1 ክንክራ ካታማ ጋንጨ የዝ ዎሳ ኬꬃ ኦꬅዛ ኑ ምሽት ፌበና ሎኦ ማች ማቅዛና ይ ኤሮድ ጋርክ ታ ኮይዛ። 2 ይ እዞ አማንዛ አስታይ ጎዳይ ሱንꬃር ሞኮዳይስ ቤዝዛ አማንዛ አስታይፕ ፐታይ ጋርክ ሞኮይታ። እዛ ይንታፕ ኮይዝ ባዝ ኡባ እዞ ማዶይታ። እዛ ፋ ኡባስ ጋመ አስ ማዴዛ፤ ማ ታና ታ ባጋር ኡንደና ማዴዛ።

3 ክርስቶሳ የሱሳ ኦሳ ታር ዎላ ኦꬅዝ ጵርስቅላራኔ አቅላ ታ ቆ ሳሮ ጎይታ። [a] 4 ኡንቲ ታ ግሾስ ፋ ሸምፖ Ꮊይቆስ ኣꬂ እንጌዛ። ታ ኣዳ ባዝን አይሁደ ባ አሳይ ዎሳ ኬꬅታይ ኡቢታይ ኡንታን ጋላትዛ። 5 ኡ ካራ ሺቅዝ አማንዛ አሳ ታ ቆ ሳሮ ጎይታ።

ኢስያ ቢታ ክርስቶሳና ቲን አማኔዛኔ፥ ታ ቃꬍዛ ኤጳነጾሳስ ታ ሳሮꬃ ኦዶይታ።

6 ይ ግሾስ ኦሶር ጋመ ዳቡሬዝ ማይራሞ ሳሮ ጎይታ። 7 ታር አች ካራ ጋምኤዝታ አይሁደ ዳብታ አንድሮንቆሳራኔ ዩልያናራ ሳሮ ጎይታ። ኡንቲ የሱሳ ሀዋርታይ ጋንጨ ኤርንቴዝታ። ማ ኡንቲ ክርስቶሳ ታፕ ቲና አማኔዛ።

8 ጎዳ አማንዛ ታ ሲቆ ላጋ፥ አምጲልያጾሳ ሳሮ ጎይታ። 9 ክርስቶሳ ኦሳ ኑር ዎላ ኦꬅዝ ኡርባኖሰራ ታ ቃꬍዛ እስታኩሳ ሳሮ ጎይታ። 10 ክርስቶሳር የሳይ ማርካትንቴዝ አጸልሳስ ታ ሳሮꬃ ኦዶይታ። አርስጻቡሎ ካራ አሳይስ ታ ሳሮꬃ ኦዶይታ። 11 ታ አይሁደ ላጋ ሄሮድዮና ሳሮ ጎይታ።

ናርስሳራ ኤ ካራ አሳይፕ ክርስቶሳ አማኔዝታ ሳሮ ጎይታ።

12 ጎዳይ ኦሶር ዳቡርዝ ማች ጽሩፋይናራኔ ጽሩፎሳ ሳሮ ጎይታ። ማ ጎዳይስ ጋመ ዳቡሪ ኦꬅዝ፥ ታ ቃꬍዛ ጸርስሶ ሳሮ ጎይታ። 13 ጎዳይ ኦሶር ሎእꬂ ኤርንቴዝ ሩፎሳሳራኔ ታና ፋ ናአ ጋርክ ብእዛ ኤ እንዳትስ ታ ሳሮꬃ ኦዶይታ። [b] 14 አስቂርጾሳ፥ ፍለሶንጻ፥ ሄርመንሳ፥ ጳትሮባሳስራ ኡንታር የዝ አማንዛ እሽታ ኡባይስ ታ ሳሮꬃ ኦዶይታ። 15 ፍሎሎጉሳ፥ ዩልያ፥ ኔራ፥ ኤ ምሽቶ፥ ኦሉምፖሳራ ኡንታር የዝ ጌሽታ ኡብታ ሳሮ ጎይታ።

16 ጌሽ ዬራ ዬርንትታር፥ ፐታይ ፐታ ሳሮꬆይታ። ክርስቶሳ ዎሳ ኬꬅ ኡቢታይ ይንታን ሳሮ ዬግዛ።

17 ታ እሹንꬆ፥ ይ ታማሬዝ ትምርታ እጺ፥ ይ ጋንጨ ሻክንቶኔ መቶ መꬍዝ አስታይፕ ናግንቶይታ። ኡንታፕ ሃኮይታ። 18 የይ ጋርክ አሳይ ፋ ኡሎስ ኦꬅዛፕ አትን ኑ ጎዳ ክርስቶሳስ ኦꬆያ። ፋ ሊቆ ዶናራኔ ዎርዶ ቃላር ሃዮ ዎዛና ባልꬅዛ። 19 ዎንግላይስ ይ ኪትንቴዛና አስ ኡቢታይ ስኤዛይ ታና ኡፋይስዛ። ዝን ይ ሎኦ ባዝስ ኤጫ ኢታ ባዝስ ቦዞዳና ታ ኮይዛ። 20 ሳሮ ጾሳይ ጻላሃና ይ ቶካይፕ ኦሞር ኤልሲ ጋጮዳ።

ኑ ጎዳ የሱስ ክርስቶሳ ኣꬎ ኬሄትꬃይ ይንታር ማቆ።

21 ታር ኦꬅዝ ጽማቶሳ፥ [c] ታ ዳብታይ ሉቅዮሳ፥ ያሶነራ ሶስጲጽሮሳ ይንታን ሳሮ ዬግዛ።

22 Ꮊ ዳብዳባ ጻፌዝ ታኒ፥ ጻርጽዮሳ፥ ይንታን ጎዳይ ሱንꬃር ሳሮ ዬግዛ።

23 ታና ሞኬዛይኔ ዎሳ ኬꬅ ኡቢታይ ሞክዛ ጋዮሳ፥ ይንታን ሳሮ ጌዛ። ካታማ ሚሸ አይክዝ ኤራስጾሳራ ኑ እሻ ቃርጾሳ ይንታን ሳሮ ዬግዛ። [d] 24 [ኑ ጎዳ የሱስ ክርስቶሳ ኣꬎ ኬሄትꬃይ ይ ኡባይር ማቆ። አምንኤ።][e][f]

25 ጾስስ ጋላታ ማቆ። ታኒ፥ የሱስ ክርስቶሳ ባዝ ኦድዝ ዎንግለ ቃላይር ብኒ ዎደፕ አይኪ ቆስንቲ ጋምኤዝ ቱማትꬃር፥ ጾሳይ ይንታን አማኖር ሚንꬂ ኤሶዳይስ ዳንዳእዛ። 26 ዝን Ꮊት የ ቱማይ በንቴዛ። ካተትꬂ ኡቢታይ አማኒ ኪትንቶዳይ ጋርክ መꬍና ጾሳ ኪታር ናብታይ የ ቱማባዝ ጻፌዛ።

27 የሱስ ክርስቶሳ ባጋር ኤጨትꬂ ኤ ኣዳስ የዛ፥ ፐቲ ጾሳይስ መꬍናስ ቦንቾ ማቆ። አምንኤ።

<- ኦሮመ 15