15
ዉርስꬅ ቦሽታ
1 ታኒ ሳሎል ሀራ ዳማኔ ፓላ ማላባዝ በኤዛ። ጾስ ዉርስꬃ ካች ፖልዛ ላፑን ቦሽታ አይኬዝ ላፑን ኪታንችታ ታ በኤዛ።
2 የይፕ ጉየ ታማር ዋላክንቴዝ ቡርጩኮ አባ ኣዝዛ ባዝ ታ በኤዛ። የ አባይ ጋጻ ዶአ፥ ኤ ምስላኔ ኤ ሱንꬃይ ታይባ ጋሜዝታ ታ በኤዛ። ጾሲ ኡንትስ እንጌዝ ዲꬃ አይኪ ቡርጩኮ አባል ኤቄዛ። 3 ኡንቲ ጾስ አይለ ሙሰ ማዝሙራኔ ዱራይ ማዝሙራና Ꮊይ ጋርክ ዬጊ የጼዛ።
«ጎዳዮ፥ ኡባፕ ዎልቃማ ጾሳዮ፥
ነ ኦሳይ ዳማኔ ማላባዚ።
ዎያ ኡባይስ ካታዮ፥
ነ ኦጋይ ጽሎኔ ቱማ። [a]
4 ጌሺ ነ ኣዳ ማቄዝ ግሾስ
ጎዳዮ፥ ኔስ ያሽቶዛይኔ
ነ ሱንꬃ ቦንቾዛይ ኦኖ?
ነ ጽሎ ኦሳይ አስ ኡባይስ ቆንጨ ማቄዝ ግሾስ ዎያ
ኡባይ ነ ቲና ይኢ ጎይኖዳ»
ዬጊ የጽዛ። [b]
5 የይፕ ጉየ፥ ሳሎ ዶይንቲ የዝ ማርካትꬅ ዱንካነ ማቄዝ ጾስ ኬꬃ ታ በኤዛ። [c] 6 ላፑን ቦሽታ አይኬዝ ላፑን ኪታንችታይ ጾስ ኬꬃይፕ ከዜዝ። ኡንቲ ጌሽኔ ፖጭዝ ሊኖ ማኦ ማኤዛ፤ ፋ ትራል ዎርቀ ዳንጮ ዳንጬዛ። 7 ኦይዲ መትꬅታይፕ ፐታይ፥ መꬍናስ የዝ ጾስ ካቺ ኩሜዝ ላፑን ዎርቃ ጹእታ ላፑን ኪታንችታይስ እንጌዛ። 8 ጾስ ቦንቻይፐኔ ኤ ዎልቃይፕ ደንዴዛይድ ጾስ ኬꬃይ ጩያር ኩሜዛ። ላፑን ኪታንችታይ አይኬዝ ላፑን ቦሽታይ ፖልንቶድ ሄሎዳይስ ጾስ ካራ ኦንካ ገሎዳይስ ዳንዳኤካያ። [d]
<- ዋንሳ ቆንጭꬃ 14ዋንሳ ቆንጭꬃ 16 ->