1 Bena aneru ese mauri ranuna sinavaina negari-negarina e haheitalaigu: ia na Dirava bona Mamoe Natuna edia terono amo e lasi, 2 hanua ariarana bogaragina amo e arua parara. Sinavai kahana kahana mauri auna e gini; huahuana na idau-idau, gwauta rua, hua ta ta mai huahuadia; bona au rauna ese bese idau-idau e hamauridiamu. 3 Heuduguirai basine mia; a Dirava bona Mamoe Natuna edia terono na unuseni ai. Ena hesiai taudia danu bae toma henia diho; 4 bona vairana bae itaia; bona ladana na bagudia ai baine hetore. 5 Hanua na basine boi lou, bona lamepa bona dina diaridia na herevadia, badina be Lohiabada Dirava ese baine hadiaridia; bona bae lohia hanihanai.

6 Aneru ese e hereva henigu, eto, Ini hereva na mamaoro-mamaoro bona momomo-kakani. Lohiabada, peroveta taudia laumadia edia Dirava, ese ena aneru vada e siaia, asi vanahana bae vara ḡaudia na ena hesiai taudia baine haheitalaidia. 7 Ba heita: lau na ba vasimu.

Ina buka e gwaurai gunamu herevadia e badinamu tauna na namo.

8 Lau Ioane ini ḡau na ita bona na kamonai. Na ita bona na kamonai vaitani, bena ini ḡau e haheitalaigu aneruna aena badinai na goru diho, baina toma henia diho nato. 9 Bena e gwaugu tao, eto, Ene basio kara toma; lau na hesiai taugu, oi bamomu, bona varavaramu peroveta taudia bamodia, bona ina buka herevadia e badinamu taudia bamodia. Dirava hari ba toma henia diho.

10 Ma e hamaorogu, eto, Ina buka ena peroveta herevadia na basio kou ahu, badina be negana vada eme kahikahi. 11 Kara dika tauna do baine kara dika; lebulebu tauna do baine lebulebu; kara maoromaoro tauna do baine kara maoromaoro; helaḡa tauna do baine helaḡa.

12 Ba heita: lau na ba vasimu. Dava na imagu ai; taunimanima iboudiai edia kara heḡereḡeredia davadia baina henidia. 13 Lau na Alefa bona Omega,[a] gini-gunana bona gini-gabena, matamana bona dokona.

14 Edia dabua e huri taudia be nanamo, badina be idia ese mauri auna bae lao henia diba, bona iduara amo hanua lalonai bae raka vareai diba. 15 A murimuri ai be sisia bona babalau taudia bona heuda-hanai taudia, bona ala-ala taudia, bona kaivakuku e toma henidia dihomu taudia, bona koikoi herevadia igwauraidia e moalelaimu taudia.

16 Lau Iesu ese egu aneru vada na siaia vasi, ekalesia oreadia herevadia vada e vasilai. Lau na David ramuna bona tuhutuhuna. Lau na hisiu bada, mai diarigu.

17 Lauma bona headava matamata hahinena e tomamu “Aoma”. E kamonaimu tauna danu baineto “Aoma”. Ranu mase tauna na bainema. Bona ranu e uramu tauna ese mauri ranuna baine inua, asi davana.

18 Ina buka ena peroveta herevadia e kamonaimu taudia iboudiai na sisiba henidiamu: tau ta ese ini hereva latadiai hereva ta baine atoa kau, Dirava ese ina buka lalonai e tore hisihisidia na ia latanai baine ato kau; 19 bona ta ese hereva ta ina peroveta bukana amo baine abia oho, Dirava ese ia ahuna mauri auna enai bona hanua helaḡana lalonai, ina buka ai haridia e tore ahudia, na iena amo baine abi oho.

20 Ini ḡau e gwaurai hedinaraimu Tauna e tomamu “Oibe, ba vasimu”. Amen: Lohiabada Iesu e, aoma.

21 Lohiabada Iesu Keriso ena harihari-bada na helaḡa taumui iboumui ai emui ai baine mia. Amen.

<- APOKALUPO 21