1 የይ ግሾስ፥ ነኖ ሀራ አሳል አፋ ፕርድዛዮ፥ ኔኒ ሳንከ ሽሽዛባዝ ባያ። ኔኒ ሀራ አሳል አፋ ፕርድታር፥ የ ነ ፕርድዛ አꬃይ ጋርክ ኦꬅኮ፥ ነ፥ ኔል አፋ ፕርድዛ። [a] 2 የይ ጋርክ ኦꬅዝታይል አፋ ጾሲ ጽሎ ፕርዳ ፕርድዛ ኑ ኤርዛ። 3 ነኖ፥ የይ ጋርክ ኦሶ ኦꬅዝታይል አፋ ፕርድዛዮ፥ ኡንቲ ኦꬅዛኒ ጋርክ ኦꬅዛዮ፥ ኔኒ ጾስ ፕርዳፕ አቶድባዝ ኣዝኔ? 4 ዎይ ጾስ ኬሄትꬃ፥ ጋርዦኔ ዳንዳአ ዱረትꬃ ነ ለቅኔ? ጾሲ ኔስ ኬሄዛይ ነና ናጋራፕ ማሆዳይስ ማቅዛና ኤሮሳኔ?

5 ዝን ይንትስ ምኖኔ ማሮተꬅ ገሎዋ ዎዝና የዛ። የይ ግሾስ፥ ጾስ ሴራይኔ ጽሎ ፕርዳይ በንትዝ ጋላስ፥ ኔል አፋ ፕርዳይ ኩሮድ ጋርክ ኡድዛ። 6 ጾሳይ ፐታይስ ፐታይስ ኤ ኦሳት ጋርክ እማዳ። [b] 7 ሎኦ ኦሶር ሚንጊ፥ ጋላታ፥ ቦንቾኔ ꬋቦዋ ደኦ ኮይዝታይስ ጾሳይ መꬍና ደኦ እማዳ። 8 ዝን ፋና ሲቅዝታ፥ ቱማ እጽዝታኔ ኢታ ባዝ ኦꬆዳይስ ኮይዝታይል አፋ ጾስ ሴራኔ ጋዶ የኦዳ። 9 ኢታ ባዝ ኦꬅዝ አስ ኡብታ፥ ቲናቲ አይሁድታ፥ ኤዛይፕ ግርኬ አሳ መቶኔ ኡንአ ሄሎዳ። 10 ዝን ጾስ ሎኦ ኦሶ ኦꬅዝ ኡባይስ፥ ቲናቲ አይሁድታይስ፥ ካሊ ግርኬስ ጋላታ፥ ቦንቾኔ ሳሮትꬅ እማዳ። 11 ጾሳይ አስ ኣፈ ብኢ ሻኮያ። [c]

12 ህገ ባ ናጋራ ኦꬄዝ ኡቢታይ ህገ ባ ꬋቦድ። ህገ የዝን፥ ናጋራ ኦꬄዝ ኡባይ ህገር ፕርድንቶዳ። 13 ጾስ ቲና ጽልዝታይ ህገ ናግዝታይፕ አትን ህገ ስስ ኣዳ ስእዝታ ባያ። 14 ህገ ባ አይሁደ ባ አሳይ መꬎር ህገ ኪትዛ ኦꬅዛ። ኡንትስ ህጋይ ባ እጽኮካ ኡንቲ ፋ ዎዝናር ህገ ኤርዛ። 15 ኡ ሀኖታይ፥ ህገ ኪታይ ኡ ዎዝናይድ ጻፍንቴዛና ቤዝዛ። ማ ኡ ካሃይ ኡንታል አፋ ማርካትዛ። ኡ ቆፋይ ፐቲ ፐቲ ቶኬ ኡንታል ቡታ ግ ሞትዛ፤ ፐቲ ፐቲ ቶኬ ኡንታን ሉለ ግዛ። 16 ታ ታማርሴዝ ዎንግለ ጋርክ ጾሳይ የሱሳ ክርስቶሳ ባጋር አስ ዎዝና ጋንጨ ቆስንቴዝ ቆፋ ፕርድዛ ዎደ የይ ኤርንቶዳ።

17 ዝን ነ ነና አይሁደ ግዛ፤ ህገል ካትዛ፤ ጾሳር የዝ የሳይድ ነ ጋይርዛ። 18 ነ ኦꬆድ ጋርክ ጾሲ ኮይዝ ባዝ አብዛኮ ኤርዛ። ህገ ታማሬዝ ግሾስ ቱማ ማቅዝባዝ ሻጊ ኤርዛ። 19 ኔኒ ቶእታ ካልꬅዛ፥ ማ ꬉማ የዝታይስ ፖኦ ማቅዛና ሻኪ ኤርዛ። 20 ኔኒ ህጋይፕ ደንጌዝ ኤረትꬃይራኔ ቱማትꬃይር ቦዝታ ኤርስዛኔ ዱድታ ታማርስዛ ማቅዛና ኤርዛ። 21 የዝን፥ ነ ሀራ አስ ታማርስዛይ ነ ነና አብስ ታማርሶሳ? ኔኒ፥ «ካስትፐ» ግ ሳባክታር፥ ኔኒ ነ ኡባስ ካስትኔ? 22 ኔኒ፥ «ላምፐ» ጊታር፥ ኔኒ ነ ኡባስ ላምኔ? ኔኒ ኤቃ እጽታር፥ ኤቃር የዝ ካራ ቦንቂኔ? 23 ኔኒ ጾስ ህጋይድ ጬቅንትዛ፥ ዝን ህጋይስ ኪትንታም እጺ ጾሳ ዬላꬅኔ? 24 ጌሻ ማጻፋይድ፥ «ይ ሳንከር ጾሳ ሱንꬃይ አይሁደ ባ አሳይር ጫዥንትዛ» ግንትንቲ ጻፍንቴዛ። [d]

25 ነ ህገስ ኪትንትኮ፥ ነ ዶካልንታይ አድዛ፥ ዝን ኔኒ ህገስ ኪትንታም እጽኮ ነ ዶኮልንተካዛይ ጋርክ ማቅዛ። 26 አይሁደ ማቀካ አስ ዶካልንተካ የዛር፥ ህገስ ኪትንትኮ፥ ጾሳይ ኤዛ ዶካልንቴዝ ጋርክ ፓይዶሳ? 27 ይ፥ አይሁደ አሳይ፥ ይንትስ ጻፍንቴዝ ህጋይኔ ዶኮልንቲ የዝን፥ ይ ህገስ ኪትንታም እጽኮ፥ አይሁደ ባ አሳይ ዶካልንታም እጽኮካ ህገስ ኪትንቲ፥ ይንታል አፋ ፕርዶዳ።

28 ይኬ፥ ሱንꬃር አይሁደ ማቄዝ ኡቢታይ ቱማ አይሁደ ባያ። በንትዝ አሾ ዶካልንታይ ቱማ ዶኮልንቶ ባያ። 29 ዝን ቱማ አይሁደትꬅ ጋንጨ ባጋር አይሁደ ማቅዛ። ቱማ ዶካልንታይ ጾስ አያናር ሀንዝ ዎዝና ዶካልንቶፕ አትን ጻፍንቴዝ ህጋይድ ሀንዝ ጋላ ጋቾ ባያ። የ አꬃይ ጋላታ ጾሳፕ ኤክዛፕ አትን አሳፕ ባያ። [e]

<- ኦሮመ 1ኦሮመ 3 ->