Waannisa Xaafeez Nam7intho Kiita
Gelo
Waannisa xaafeez nam7intho kiita, Yesuusa hawaare maaqqeez cimay, Waannisa xaafeeza. Xaafintteezaykka maraxintteez godattatisinne I na7itayis. Oonii eree, yeykka pettii woosa keethatisinnee ize goynniza asayis maaqqekka attaamii. Yha qanthi kiitay xaafintteezay, unttii woli siiqinttod garkk akaakisodayisinnee worddo asitamaaritayppennee u timirttaypp naaginttoday garkk qofisodayisi.
2 Waannisa kiitay aykkeez qofita
Sarotho 1-3
Siiqo ubbaypp aadho 4-6
Worddo timirttaypp naagintto 7-11
Kustte qofa 12-13

1 Ta cimay maraxintteez godatatisinnee i na7itayis kiitteez kiita. Ta aadda baazin tuma erizitay ubbay yinttan dosiza. 2 Yha tumay nuur yeza gishonnee tiinasi medhinaskka nuur yezoday gishos taanii yinttan turo dosiza.

3 Xooss Adaypp e Na7a Yesuus Kiristtoosapp aadho keehatithay, maarotithayinnee sarotithay tumarannee siiqor wolla nuur maaqqo.

Tumabaggannee siiqo bagga

4 Aday nuna azazeezayigarkk, ne na7itaypp pettay pettay, tumar miinggii eqqeezana bi7ii taanii lo7ith ufaytteeza. 5 Godattee, yhattekka nuunii ubbay pettay petta siiqoday garkk taanii nena woosiza. Yha azazay tiinapp nuur yeza azazopp attin taanii nees xaafizay oroth azazo baaya.[a] 6 Tuma siiqqay nuunii Xooss azaza folo. Ma tiinapp yi si7eezay garkk e azazay, yi ubbay siiqor yezoday garkkes.

7 Yesuus Kiristtoosa as maaqqii ye7eezana ammanoowa, balethiza gaame asitay, alamel denddeeza. Yeyigarkk as oonkka balethizayannee Kiristtoosa morkke. 8 Yi ootheez kunth woyita ekkodayis miinggoytta. Yi ootheezay dhabaamay garkk naaginttoytta.

9 Kiristtoosa timirttayid miinggii eqqozayirannee E timirttaypp haakkitar yhanigiza athayir Xoossii baaya. Kiristtoosa timirttayid miinggii eqqeezayir Adayinne Na7ay yeza. 10 Oonkka yinttiko yi7ttar yha timirtta ekkekka yi7iko, yi kara gelssipate; sarokka giipatte. 11 Eza saro giz oonkka e iita oosayid ezar shaakinttiza.

Wurssith saroth

12 Taanii yinttis xaafodayis koyeez gaame baz yeza, zin worqqater xaafodayis koyooya. Nu ufayssay polinttoday garkk yinttar woli hellii odinttodayis yinttiko yhanigoda gi qoppiza.

13 Xoossii dooreez ne mishitii na7itay nena saro yeegiza.