ዋንሳ 19

የሱሳ ሶትንቶዳይ ጋርከ ፕርዴዛ።

(ማቶ. 27:27-32፤ ማር. 15:15-21)

1 የይፕ ጉየ፥ ጵላጾሳ የሱሳና ጋራፍሴዛ። 2 ዎታዳርታይ አንጉንꬅ ዛዉደ መꬊ ኤ ኦማይል ጋዴዛ። ማ ዞቆ አፍላ ኤዛ ማእሴዛ። 3 ኤዝኮ ሺቂ፥ «አይሁደ ካታዮ፥ መꬍናስ ካዉቶባ» ዬጊ ኤዛ ባቄዛ።

4 ጵላጾሳ ማካ ባለ ከዚ፥ አይሁድታይኮ፥ «ዬዛኮ፥ ታኒ ኤፕ አባ ኢታካ ደንገካዛ ይ ኤሮድ ጋርክ ኤዛ ይንትኮ ባለ ከሶዳ» ዬጌዛ። 5 የይፕ ጉየ፥ የሱሳ አንጉንꬅ ዛዉደ ፋ ኦማል ጋዲ፥ ዞቆ አፍላ ማኢ፥ ባለ ከዜዝ። ጵላጾሳ አይሁድታይኮ፥ «አꬃ Ꮊያ ቦኦይታ» ዬጌዛ።

6 ቄሰ ሀላቅታይኔ ጾሳ ኬꬅ ናግዝታይ ኤዛ በኤዝ ዎደ ፋ ቃላ ꬎቅ ኡዲ፥ «ማዝቃለል አፋ ሶቶባ! ሶቶባ!» ዬጌዛ።

ጵላጾሳ ኡንትኮ፥ «ይ ኤዛ ካንጊ፥ ማዝቃለል አፋ ሶቶይታ። ታኒ ኤፕ አባ ኢታካ ደንገካያ» ዬጌዛ።

7 አይሁድታይ ማሂ፥ «ኑስ ህጋይ የዛ። ኤ ፋና ጾስ ናአ ኦꬄዝ ግሾስ ኑ ህጋይ ጋርክ ኤ Ꮊይቆዳይስ ቤዝዛ» ዬጌዛ።

8 ጵላጾሳ የያ ስኤዝ ዎደ ቲናሳይፕ ኢታ ያሽቴዛ። 9 ማካ ጵላጾሳ ፋ ኦሶ ኬꬅ ማቂ ገሊ የሱሳኮ፥ «ኔኒ አናፕ የኤኔ?» ዬጊ ኦይጬዛ። ዝን የሱሳ ኤዝስ አብካ ማሄካያ። 10 የይ ግሾስ፥ ጵላጾሳ፥ «ታስ ኦዶሳ? ነና ብሎዳይስ ዎይ ማዝቃለል አፋ ሶቶዳይስ ታስ ማዉተ የዛና ኤሮሳ?» ዬጌዛ።

11 የሱሳ፥ «ጾሳይ ኔስ ስልጻኔ እንገካባዝ ማቄዛኮ ታል አፋ ስልጻኔ ኔስ ባቦናዝን። የይ ግሾስ፥ ታና ኔስ ኣꬂ እንጌዛይ ኣꬊዝ ናጋራ ኦꬄዛ» ዬጌዛ።

(ማቶ. 27:15-31፤ ማር. 15:6-20፤ ሉቃ. 23:13-25)

12 ጵላጾሳ የያ ስኤዝ ዎደ የሱሳ ብሎዳይስ ኦገ ኮዬዛ። ዝን አይሁድታይ ፋ ቃላ ꬎቅ ኡዲ፥ «ኔኒ ኤዛ ብልዝባዝ ማቅኮ ካታይ ቄሳረ ባጋ ባያ። ፋና ካተ ግዝ ኦንካ ቄሳረስ ሞርከ» ዬጌዛ።

13 ጵላጾሳ የያ ስኢ የሱሳ ባለ ከሲ «ሎቼ ሹች» ዬግዝ ቤስ ፕርደ ኦይደል በቴዛ። እብራይስጸ ቃላይር የ አቃይ «ገበታ» ጉሲ። 14 የ ጋላሳይ ፓዝቃ ባለ ቦንቾዳይስ ጊግንቶ ጋላስ። የ ዎደ ሳአ ኡሱፑን ሳተ ሄራ። ጵላጾሳ አይሁድታይኮ፥ «ይ ካታ Ꮊያ ቦኦይታ» ዬጌዛ።

