1 Ta ishuntho, Geeshsha Ayyana imotitay bazkka yi eroday garkk ta koyiza. 2 Yi Xooss ammanoowa wode doona baa eeqako gooshintti, yi erowazitayirakka yhanigeezana yi eriza. 3 Xooss Ayyanay kaalithiza as oonkka, «Yesuus qanggintto» yeegooya. Ma Geeshsha Ayyanay kaalithekkazin, oonkka, «Yesuus Goda» godayis danda7oozana yi eroday garkk ta koyiza.

4 Duma duma Ayyana imotitay yeza, zin imotita inggiza Ayyanay petta.[a] 5 Nu Godayis oothiza duma duma oositay yeza, zin Goday petta. 6 Nu Godayis oothiza duma duma ogitay yeza, zin ye ogayir as ubbayir oothiz Xoossay petta. 7 Zini pettayis pettayis inggintteez qonccith imotitay wolla maaddinttoday garkk.

8 Geeshsha Ayyanay pettayis ecetithi kumeez qaala inggiza; ma pettayis eratithii kumeez qaala inggiza. 9 Ye Geeshsha Ayyanay pettayis ammano, yhankkayis ma pathiza wolqqa inggiza. 10 Geeshsha Ayyanay pettayis malata oothiza wolqqa, pettayis tinbbite odiza wolqqa inggiza. Pettayis ayyanapp ayyana shaakkii eriza wolqqa, pettayis duma duma doonar odiza wolqqa, ma pettayis duma duma doonar odintteezana billiz wolqqa inggiza. 11 Zini yha ubba oothizay ye pettii Geeshsha Ayyana. E koyeezay garkk pettayis pettayis asayis duma duma imota inggiza.

12 Pettii asetithal gaame billititay yeza, zin ye duma duma billititay pettii asetithi maaqqiza. Yey garkkekka, Kiristtoosa duma duma billititay yez pettii asetith garkke.[b] 13 Nuunii Ayihude maaqqin Girike maaqqin aylle maaqqin womaanno maaqqin, ubbay pettii asetith maaqqodayis Geeshsha Ayyanar xammaqqintteeza. Ma nu ubbay pettii Geeshsha Ayyana ekkeeza.

14 Nu asetithal duma duma billititay yezapp attin pettii billite aadda baaya. 15 Tokay, «Taanii kushe maaqqekka gishos billite baaya» giiko, E yeya geez gishos billitetithay attinnee? 16 Haye, «Taanii aafe maaqqekka gishos billite baaya» giiko, E yeya geez gishos asetithapp pettii billite maaqqithay attinennee? 17 Asetith ubbay aafe aadda maaqqiko, nu abar si7odee? Ma asetithi ubbay haye aadda maaqqiko nu abar singgode?

18 Zini Xoossay fa koyeezay garkk, asetith gancce duma duma billitita gaddeeza. 19 Ubbay pettii billite maaqqeezako asetithii anapp benttode? 20 Zini billititay gaame maaqqikokka, asetithay petto.

21 Aafe kusheko, «Ne taas koshshooya» godayis danda7ooya, woy omma toheko, «Ne taas beezooya» godayis danda7ooya. 22 Zini daabura aaziz asetith billititay nuus usa koshshiza. 23 Bonchcho koshshoowa gi nu qoppiza nu billitita lo7ith bonchchoda. Ma nu borssinttiza nu asetith billitita aathii bonchchii naagoda. 24 Nu bi7in borssowa asetith billitayis bonchcho koshshooya. Zini Xoossay nu asetith billitita woli hellith borssiza billitayis aadhiz bonchcho inggeeza. 25 Asetith billititay pettay pettayir shaako medhdhekka woli qoppoday garkk udii medheeza. 26 Asetith billititaypp pettay hargginttiko billititay ubbay ezar hargginttiza. Asetith billititaypp pettay bonchchinttiko billititay ubbay ezar ufayttiza.

27 Yi ubbay Kiristtoosa asetithi; ma yi pettay pettay E billitita. 28 Woosa keetha Xoossay, tiina hawaarita, nam7intho nabita, hayidzintha asitamaarita, kaallii malatita oothizita, pathizita, yhankkita maaddizita, woosa keeth aqizitannee, duma duma doonar odizita gaddeeza.[c] 29 Ubbay hawaare? Ubbay nabe? Ubbay asitamaare? Ubbay malata udine? 30 Ubbay pathinee? Ubbay duma duma doonar odinttinee? Ubbay duma duma doonar odinttizana bili7inee? 31 Zini ubbaypp aadhiz imota miinthii koyoytta.

Ma ubbaypp aadhiz oga ta yinttan beezoda.

<- 1Qoronttoosa 111Qoronttoosa 13 ->