Phawuloosa Qoronttoosa Asayis Xaafeez Tiina Kiita
Gelo
Phawuloosa Qoronttoosa asayis xaafeez tiina kiitay xaafintteezay, Phawuloosa Qoronttoosa esseez woosa keetha ammaniza asay yessayilannee ammanayil afa denddeez metayis mahith inggodayisii. Ye wode Qoronttoosa katamay biittal yez duma duma asay yez Girike katama Akkaza giz Oroome awurajjas waanna katama. Ye katamita zal7er erintteez, wogar minggeez, duma duma iita yessii dalggeezannee haymaanote darotithar erintteezanno.
Hawaaray miinthii ododayis koyeezay, ye woosa keeth gancce medhintteez shaakintto bagga, duma duma iita yessi bagga, lagita bagga, eko gelo bagga, woosa keeth woga bagga, Geesha Ayyana imotitay baggannee yhayiqoppe denddo bagga. Wonggilay yha oychchita wayizii mahizako hawaaray naaginttii odiza.
Siiqo Xoossii fa asayis inggeez aadho imota maaqqeezana taphpho hayidzintha shemppay qonccisiza; ma yha shemppay yha maxaafayid ubbapp aadhii erintteez kifile ginttinttii qopinttiza.
1Qoronttoosa kiitay aykkeez qofita
Gelo 1:1-9
Ammaniza asay gancce medhintteez shaakintto 1:10—4:21
Iita hanonnee kara asay yess woga 5:1—7:40
Ammaniza asannee ammanoowa asa 8:1—11:1
Woosa keethinnee goynno woga 11:2—14:40
Kiristtoosa dendonnee ammaniza asay denddo 15:1-58
Yihuda yez metintteez ammaniza asayis maadee 16:1-4
Kustte qofa 16:5-24

1 Xooss shener Yesuus Kiristtoosas hawaare maaqqodayis xeegintteez Phawuloosannee, nu isha Sostenasa, 2 Qoronttoosa yez Xooss woosa keethis, Yesuus Kiristtoosar geezheezitannee geeshshi maaqqoday garkk xeegintteezitayis; ma unttisinnee nuus God maaqqiz nu Goda Yesuus Kiristtoosa suntha ubba aqo xeegiz ubbayis;[a]

3 Xooss, nu Adayippennee nu Goda Yesuus Kiristtoosapp aadho keehetithinnee sarotith yinttis maaqqo.

Phawuloosa Xoossa galatiza

4 Xoossay Kiristtoosa Yesuusa baggar yinttis inggeez aadho keehatithay gishos taanii ubba wode Xoossa galatiza. 5 Ezayid odarannee eratith ubbayir yi duriteeza. 6 Taanii Kiristtoosa bagga markkatteezay tuma maaqqeezay yinttal miinggeeza. 7 Yey gishos, yi nu Goda Yesuus Kiristtoosa yi7itha naagttar yezin, aba ayyana imokka yinttis paccenna. 8 Nu Goda Yesuus Kiristtoosa maaqqiz wode yi boronnee borsso bayth wurssithii hellodayis yinttan miinthii naagoda. 9 Fa Na7a, nu Goda Yesuus Kiristtoosar pettipettithay yezoday garkk yinttan xeegeez Xoossay ammaninttizaya.

Woosa keetha yez shaakintto

10 Ta ishuntho, yi gancce shaakintto yezaamay garkk yi pettii wozinarannee pettii qofar petto maaqqii, yezod garkk nu Goda Yesuus Kiristtoosa sunthayir ta yinttan woosiza. 11 Ta ishuntho, Qelo7e kara asay yi gancce ixo yezana taas odeeza. 12 Ta gizay yinttapp pettay pettay, «Taanii Phawuloosas; taanii Aphiloosas; taanii Phixiroosas; taanii Kiristtoosas» yeegiza.[b] 13 Kiristtoosa shaakintteenee? Yi gishos mazqalel afa sotintteezay Phawulosanee? Woy yi Phawuloosa sunthayir xammaqintteenenee?

14 Taanii Qarisphoosannee Gaayoosapp attin yinttipp oonakka xammaqekka gishos Xoossa galatiza.[c] 15 Yey gishos, oonikka yinttan ta sunthayir xammaqintteeza godayis danda7ooya. [ 16 Ma Isxeefaanosa kara asakka ta xammaqeeza, zin hara oona xammaqeezako taas qopinttooya.][d] 17 Kiristtoosa tana kiitteezay Wonggile ododay garkkepp attin xammaqoday garkk baaya. Kiristtoosa mazqalel afa yhayqqeezay cere maaqqaam garkk taanii as ecetith qaalar baaya.

Kiristtoosa Xooss wolqqannee ecetith

18 Kiristtoosa mazqalel afa yhayqqeezana odiza qaalay dhabizitayis boozotithii, zin nuus attizitayis Xooss wolqqa. 19 Geesha Maxaafayid,

«Taanii ecitay ecetitha dhabisoda;

akaakanchchitay akaaka balithoda»

yeegiza.[e]

20 Yeezin, eca aba yenee? Higge asitamaare aba yenee? Woy yha sa7a eranchchay aba yenee? Xoossii yha sa7a ecetitha eeyatith oothekkasa?[f]

21 Yha sa7a asay fa ecetethar Xoossa eraamay garkk Xoossii fa ecetithar kayi, boozatithar payidinttiza, nuunii odiza qaalayid ammanizita ashshodayis Xoossa shene maaqqeeza. 22 Ayihuditay malata be7adayis koyiza; ma Girikitay ecetithi koyiza. 23 Zin nuunii mazqalel afa sotintteez Kiristtoosa sabbakiza. Yey Ayihuditayis dhube; ma Girikitayis boozetithii. 24 Zin Xoossay xeegeezitayis, Ayihude maaqqin, Girike maaqqin Kiristtoosa Xooss wolqqannee E ecetithii. 25 Xoossa boozetithay as ecetithaypp aadhiza; ma Xooss daaburay as minotithaypp miinggiza.

26 Yikkee, ta ishuntho, Xoossay yinttan xeegodar yi ab garkk asizako qoppoytta. As qofar yi gancce gaamitay ecitay, wolqqamitaynnee dhoqqa kochchitay baaya. 27 Zin Xoossay ecita yeellathodayis alamel yez boozita dooreeza; ma minthita yeellathodayis alamel yez daabureezita dooreeza. 28 Xoossay yha alamel gita ginttintteezbaz dhabisodayis, yha sa7a kawuzheezibaz, ixintteezibazinnee pathoowabazi dooreeza. 29 Oonkka Xooss tiina ceeqinttaamay garkk yeya ootheeza. 30 Zin Xoossay yinttis Kiristtoosa Yesuusar pettipettithar yezod garkk ootheeza. E nuus Xoossapp ecetith, xillotith, geeshshetithinnee wallotith maaqqeeza. 31 Yey gishos, Geeshsha Maxaafayid, «Ceeqinttiza oonikka Godayil ceeqqo» yeegiza.[g]

1Qoronttoosa 2 ->