1 ይኬ፥ ኑ አማኖር ጽሌዝ ግሾስ ኑ ጎዳ የሱስ ክርስቶሳ ባጋር ጾስ ባጋር ኑስ ሳሮትꬅ አይኮዳ። 2 ኑኒ ኤ ባጋር Ꮊት ኑ ኤቄዝ ኣꬎ ኬሄትꬃይ ጋንጨ አማኖር ገሌዛ። የይ ግሾስ፥ ኑ ጾሳይ ቦንቻ ሻክንቶዳይስ የዝ ኡፋይሳይር ጬቅንትዛ።

3 የይ ኣዳ ባዝን መቶ ዳንዳአ ክእዛና ኑ ኤርዛ ግሾስ ኑ መቶ ጋንጨራካ ጬቅንትዛ። 4 ዳንዳአ ፋጨ ጋንጨ ጋርዦ ጋርዦካ ኡፋይስ እንግዛና ኑ ኤርዛ። 5 ጌሻ አያናይ ባጋር ጾሳይ ፋ ቃꬋ ኑ ዎዝና ጋንጨ ጋዴዝ ግሾስ የ ኡፋይሳይ ኑና ዬላꬆያ።

6 ኑኒ ሀጋ ዳቡሬዝታ ማቂ የዝን፥ ጾስ ዎደ ሄልን፥ ክርስቶሳ ናጋራ ኦꬄዝታይ ግሾስ Ꮊይቄዛ። 7 ጌሽ አስ ግሾስ Ꮊይቆድ አስ ዋዪ ደማዳ፥ ዝን ኬሃ አስ ግሾስ Ꮊይቆድ አስ ኦኒ ኤሬ በንተካ አታሚ። 8 ዝን ኑኒ ሀጋ ናጋራንቾ ማቂ የዝን፥ ክርስቶሳ ኑ ግሾስ Ꮊይቄዛ። ጾሳይ ኑና አብ ጋርክ ቃꬍዛኮ ኤ ቃꬋ ቤዝዛ። 9 ይኬ፥ ኑኒ ክርስቶሳ ሱꬃይር ጽሌዝባዝ ማቅኮ፥ ኡባይፕ ኣꬂ ኤ ባጋር ጾስ ሴራይፕ አቶዳ። 10 ኑኒ ቲና ጾሳር ሞርክታ፥ ዝን ኤ ናአይ Ꮊይቆ ባጋር ኤዛር እግንቴዛ። የይፕ ኣꬂ፥ Ꮊት ኑኒ ጾሳር ዳቦቴዝ ኤ ናአይ ደኦ ባጋር ኑኒ አቶዳ። 11 የይ ኣዳ ባዝን Ꮊት ኑና ጾሳር ዳቦꬄዝ ኑ ጎዳ የሱስ ክርስቶሳ ባጋር ኑ ጾሳር ጬቅንትዛ።

12 ዝን ፐቲ አꬃይ ባጋር ናጋራ Ꮊ አላማ ገሌዛ። የ ናጋራይ ባጋር Ꮊይቆ የኤዛ። አሲ ኡቢታይ ናጋራ ኦꬄዝ ግሾስ Ꮊይቆ አስ ኮች ኡባ ሄሌዛ። [a] 13 ህገ እንግንቶዳይፕ ቲና አላመል ናጋራ የዛ፥ ዝን ህገ ባ ዎደ ናጋራ ናጋራ ማቂ ፓይድንተካያ። 14 ዝን አዳመፐ ሙሰ ሄሎዳይስ Ꮊይቆ አስ ኡባ ሞዴዛ። ሀራ አቶዝን፥ አዳማ ጋርክ ህገስ ኪትንታም እጺ፥ ናጋራ ኦꬄካዝታይስ ጉጅካ Ꮊይቆ ካዉቴዛ።

አዳማ የኦዳይስ የዛይስ ኣዝሶ። 15 ዝን ጾስ ኣꬎ ኬሃትꬃይ ፐቲ አꬃይ ናጋራይ ጋርክ ባያ። ፐቲ አስ ናጋራ ባጋር ጋመ አሳይ Ꮊይቄዛ። ዝን የሱስ ክርስቶሳ ባጋር ጾስ ኣꬎ ኬሄትꬃይ ጋምታይስ ኣꬊ ጋንጊ እንግንቴዛ። 16 ፐቲ አꬃይ ናጋራይ ጋንጨኔ ጾስ እሞታይ ጋንጨ ጋመ ዱማትꬂ የዛ። ፐቲ አስ ናጋራ ባጋር ጾሲ ፕርዳ ከኤዛ። ዝን አሳይ ጋመ ናጋራ ኦꬅኮካ ጾስ ኣꬎ ኬሄትꬃይ ጽሎትꬅ ከኤዛ። 17 ፐቲ አሳይ ናጋራ ባጋር Ꮊይቆ ካዉቴዛ። ዝን የሱስ ክርስቶሳ ባጋር ፑጬዝ ጾስ ኣꬎ ኬሄትꬅኔ ጽሎትꬅ እሞታ ኤክዛ ኡባይ፥ ጋሚ ደኦር የዞዳ።

18 ይኬ፥ ፐቲ አሲ ናጋራ ኦꬄዝ ባጋር አስ ኡባይል አፋ ፕርዳ የኤዛይ ጋርክ ፐቲ አሲ ጽሎ ኦꬄዝ ባጋር፥ ጾስ አስ ኡባ ጽልሲ ደኦ እንጌዛ። 19 ፐቲ አሲ ኪትንታም እጼዝ ባጋር፥ ጋመ አሳይ ናጋራንቾ ማቄዛይ ጋርክ ፐቲ አስ ኪትንትꬃር ጋመ አሳይ ጽሎ ማቆዳ።

20 አሳይ ናጋራ ዎልቃ ኤሮድ ጋርክ ህገ የኤዛ፥ ዝን ናጋራ ዎልቃይ ጋንጌዝ ዎደ ጾስ ኣꬎ ኬሄትꬃይ ኣꬊ ጋንጌዛ። 21 ናጋራ Ꮊይቆ ዎልቃር ካዉቴዛይ ጋርክ ጾስ ኣꬎ ኬሄትꬃይ ጽሎትꬅ ዎልቃር ካዉቲ፥ ኑ ጎዳ የሱስ ክርስቶሳ ባጋር ኑና መꬍናስ ደኦኮ ካልꬅዛ።

<- ኦሮመ 4ኦሮመ 6 ->