonkka dhabod garkk koyowa gishosi» yeegiza.

2 Phixiroosa kiitay aykkeez qofita

Sarotho 1:1-2

Kiristtanitay xeeginttith 1:3-21

Worddo asitamaarita 2:1-22

Kiristtoosa nam7intho yi7itha 3:1-18

3 Fa bonchchorannee haayotithar nuna xeegeez eza eror de7osinnee Xooss ufayssiza yess yezodayis koshshiza baz ubba Xoossii fa wolqqar nuus inggeeza. 4 E bonchchayidannee E keehatithayid bonchcho gate yez ubbapp gita maaqqeez ufayis denggeeza, yhayttitay baggar yi iita amopp dendeezi yha alamel yez dhabopp buutii Xoossatith hana shaakintteeza. 5 Yeypp kaallii yezitay yinttis gujinttoday garkk miinggoytta, yi ammanayil afa lo77otithi, lo77otithal afa eratithii, 6 eretithal afa fana moodo, fana moodithall afa garzho, garzholl afa Xooss ufayssiza yess, 7 Xooss ufayssiza yessal afa ishetith qadhe, ishetith qadheel afa siiqo gujjoytta. 8 Yeyitititay yinttis gaanggii yeza baz maaqqiko, Goda Yesuus Kiristtoosa eror maaddiza asinnee aafe aafiz as yinttan udoda. 9 Zini yeyititay baa oonkka kantta yeza baz aadda bi7iz to7a. E fa tiina nagaraypp geezheezana dogeeza.

10 Yeyi gishos, ta ishuntho, yi xeessanne yi doorintta minthodayis kaseesaypp aathii miinggoytta. Yi yeyititta oothizabaz maaqqiko, dhubinttaamii. 11 Ezayid nu Godanne nuna ashshiza Yesuus Kiristtoosa medhina kaatetitha gelo kunthetithar yinttis ingginttoda.

12 Yeyi gishos, yi yhayttita eriza bazinnee yi aykkeez tumayid miinggii yeza baz maaqqikokka, taanii yhayttita ubba wode yinttan qofiso ashshaamii. 13 Taanii shemppor yezeez wode ubbayid yinttan qopisoday beeziza baz gi ta qoppiza. 14 Nu Goda Yesuus Kiristtoosa taas qoncciseezaygarkk taanii yha yhayqqiz asha gam7ekkazar qaar olii yhammadana eriza. 15 Taanii yhatti butinttizay ta yinttipp yhayqqii shaginttikokka yi yhayttita ubba wode akaakod garkk taas danda7intteezibaz ubba udoda.

16 Nuunii Goda Kiristtoosa wolqqannee e yi7ithi bagga yinttis odeezay, E gita deeta nu aafer bi7ipp attin medhdhii kesseez tosse baaya. 17 «Taanii ufayttiza, ta dosiza na7a yhaya» yeegiz qaalay wolqqama bonchchaypp ye7eez wode Xooss Adaypp bonchchonnee galata ekkeeza.[a] 18 Nuunii ezar wolla geeshsha ambal yezar ye qaala giirth salopp ye7odar si7eeza.

19 Nuus yeypp aadhiz ammanintteez tinbbite qaala yeza. Sa7a wonttod gathonnee bakkala xoolintto yi wozinayid dolod gathosi, dhuma gancce poo7iza poo7ayis naaginttizay garkk, yi ye qaala naagiko lo77o udiza. 20 Ubbapp tiinatii yhaya eroytta. Geeshsha Maxaafayid xaafintteez tinbbite qaala oonkka fa doseezay garkk billodayis danda7ooya. 21 Tinbbite ubbay yesha as shener odinttekkaya. Zini tinbbite Geeshsha Ayyanay kaalitheez asay Xoossii kiitteez asitay, odeezaypp attin.

2Phixiroosa 2 ->