1 Avaarnọng 9

Ọvaar Ibinọkpaabyi oyini Sọlọmọn abẹ

1 Mada Sọlọmọn ọkk'Ọhọhm kw'Ọvaar Ibinọkpaabyi, ọmaana ẹvaar-ttọhmma okyera, obiro okyera odik kpenamkpen kw'ochibhi bi osi, 2 Ọvaar Ibinọkpaabyi oyin Sọlọmọn abẹ ottong igbe ifa, mach'iwa oyin-ẹ abẹ ka Gibeọn. 3 Ọvaar Ibinọkpaabyi oben-ẹ bi:

“Kaam nkk'njọhm sọ, ttara ephyema ch'akk'asa k'itzitzikha saam mmaanga; kaam nkk'ọhọhm kw'akk'asa ndekha nhok bi, mẹ kw'anọng am-akpobha che chaam maa, ogbe ode. Chen paam ám-akkeri mẹ, ettem chaam ébire échina ororo ewobha mẹ.

4 “Odik okhuri kọ, idikha atzọn-m abẹ ka nnam-ophephe ttara ettem obungichẹ ọmaana etzora, mach'iwa atte Devid osi, asi idik biphyir atzor k'odem kwa mben-ọ bi asi, abira ahok akpebhi ọmaana aphaangi paam, 5 kaam ńttima ọvaar-gbera kw'ẹvaar chọ k'Israẹl aranga maa, ogbe ode, mach'iwa nchekhi nnang atte Devid, k'ogbe kwa mbeni bi, ‘Kọ echuni kéde bi, ákhaama ọnọng ọkhaama kw'otzera eho chọ, mach'ọvaarnọng kw'Israẹl.’

6 “Yina, idikha bọbọng, obiro ode va pa va pabọng, bọ akpa nnam abọr-m, bọng asana ọmaana akpebhi paam, pa nkk'bọng nnanga kahokhi, bọng attena atza ahakha nho abira akpobha idik idọdọk, 7 kaam ńdimi anọng p'Israẹl k'irerek sa kaam nkk'bẹ nnanga, ḿbiri mmum ọhọhm nwa kw'nkk'ndekha nhok bi, anọng akpobha che chaam. Anọng p'Israẹl án-ade ọhammadik ttara olulukhidik k'ottem kw'idibhon biphyir. 8 Ọhọhm nwa ón-ode ọtzakhung. Ókkoni anọng biphyir p'arenga akwọbha mẹ, bẹ álukhi aben bi, ‘Okhuri yan kw'Ọvaar Ibinọkpaabyi osi odik-dema nwa m'irerek nna ttara m'ọhọhm nwa o?’ 9 Anọng án-abhina bi, ‘Okhuri da bẹ akk'nnam akpa abọra Ọvaar Ibinọkpaabyi, kw'ode Ibinọkpaabyi kwabẹ, kw'iwa otzim ab'otte pabẹ obina k'Ijip e. Idik idọdọk in-ichi bẹ ẹja, bẹ ahakha nho anang sẹ, abira akpobha sẹ. Kwẹ wọ osi, Ọvaar Ibinọkpaabyi ọnang bẹ ọmmamma nwa biphyir e.’ ”

Itzọhmbọhk idọdọk sa Sọlọmọn

10 Iwa ka cho kw'ottong ẹrọbh, wọ kwa Sọlọmọn osi obe mva ọfa f'ode: Ọhọhm kw'Ọvaar Ibinọkpaabyi, ọmaana ẹvaar-ttọhmma. 11 Wa ọvaar Sọlọmọn ọnangi ọvaar Hiram kwa Taya ibhon ẹrọbh sa Galilee, okhuri nchi s'ọbhọhmi mancheni, ọmaana nchi sa siprẹs ttara gol kw'iwa Hiram okk'Sọlọmọn ọnanga mach'orori. 12 Yina, mada Hiram obin ka Taya bi, ọtza ore ibhon sa Sọlọmọn ọkk'ẹ ọnanga, wa ibhon nna kẹ ettem kidaami. 13 Ọn-ọbọbh bi, “Ayi kwaam, bọng ibhon-dema rọ s'anang-m ma?” Wa oyeri ibhon nna Ẹkhọma cha Kabul[a]. Mando kw'ibe nnuma ikpen maa, apyiri mayina. 14 Ode ch'iwa Hiram okk'atalẹn arọbh azadani pa gol ọtzọhma ochena ọvaar Sọlọmọn.

