1 Kǝja ndǝr kǝra nja fǝr kǝr ǝni, kalar ndǝra vǝr cim ja nggya ndǝr tǝɗǝmwa anǝ njir nu, a cimǝr ja thlǝr kǝra mǝnahǝu. 2 Ndǝr tǝɗǝmwa ja nggya ndǝra gǝra ǝnga sǝra nja vazǝ nyi ni a dumwar nji, ja ɗa ndǝr mala zǝmǝu, ndǝr ɓǝlar kǝrnyi, ndǝr ɗǝfu mǝnahǝu, ndǝra ǝnga hangǝkal mǝnahǝu, ndǝr dlǝwu mǝthlǝpi, ndǝra wu sǝn highiɓau gagaɗau. 3 Najaka ndau aˈyi ja ndǝr nyi ǝnga padlǝ mai, ǝnga aˈyi ja ndǝr gal pa mai, ama ndǝ hangǝkal, ǝnga tsu aˈyi ndǝr tsǝtsǝbwari mai, ǝtsu aˈyi ndǝr yiwu gǝnna gagaɗǝ mai. 4 Pakatǝu kǝl ji ɗa ndǝra sǝn sǝɓiya ki nyi mǝnahǝu, ju mǝliya wazha nyi nda mǝl sǝra ju na ǝnga nda gǝnggǝr nyi sǝli wu kalar lagu. 5 (Ma ndau aˈyi a sǝn ǝnggǝra ja ɓau ǝnga njir ki nyi mai, abari nga ja sǝn ɓǝ ǝnga njir nu Hyala?) 6 A sara ja ɗa ndǝra dzǝgwa ɗa ndǝr nu Hyal mai, ara ɓwadzau a nda sǝwa nyi ba nja mǝliya nyi numa kǝra nji mǝliya nyi anǝ shatan. 7 Ndǝr tǝɗǝmwa ja ɗa ndǝra nja ndǝr mǝnahǝu ar kǝra ja wu mwar njira aˈyi njir nu mai, a sara ɗa sǝr sǝli, ǝnga ja tǝɗau a gu lǝbam shatan.

8 Abangǝ tsu njir dlǝwa pubu, pakatǝ nda nggya njira nju gǝnggǝr nda sǝli, aˈyi njir pǝ miya mǝmǝthlu mai, ǝnga tsu aˈyi njir nyi ǝnga padlǝ mai, ǝnga njir suna gǝnna mai. 9 A mbari anǝ nda, nda sǝɓiya jirkura mbǝrsar nda ǝnga kǝr papalǝu. 10 Sǝ tanggǝrma nja dzǝbiya nda, ǝnggau, ma nja ˈyi thlǝwa nda ǝnga vanyi vazǝ mai, bǝgǝ nda ɗa njir dlǝwa pubu.

11 Abangǝ tsu mathlǝkǝˈyir nda, nda ɗa njira nju gǝnggǝr nda sǝli, aˈyi njir ndǝr nǝ gwaɗǝvi mai, ama njira tsǝrpǝri kǝrnda, ǝnga wu kalar sau, nja fǝr kǝr ǝnga nda.

12 Ndǝr dlǝwa pubu kǝl ji ɗa ndǝr mala zǝmǝu, ǝnga ju sǝn sǝɓiya wazha nyi ǝnga njir ki nyi mǝnahǝu. 13 Njir dlǝwa pubu kǝra wu mǝl thlǝr nda mǝnahǝu, ndu uya thlǝmǝ mǝnahǝu anǝ kǝrnda, ndu ndǝr gǝra hivǝr ar kǝra mbǝrsar nda wu Kǝrsiti Yesu.

14 Ar pǝci kǝra ya vǝr tsǝfǝ cama tsǝtsǝfǝ kau a nda anǝ ngau, yu fǝ ɗǝfu abǝr yu shili ǝgya gau a sǝkari kushu. 15 Ama ma aˈyi yi shili kaɗǝ mai, ga nggya ǝnga sǝni ǝnggǝra mǝna kyaga nggya wu pama nji gǝ Hyal, kǝra ca ngǝ daɓǝ njir nu nǝ Hyal mbǝmbǝɗau, ca ngǝ shimal ǝnga fǝ hya jirkur. 16 Aˈyi ǝnga tǝkǝkǝr mai, sǝ kǝ mǝna vǝr nu kau dǝgal nga nyi: