Ittẹwọr 46

Jekọb ọmaana ẹhọhmmọr chẹ achin k'Ijip

1 Mando kwa Jekọb obin orenga ttara ọttọhk kpenamkpen f'ode fẹ. Mada okwu opyiri ka Bẹrshẹba, osi njafọhni mẹ ọnang Ibinọkpaabyi kw'otte kwẹ Isaak okpobh.

2 Okwu opyiri k'erungi, Ibinọkpaabyi oyin Jekọb abẹ k'idachen, oyer-ẹ bi, “Jekọb! Jekọb!”

Jekọb okhera bi, “Kkeri kaam ma e.”

3 Mẹ wọ, oben bi, “Kaam wọ nde Ibinọkpaabyi, Ibinọkpaabyi kw'atte kwọ okpobh, oning-ọ ojor bi achina k'Ijip, okhuri bi, kẹ wọ kwa kaam ńsọ-ọ bi, ade ẹkhọma ch'ideden. 4 Kaam ńdọn-ọ abẹ nchina k'Ijip, mbiri ńdim-ọ mkpa nnam. Josẹph wọ óde ọnọng kw'obubh-ọ chen k'obo.”

5 Iwa Jekọb obina ka Bẹrshẹba, va pẹ atzima kẹ kw'ode otte kwabẹ, ọmaana va pabẹ, ttara panọng pabẹ, ayikha k'akpaar p'ideden pa nnyanyaang mindọr, pa Phero ọkk'ọtzọhma bi, bẹ atzima atzini otte. 6 Wa Jekọb, ọmaana va pa va pẹ biphyir atzima etzirakpo pyabẹ, ọmaana ẹkhakhaama cha bẹ akk'asa k'ẹkhọma cha Kenaan, achina k'Ijip. 7 Jekọb otzima va pẹ p'ijinọng ọmaana va pabẹ, ttara va pẹ p'ipanọng ọmaana va pabẹ, ẹhọhmmọr chẹ biphyir, ochina k'Ijip.

8 Ma wọ ode che pa va p'ijinọng pa Jekọb, p'achin k'Ijip.

Reubẹn kw'ode ocheden-nwa kwa Jekọb.

9 Va p'ijinọng pa Reubẹn ade,

Hanọk, ọmaana Palu,

Hẹzrọn, ttara Karmi.

10 Va p'ijinọng pa Simeọn ade:

Jemuyẹl, ọmaana Jamin,

ọmaana Ọhad, ọmaana Jakin,

ọmaana Zoha,

ọmaana Shaul kw'ode nnwa kw'ijinọng kwa kwanọng kwẹ kw'ofon Kenaan ọmaani.

11 Va p'ijinọng pa Lẹvi ade:

Gẹrshọn, ọmaana Kohat

ọmaana Mẹrari.

12 Va p'ijinọng pa Juda ade:

Ẹr, ọmaana Ọnan, ọmaana Shẹla,

ọmaana Pẹrẹz ttara Zẹra (yina, wa Ẹr ọmaana Ọnan akk'apa k'irek sa Kenaan).

Va p'ijinọng pa Pẹrẹz ade:

Hẹzrọn ọmaana Hamul.

13 Va p'ijinọng pa Isaaka ade:

Tola, ọmaana Pua, ọmaana Jashub

ọmaana Shimrọn.

14 Va p'ijinọng pa Zẹbulun ade:

Sẹrẹd, ọmaana Ẹlọn, ọmaana Jalẹl.

15 Ma wọ ode va p'ijinọng p'iwa Lea ọmaani ọnang Jekọb k'obhon kwa Padan-Aram, akhiri ominanwa kwẹ Daina ájì. Wa va mba pẹ biphyir, adikkobh ọmaana aminava ade ẹrọbh obhiri jobh obhiri attaan.

16 Va p'ijinọng pa Gad ade:

Ziphon, ọmaana Hagi,

ọmaana Shuni, ọmaana Ẹzbọn,

ọmaana Ẹri, ọmaana Arodi,

ttara Areli.

17 Va p'ijinọng p'Ashẹr ade:

Imna,

ọmaana Ishva, ọmaana Ishvi,

ttara Beriya.

Ọgbaanọkka kwabẹ kw'ikwanọng wa ode Sẹra.

Va pa Beriya p'ijinọng ade:

Hebẹr, ọmaana Malkiyẹl.

18 Wa va chi obhiri wani bọ pa Zilpa ọmaani ọnang Jekọb. Zilpa wa ode obira kwa Laban ọkk'ọtzọkha ọnang ominanwa kwẹ Lea bi, oruk Lea abẹ.

19 Ajinọng pa Jekọb obhoni ka kwanọng kwẹ Rachẹl ade, Josẹph ọmaana Bẹnjamin. 20 Asenat kw'ode ominanwa kwa Potiphera, kw'ode ọfọhnẹja k'obhon kw'On, ọmaani Manasẹ ttara Ephraim ọnang Josẹph k'Ijip.

21 Va p'ijinọng pa Bẹnjamin ade: Bẹla, ọmaana Bẹkẹr, ọmaana Ashbẹl, ọmaana Gẹra, ọmaana Naaman, ọmaana Ehi, ọmaana Rosh, ọmaana Mupim, ọmaana Hupim, ttara Ard.

22 Va p'ijinọng biphyir pa Rachẹl ọmaani ọnang Jekọb ade ọhawani kwa chi.

23 Dan obhoni ojinọng kw'okpen Hushim.

24 Va p'ijinọng pa Naphtali ade: Jazẹl, ọmaana Guni, ọmaana Jẹzẹr ttara Shilẹm.

25 Biphyir-phyir Bilha kw'ode obira kw'iwa Laban ọtzọk ọnang ominanwa kwẹ Rachẹl, ọmaani va azenamfa ọnang Jekọb.

26 Wa ọnọng-mik kw'ọtzọni Jekọb abẹ ochina k'Ijip, ode arọbh attaan obhiri azadani akhiri panọng pa va aji, anọng mba biphyir wa bẹ afon k'ẹnọmma cha Jekọb. 27 An-atzọk va afa p'ijinọng pa Josẹph obhoni k'Ijip attara, biphyir-phyir ọnọng-mik kw'ẹhọhmmọr cha Jekọb kw'ochin k'Ijip ode: anọng arọbh attaan obhiri jobh.

28 Mẹ wọ, Jekọb ọtzọhm Juda bi, ochi eden ọkwọbha ọtza okhebha Josẹph, ọbọbh ibe sa Goshẹn owobh. Mada bẹ apyiri k'okhubha kwa Goshẹn, 29 Josẹph ọnang ẹfa bi, bẹ atzọkha akpaar p'ideden pa nnyanyaang mmindọr atzima akwu, ifha otza ore otte Israẹl kw'opyiri ka Goshẹn. Mada Josẹph ore otte bi kpaar ọkhaara otte mbọhk k'ekhokhora, obiro obhom ẹmọng k'ogbe-bhirada.

30 Jekọb oben Josẹph bi, “Mada kaam nkk'nna k'odik-ọkka bi, kọ atzima arukhi akpen ka, kaam nna mpe yina e.”

31 Mẹ wọ, Josẹph oben votte pẹ ọmaana ẹhọhmmọr ch'otte kwẹ bi, “Kaam ńchina ka Phero nda ḿgbaakh-ẹ bi, ‘Votte paam ọmaana ẹhọhmmọr ch'otte kwaam, p'iwa arukhi k'irek sa Kenaan, akk'aam atzora ka e. 32 Ajinọng mba ade akkeri-arukhimaan, bẹ akk'akwa ttara nden sabẹ, ọmaana ọttọhk kpenamkpen fabẹ biphyir.’ 33 Ọn-ọbhakhi oben votte pẹ bi, Phero oyeri bọng, ọbọbh bọng bi, ‘Mbọng vọ ode ọtzọhmbọhk fabọng?’ 34 Bọng abhina bi, ‘Itta, maman atzọhmnọng pọ mọttẹwọr k'ẹvava chaman om-otzir nden, mach'abatte paman e.’ Mẹ kẹ-khẹ wọ kwa bẹ atzima átte bọng ọbọhk, bọng aruk ka Goshẹn, okhuri bi, anọng p'akkeri-arukhimaan akpukhi anọng p'Ijip idik k'eden dama.”

<- Ittẹwọr 45 Ittẹwọr 47 ->