15 Ma wọ ode mphaari s'ọtzọhm f'Ọhọhm kw'Ọvaar Ibinọkpaabyi f'iwa Sọlọmọn otzim anọng osi, ọmaana ẹvaar-ttọhmma kwẹ, ọmaana igbo s'ọyaabh, ọmaana echumi cha Jẹrusalẹm, ọmaana Hazọr, ọmaana Mẹgido ttara Gẹzẹr. 16 (Ode ch'iwa Phero, kw'ode ọvaarnọng kw'Ijip okk'obhon kwa Gẹzẹr abẹ orima, okhem-ẹ, ọkhẹ-ẹ ekpon ọkwọmi. Ofhu anọng pa Kenaan p'arukhi mẹ, yina ọn-ọtzọk obhon nwa mach'ẹnanga ch'ọbada, ọnang ominanwa kwẹ kw'ọba Sọlọmọn. 17 Sọlọmọn obiro ọkpa nnam osi obhon kwa Gẹzẹr.) Osi obhon-ẹrakha kwa Bẹt-Họrọn, 18 ọmaana Baalat, ttara Tamar k'ibe s'anọng anarukhi, m'irerek sẹ, 19 ọmaana idedenmon s'ọkhaanga-họhm, ọmaana ibhon s'akpaar pẹ pa nnyanyaang mmindọr, ttara ibhon sa nnyanyaang sa Sọlọmọn. Wa osi odik kpenamkpen kw'ọdaakh-ẹ bi osi ka Jẹrusalẹm, ttara Lebanọn makhọra ngọma kpenamkpen s'iwa ọdabhi.

20 Wa anọng p'Amọr, ọmaana pa Het, ọmaana pa Periz, ọmaana pa Hiv, ttara pa Jẹbus (p'iwa ani Israẹl afon), atzim am-arik m'ibe nna. 21 Wa va pa va p'anọng mba p'iwa arikhi m'irerek nna, p'anọng p'Israẹl anafha akhubh bọ, p'iwa Sọlọmọn on-otzim osi obira-tzọhm fẹ, mach'ode maa, apyiri mayina. 22 Yina, wa ọnọng manda wani kw'ofon Israẹl, kwa Sọlọmọn okhe k'ebira kode. Wa otzim bẹ osi arim-egbong pẹ, ọmaana akhaan-nọng p'ẹfa chẹ, ọmaana agbaan, ọmaana atzọhmnọng pẹ, ọmaana ayaari-nnyanyaang, ọmaana adenho p'akpaar pa nnyanyaang mmindọr, ttara p'ayaari-nnyanyaang. 23 Wa Sọlọmọn obiro ọkhaama anọng ẹnọhna obhiri arọbh azenamfa obhiri jobh, p'osi adenho p'itzọhm p'am-akkeri atzọhmnọng.

24 K'ogbe kwa ominanwa kwa Phero okk'ofona k'odedenmon kwa Devid okwu, k'ọvaar-họhm kwa Sọlọmọn ọkk'ọsa ọnang-ẹ, ọyaabha igbo ọkhọri.

25 Wa Sọlọmọn om-osi ẹjafọhni cha nnanga nkwọmisẹ, ọmaana cha nnanga s'odidiri igbe ittaan ka cho, k'ijafọhnibe s'ọkk'ọsa ọnang Ọvaar Ibinọkpaabyi. Wa om-obiro ọkwọmi insẹns m'itzitzikha s'Ọvaar Ibinọkpaabyi m'ogbe nwuma wani ttara njafọhni. Mando kwa oreng osi itzọhm s'ọhọhm nwa.

26 Wa ọvaar Sọlọmọn obiro osi akpaar p'ideden p'asi ka Ẹziyọn-Gẹbẹr, kw'ọbaang Ẹlat k'ẹkhọma ch'Edom, k'ẹraangakha ch'Ẹraanga-khora. 27 Mando kwa Hiram ọtzọhmi ajinọng pẹ p'akpo akpaar p'ideden p'asi ọyayaar, bẹ atza atzor ajinọng pa Sọlọmọn p'am-ayaari akpaar pẹ p'ideden p'asi. 28 Bẹ ayaar achina ka Ophir, atza atzima atalẹn pa gol ẹnọhna obhiri ẹrọbh, pa bẹ atzim achena ọvaar Sọlọmọn.

<- 1 Avaarnọng 8 1 Avaarnọng 10 ->