1 ታ እሹንꬆ፥ ይ ኑ ቦንቾ ጎዳ የሱስ ክርስቶሳ አማንዛ ማቅኮ፥ አስ ኣፈ ብኢ አስ ቦንችፓተ። 2 ኣዝሶስ፥ ዎርቀ ምግዶ ኣꬂ፥ ሎኦ አፍላ ማኤዝ ዱረ አስ ይ ሺቃይድ የኤዛ። ማ ጩርቃ አፍላ ማኤዝ ማንቆ አስካ የኤዛ። 3 ሎኦ አፍላ ማኤዝ አꬃ ይ ኣꬂ ቦንቺ፥ «ነ Ꮊኔ ሎእዛ ኦይዳትል በቶባ» ግ፥ ማ ማንቆ አꬃ፥ «ነ ኤዛይድ ኤቆባ ዎይ Ꮊኔ ታ ቶኬ ላንቃተ ሳአ በቶባ» ይ ዬግዛ። 4 የዝን፥ ይንቲ፥ ይ ጋንጨ ሻኮ መꬌዝታኔ ኢታ ቆፋር የዝ ዳይንታይ ጋርክ ባሳኔ?

5 ታ ሲቆ እሹንꬆ፥ ስኦይታ። አማኖር ዱረ ማቃድ ጋርክ ፋና ቃꬍዝታይስ እማድ ጌዝ ሳሎ ካተትꬂ ላቶድ ጋርክ Ꮊ ሳአል ዬዚ ማንቅታ ጾሳይ ዶረካሳኔ? 6 ዝን ይ ማንቅታ ቶችዛ። ይንታን ጪጵችዝታይኔ ፕርደ ኬꬅ ጎችዝታይ ዱርታ ባሳኔ? ይንታን ዳይና ቲና ጎችዝታይ ኡንታን ባሳኔ? 7 ይ ጼግንቴዝ ቦንቾ ሱንꬃ ጫዥዝታይ ኡንታን ባሳኔ?

8 ዝን ጌሻ ማጻፋይድ፥ «አስ ኡባ ነና ነ ቃꬍዛይ ጋርክ ቃꬎባ» ግንትንቲ ጻፍንቴዝ ጾስ ካተትꬅ ህጋ ይ ፖልኮ ሎኦ ባዝ ኦꬅዛ።[a] 9 ዝን ይ አስ ኣፈ ብኢ ቦንችኮ፥ ናጋራ ኦꬅዛ፥ ማ ህጋይ ይንታን ህገ መንꬄዝ አስ ጋርክ ፕርዶዳ። 10 ኦንካ ጾስ ህገ ኡባፕ ፐታ አሺ፥ አቴዝታ ኡባ ናግኮ ኡባና መንꬄዛይ ጋርክ ታይብንትዛ። 11 «ላምፐ» ጌዝ ጎዳይ፥ ማ «ዎꬍፐ» ጌዛ። ዝን ኔኒ ላመካ አቲ ዎꬌዝ ማቅኮ፥ ህገ መንꬄዛ።[b] 12 ዋሎ ከስዛ ህገ ቲና ፕርደ ኤኮዳይስ የዝ አስ ጋርክ ኦድንቶይታነ ኦꬆይታ። 13 አስ ማሮዋ ኦናካ ጾሲ ፕርዶዳ ማሮትꬅ ባይꬅ ፕርዶዳ። ማቆዝን ማሮትꬅ ፕርዳ ጋምዛ።

14 ታ እሹንꬆ፥ ይንትፕ ፐቲ አሲ ታስ አማኖ የዛ ግ፥ ፋ አማኖ ኦሶር ቤዘካ አትኮ ኤዛ አብ ማዶዴ? ኤ አማናይ ኤዛ አሾዳይስ ዳንዳእኔ? 15 ኣዝሶስ ፐቲ እሻይ ዎይ ፐቲ ምሽታ ካሎትኮኔ ኡንትስ ሚዝባዝ ꬋብኮ፥ 16 ይንትፕ ፐቲ አሲ ኡንትኮ፥ «ሳሮ Ꮊንጎይታ! ይንታን ሆኦ! ም ምዦይታ!» ግ፥ ኮሽዛ ባዝ ኡንትስ እንገካ አትኮ ኡንታን አብ ማዴ? 17 የይ ግሾስ፥ ኦሶ ባ አማኖ ፋ ኣዳስ Ꮊይቆ።

18 ዝን ፐቲ አሲ፥ «ኔስ አማኖ የዛ፤ ማ ታስ ኦሶ የዛ። ነ ነ አማና ነ ኦሳይፕ ሻኪ ታና ቤዞባ፤ ታካ ታ አማና ታ ኦሶር ነና ቤዞዳ» ዬግዛ። 19 ኔኒ፥ ፐቲ ጾሲ የዛና አማንዛ፤ የይ የሰ። ቱና አያንታይካ አማንዛ፤ ያሻር ኩኩርዛ። 20 ነኖ ቦዛዮ! አማኖ ኦሶፕ ሻክንቲ Ꮊይቆ ማቄዛና ኤሮዳይስ ኮይኔ? 21 ኑ አዳይ አፍራመ፥ ፋ ናአ እሳቃ ያርሾ አቆል አፋ ጋዴዝ ዎደ ጽሌዛይ ፋ ኦሶር ባሳ?[c] 22 ኤ አማናኔ ኤ ኦሳይ ዎላ ኦꬄዛኔ ኤ አማናይ ኦሶር ፖልንቴዛና ቦኦሳ? 23 ጌሻ ማጻፋይ፥ «አፍራመ ጾስ አማኔዛ። ጾሳይ የያ ኤዝስ ጽሎትꬅ ኡዲ ታይቤዛ» ጌዛይ ፖልንቴዛ። ማ ኤ ጾስ ዳቦ ግንትንቲ ጼግንቴዛ። [d] 24 አሲ አማኖ ኣዳር ባዝን ኦሶር ጽልዛና ነ ብእኔ።

25 የይ ጋርከ፥ ዉሹምዛና ራአባ እስራኤለፕ ኪትንቴዝታ ሞኪ ሀራ ኦገር ኡንታን ሞይዜዝ ዎደ ፋ ኦሶር ጽለካሳ?[e]

26 ሸምፖፕ ሻክንቴዝ አሻይ Ꮊይቆ ማቄዛይ ጋርክ፥ ኦሶፕ ሻክንቴዝ አማናይካ Ꮊይቄዝባዝ።

<- ያይቆባ 1ያይቆባ 3 ->