Njir Tasalonika

1 Cama tsǝtsǝfǝ kǝ sara ara Bulusu, ǝnga Silasu, ba ǝnga Timathlawusu.

A nda nǝ daɓǝ dzǝ njir nu wu mǝlmǝ Tasalonika, kǝra nǝ Hyal Tada ǝnga Thlagǝr mǝn Yesu Kǝrsiti.

Mayiwakur ǝnga huɗǝ pǝrtǝu anǝ hyi.

2 Cumu nga ˈyu lǝ usaku anǝ Hyal arya hyi patǝu, ǝnga ˈyu ngga thlǝmǝr hyi wu kǝdi Hyalǝr ˈya. 3 ˈYu dumwa ǝnga ɗǝnga ar kǝra hyi wu mwar Hyalǝr mǝn ǝnga Dǝrmǝn, ar kǝra thlǝrǝr hyi nǝ mbǝrsa, ǝnga thlǝr yiwukur kǝra hyu mǝl wu dzau, ǝnga cinapir hyi wu fǝrkǝrǝr hyi wu Thlagǝr mǝn Yesu Kǝrsiti.

4 Wazha ama kǝra Hyal wu yiwu, a sǝn ˈya abǝr Hyal ngǝ caɗǝbiya hyi, 5 arya ndǝshigur ˈya aˈyi shili anǝ hyi ǝnga ɗahǝ waci mai, ama tsu ǝnga dǝnama, ǝnga Mambǝl Cicau, ǝnga jiri tataˈyi pir. Arya wu sǝn hyi ǝnggǝra ˈyi nggya wu pama hyi aga dlǝwa dzǝr hyi. 6 Hyi ɗa njir faˈabiya hiya ˈya ǝnga njira faˈabiya hiya Thlagǝu. Alaga wu ɓwaɓwatǝ gagaɗau, kǝ hyi dlǝwuri cama sara ara ˈya ǝnga huɗǝ pipida lagur Mambǝl Cicau. 7 Lagu kǝ nga hyi ɗa njira nju fǝ li ari anǝ patǝr njir nu wu ˈyiˈyir Masidoniya ǝnga Akaya. 8 Arya sara ara hyi ngǝ cama Thlagǝ tǝtǝlnakǝr, aˈyi wu ˈyiˈyir Masidoniya ǝnga Akaya waci mai, ama anǝ kalar njira sǝnbiya sǝ ar kǝra mbǝrsar hyi wu Hyal baˈamani. Agabangau, sǝ aˈyi ˈya ɓǝra sǝn na ar kǝri mai. 9 Arya nja nyi ǝnga kǝrnda nga vǝr lǝ sakida ǝnggǝra hyi dlǝwur ˈya. Nja nyi nar ˈya ǝnggǝra hyi tǝkǝbiya dzǝ ǝnga katǝr hyi ˈyar, ba hyi sha shili ǝgya Hyal, Hyal jijiri kǝra ǝnga pi.

10 Ndǝ nana tsu, ǝnggǝra hyi nggya aga sǝkǝ shidar Zǝr nyi sara dǝmǝlmau, ndǝra Hyal hyaˈana nyi sara vir tau, ca ngǝ Yesu, ndǝra kǝtiya mǝn ara numa nǝ huɗǝ ndzǝndzǝ Hyal kǝra wu shili.

Tasalonika Nǝ Tanggǝrma 2 ->