1 Iwa odikkobh Samwẹl om-osi ọtzọhm k'irekh-irek kw'Ẹli k'itzitzikha s'Ọvaar Ibinọkpaabyi. K'ogbe nwuma, wa ọkhaar-ọkhaara bi ọnọng ọbhaanga atzim p'ẹjaakhi p'Ọvaar Ibinọkpaabyi, idik s'anọng are ttara chen anna kibiri ihaabh.

2 Wa k'erungiwu dani, Ẹli kw'iwa oni iyaan bi kpaar dọk om-ore, oyim k'ibe s'om-okkekkeni oyima. 3 K'ogbe kw'otwikhikkaang kw'Ibinọkpaabyi on-otzima odimi, wa Samwẹl oyim k'iwuradabe s'Ọvaar Ibinọkpaabyi, kẹ da Ẹkkọhbhi ch'Echekhi ch'Ibinọkpaabyi ewobh. 4 Mẹ wọ, Ọvaar Ibinọkpaabyi oyeri Samwẹl.

Samwẹl okhera bi, “Itta, kkeri kaam ma e.” 5 Ọrọbh otzor Ẹli oben bi, “Kkeri kaam ma e; kọ wọ ayer-m.”

Yina, Ẹli obhin-ẹ bi, “Kaam kọ kinyeri. Kpa nnam atza ayima.” Mẹ wọ, Samwẹl otza oyima.

6 Ọvaar Ibinọkpaabyi obiro oyer-ẹ, “Samwẹl.” Samwẹl obiro obina otzor Ẹli, oben bi, “Kkeri kaam ma e, kọ wọ ayer-m.”

Ẹli obhin-ẹ bi, “Nnwa kwaam, kaam kọ kinyeri, kpa nnam atza ayima.”

7 Wa Samwẹl Ọvaar Ibinọkpaabyi otzim-om-oronga, bẹ ẹjaakhi ch'atzim p'Ọvaar Ibinọkpaabyi atzima-amasa anang kẹ Samwẹl.

8 Ọvaar Ibinọkpaabyi oyeri Samwẹl ottong igbe ittaan, obina otzor Ẹli oben bi, “Kkeri kaam ma e, kọ wọ ayer-m.”

Mẹ wọ, Ẹli otzin bi, Ọvaar Ibinọkpaabyi wọ om-oyeri odikkobh nwa. 9 Mẹ wọ, Ẹli oben Samwẹl bi, “Kọ rọhng atza ayima. Idikha obiro oyer-ọ, ben bi, ‘Ọvaar Ibinọkpaabyi, gbaak kkeri ọtzọhmnọng kwọ om-oyong itzọhng.’ ” Mẹ wọ, Samwẹl ofona otza oyima k'ibe sẹ.

10 Ọvaar Ibinọkpaabyi okwu obe mẹ, oyeri mach'ira om-oyeri, “Samwẹl! Samwẹl!”

Mẹ wọ, Samwẹl obhina bi, “Gbaak, kkeri ọtzọhmnọng kwọ om-oyong itzọhng.”

11 Ọvaar Ibinọkpaabyi on-oben Samwẹl bi, “Kker e, kaam nna nsi odik m'Israẹl, kw'ókkoni itzọhng kpenamkpen s'ibhaanga kwẹ. 12 M'ogbe nwuma, kaam ńttaanga nnang Ẹli, ọmaana ẹhọhmmọr chẹ, k'odik kpenamkpen kwa nkk'mgbaakha, ttẹwọr k'ittẹwọr maa apyiri k'okpong. 13 Kaam ńsi macha nkk'ẹ mgbaakha bi, mkpaara aponga p'ẹhọhmmọr chẹ m'ogbe ode, k'ẹkhọngkwuri cha kẹ orong odik okhuri kẹ bi, va pẹ p'ijinọng am-asi epyibha anang-m, yina, kẹ bẹ eden kọ̀kpa a. 14 Mẹ wọ, kaam nchekhi nnang ẹhọhmmọr ch'Ẹli bi, ‘Ẹjafọhni kede, ẹnanga kebir ede ch'éfha egbobhi oponga-pyibha kw'ẹhọhmmọr ch'Ẹli.’ ”

15 Wa Samwẹl oyima maa ewu ehobha, obina okwunga amma p'ọhọhm kw'Ọvaar Ibinọkpaabyi. Yina, wa ojora ọsẹ-ẹ bi, ọgbaak Ẹli odik kw'ore ka chen anna. 16 Yina, wa Ẹli oyer-ẹ, oben bi, “Nnwa kwaam, Samwẹl.”

Samwẹl obhin-ẹ bi, “Kkeri kaam ma e.”

17 Ẹli ọbọbh bi, “Kẹ ọgbaakh-ọ yan o? Kọ kaam odik kadubha. Tte Ibinọkpaabyi ọnang-ọ ettuma ch'ẹbaan-ọ k'iden-dama, idikha adubh-m odik manda wani kwa kẹ ọgbaakh-ọ.” 18 Mẹ wọ e, Samwẹl ọgbaakh-ẹ odik kpenamkpen, kẹ manda wani kodubh. Mẹ wọ, Ẹli oben bi, “Kẹ wọ ode Ọvaar Ibinọkpaabyi e, tte osi odik kw'ojibh-ẹ abẹ.”

19 Mada Samwẹl ọm-ọbar, wa Ọvaar Ibinọkpaabyi owobh ttar-ẹ, obiro osi odik kpenamkpen kwa Samwẹl ọgbaakhi, ọkhaama ẹjaakhi. 20 Wa anọng p'Israẹl biphyir, ttẹwọr ka Dan maa atza apyiri Beershẹba, atzin k'odik ọkkakka bi, Samwẹl ode ọsi-ẹjaakhi kw'Ọvaar Ibinọkpaabyi. 21 Wa Ọvaar Ibinọkpaabyi ochina ororo om-osi ẹjaakhi cha for sẹ ka Shilo, ma Shilo wọ kw'osi ẹjaakhi cha for sẹ ọnang Samwẹl.

<- 1 Samwẹl 21 Samwẹl 4 ->