10
Iehova ena hahemauri
1 Medu na Iehova enai ba noia,
medu gabena negana ai;
Iehova, dagadaga e karadiamu
bona batugu na taunimanima e henidiamu
bona uma anidia na taunimanima iboudiai e henidiamu
Diravana na ba noia.
2 Badina be e koro laulaudia helaḡadia na e hereva kava hereva kavamu,
bona mari-abi taudia ese ḡau koikoidia e itadiamu;
nihi taudia ese nihi koikoidia e herevalaidiamu,
bona tauhalo herevadia asi anidia e gwauraidiamu.
Una dainai taunimanima na e loa eva-evamu, mamoe na heheto,
idia na hisi e animu, asi ireḡudia tauna dainai.
3 Egu badu na e ḡaraḡaramu, mamoe ireḡudia taudia latadiai;
hegunalai taudia na matadia baina hakani.
Badina be Iehova Sabaota ese ena seri, Iuda iduhuna, e reḡuamu;
tuari ai ia ese ena heaḡi hosina heḡereḡerena ai baine halaodia.
4 Idia bogaragidia amo daiguni nadina bainema;
idia bogaragidia amo kalaga ikokona bainema;
idia bogaragidia amo tuari pevana bainema;
idia bogaragidia amo lohia iboudiai baema.
5 Heboudia ai idia na tuari taudia mai goadadia heḡereḡeredia ai baela,
inai taudia na ariara kopukopudia ai bae moimoilaidia;
idia na bae tuari, badina be Iehova na idia dekedekediai,
idia ese hosi ai e guimu taudia bae hadareredia.
6 Iuda iduhuna baina hagoadaia,
bona Iosef iduhuna baina hamauria.
Baina loulaidia, badina be na bogadia hisimu,
bena basinama dadaraidia heḡereḡerena ai baela;
badina be lau na Iehova, edia Dirava,
bona lau ese baina haere henidia.
7 Bena Efraim na tuari tauna mai goadana heḡereḡerena ai bainela,
bona lalodia na bae moale, vine ranuna bema inua na heto.
Natudia ese bae itaia, bena bae moale,
lalodia ese Iehova bae heaḡilaia.
8 Baina kalodia, baina haboudia,
badina be lau ese vada na hamauridia;
bena bae hutuma, gunaguna heḡereḡerena.
9 Ena be na hakarohodia rohoroho, bese idau-idau bogaragidiai,
to tano daudaudia ai bae lalogu tao;
bena idia bona natudia bae mauri,
bona bae lou mai.
10 Aigupto tanona amo baina hakaudia mai,
bona Asuria amo baina haboudia,
bena Gilead tanona ai bona Lebanon ai baina hakaudia vareai,
ela bona asi nohonoho gabudia.
11 Aigupto davarana bae hanaia,
davara hurehuredia bae vea,
bona Nilo sinavaina ena dobu gabudia iboudiai na bae kororo.
Asuria ena hekokoroku bae hahemaraia,
bona Aigupto ena dagi auna baine lasihi.
12 Iehova ena goada ai baina hagoadadia,
bena ia ladana bae imodaia.