15 አይሁድታይ ፋ ቃላ ꬎቅ ኡዲ፥ «ꬋብሶባ! ꬋብሶባ! ማዝቃለል አፋ ሶቶባ» ዬጌዛ።

ጵላጾሳ ማሂ፥ «ይ ካታ ታኒ ማዝቃለል አፋ ሶቶዳይስ ኮይኔ?» ዬጊ ኦይጬዛ።

ቄሰ ሀላቅታይ፥ «ቄሳረፕ ሀራ ካት ኑስ ባያ» ዬጌዛ።

16 የይፕ ጉየ፥ ኡንቲ የሱሳ ማዝቃለል አፋ ሶቶድ ጋርክ ጵላጾሳ ኡንትስ ኣꬂ እንጌዛ።

ኡንቲ የሱሳ አይኪ ካንጌዛ።

የሱሳ ሶትንታ

(ማቶ. 27:32-44፤ ማር. 15:21-32፤ ሉቃ. 23:26-43)

17 የሱሳ ፋ ማዝቃላ ቶኪ፥ «ኦማ ኦታ» ግዝ አቆ Ꮊንጌዛ። «ኦማ ኦታ» ጉሳይ እብራይስጸ ቃላይር «ጎልጎታ» ጉሲ። 18 ኡንቲ የ አቃይድ ማዝቃለል አፋ የሱሳ ሶቴዛ። ማ ኤዛር ሀራ ናምኢ አስታ፥ ፐታ ገደ ባጋር Ꮊንካ Ꮊና ባጋር ማዝቃለል አፋ ሶቴዛ። 19 ጵላጾሳ፥ «አይሁድታይ ካት፥ ናዝረተ የሱሳ» ዬግዝ ጹፈ ጻፊ ማዝቃለል አፋ ጋዴዛ። 20 የሱሳ ማዝቃለል አፋ ሶትንቴዝ አቃይ ካታማስ ካለ የዝ ግሾስ ጋመ አይሁድታይ የ ጹፋ ናባቤዛ። ጹፋይ ጻፍንቴዛይ እብራይስጸ ዶናር፥ ላትኔ ዶናራኔ ግርከ ዶናራ። 21 የይ ግሾስ፥ ቄሰ ሀላቅታይ ጵላጾሳኮ፥ «‹Ꮊ አꬃይ ፋና አይሁደ ካት ዬጌዛ› ግ ጻፎባፕ አትን ‹አይሁደ ካት› ግ ጻፍፐ» ዬጌዛ።

22 የዝን፥ ጵላጾሳ፥ «ታ ጻፌዛና ጻፌዛ» ዬጊ ማሄዛ።

23 ዎታዳርታይ ማዝቃለል አፋ ኤዛ ሶቴዛይፕ ጉየ ኤ አፍላ ኤኪ፥ ኦይዲ አቆ ዎላ ቆእንቲ፥ ፐቶ ፐቶ ኤኬዛ። ኤ አፋር ኦሊ ማእዛ አዱሰ አፍላ ኤኬዛ። 24 ዎታዳርታይ፥ «ኦና ሄሎዳዛኮ፥ እጻ ኦሎዳይፕ አትን አፍላ ፐርአሚ» ዬጌዛ። የይ ሀኔዛይ ጌሻ ማጻፋይድ፥

«ታ አፍላ ሻኪ ኤኬዛ፤

ታ አዱሰ አፍላ ጉጅካ እጻ ኦሌዛ»

ግንትንትዛይ ፖልንቶድ ጋርከ። የይ ግሾስ፥ ዎታዳርታይ የያ ኦꬄዛ።

25 ዝን የሱሳ ማዝቃለ ካለ ኤ እንዳት፥ ኤ እንዳት ምሽት፥ ቀልዮጰ ማቻት ማይራምራ ማግዴላ ማይራማ ኤቄዛ። 26 የሱሳ ፋ እንዳትኔ ኤ ቃꬍዛ ታማራይ ኤዛይድ ኤቄዝታ ብኢ፥ ፋ እንዳትኮ፥ «ታ እንዳቴ፥ ነ ናአ Ꮊያ ቦኦባ» ዬጌዛ።

27 የይፕ ጉየ፥ የ ታማራይኮ፥ «ነ እንዳት Ꮊኖ ቦኦባ» ዬጌዛ። የ ታማራይ እዞ የ ዎደፕ አይኪ ፋ ካራ ካንጌዛ።

የሱሳ Ꮊይቄዛ

(ማቶ. 27:45-56፤ ማር. 15:33-41፤ ሉቃ. 23:44-49)

28 የይፕ ጉየ፥ የሱሳ ኡባይ Ꮊት ፖልንቴዛና ኤሪ፥ ጌሻ ማጻፋይድ ጻፍንቴዛይ ፖልንቶድ ጋርክ «ታና ሳምዛ» ዬጌዛ።

29 የ አቃይድ ፐቲ ጹጋ ኩንꬅ ጫላ ዎይነ የዛ። ኡንቲ ዛንዛ የ ዎይናይድ ኦሊ፥ ህሶጰ ምꬂ ጼራል ጋዲ፥ የሱሳ ዶናይኮ ሺሼዛ። 30 የሱሳ ዎይና ጋንጺ ብኢ፥ «ፖልንቴዛ» ዬጌዛ።

የይፕ ጉየ፥ ፋ ሞርጋ ዝቅ ኡዲ ፋ ሸምፓ እንጌዛ።

የሱሳ ምያ ቶራር ጫዴዛ

31 የ ጋላስ ጊግንቶ ጋላስ ማቅዝ ግሾኔ ዎንትꬃ ጋላሳይ ቦንቾ ማላ ማቅዝ ግሾስ አሳይ አሃይ ማዝቃለል አፋ ማላ ጋላስ ፔዣም ጋርክ ኡንታን ቶካ መንꬂ፥ ማዝቃላይፕ ዎꬍሶዳይ ጋርክ አይሁድታይ ጵላጾሳ ዎሴዛ። 32 የይ ግሾስ፥ ዎታዳርታይ Ꮊንጊ፥ የሱሳር ሶትንቴዝ ናምኢ አሳይ ቶካ መንꬄዛ። 33 ዝን የሱሳኮ የኤዝ ዎደ ኤ Ꮊይቄዛ ብኢ፥ ኤ ቶካ መንꬄካያ። 34 ዝን ዎታዳርታይፕ ፐታይ ኤ ምያ ቶራር ጫድን ኤለ ሱꬅኔ ሃꬂ ጎጌዛ። 35 ይ አማኖድ ጋርክ የያ በኤዛይ ማርካቴዛ። ኤ ማርካትꬃይካ ቱማ። ማ የይፕ ኤ ኦሳ ኦድዛይ ቱማ ማቄዛ ኤርዛ። 36 የይ ሀኔዛይ ጌሻ ማጻፋይ፥ «ኤ መቀꬅታይፕ ፐቲ ባዝካ መቀና» ጌዛይ ፖልንቶድ ጋርከ። 37 ማካ ጌሻ ማጻፋይ ሀራ አቆ፥ «ኡንትካ ፋ ጫዴዛና በአዳ» ዬጌዛ።

የሱሳ ሞግንቴዛ

(ማቶ. 27:57-61፤ ማር. 15:42-47፤ ሉቃ. 23:50-56)

38 የይፕ ጉየ፥ አርማታሳ ግዝ ካታማፕ የኤዝ ዮሴፋ የሱሳ አሃ ኤኮዳይስ ጵላጾሳ ዎሴዛ። ዮሴፋ አይሁድታይስ ያሽቴዝ ግሾስ ቆሶር የሱሳ ካልዛ።

ጵላጾሳ፥ «ኤኮባ» ዬጌዛ። የይ ግሾስ፥ ዮሴፋ ሺቂ የሱሳ አሃ ኤኬዛ። 39 ማ የይፕ ንቆድሞሳ፥ Ꮊይፕ ቲን የሱሳኮ ቃማ የኤዛይ፥ ካርበኔ ጎዳረ ኡꬃራ ዋላክንቴዝ ፐቲ ክሎ ግራመ ማቅዝ ሽቶ ኤኪ ዮሴፋር ዎላ የኤዛ። 40 የ ናምኢ አስታይ የሱስ አሃ ኤኪ፥ አይሁድታይ አሃ ዚꬍꬅ ዎጋር፥ ሽቶራ፥ ሞጎ አፍላር ሳዋጼዛ። 41 የሱሳ ሶትንቴዝ አቃይ አታክልተ ጋደ። የ አታክልተ ጋንጨ ሹቻፕ ዎጭንት ጊጌዝ ቲና ኦንካ ሞግንተካ ኦሮꬅ ዱፋይ የዛ። 42 የ ዱፋይ ላንቀ የዝ ግሾኔ አይሁድታይ ማላስ ጊግንትዛ ጋላስ ማቄዝ ግሾስ የሱሳ አሃ ሞጌዛ።

<- ዋንሳ 18 ዋንሳ 20 ->