2
Hahehisi taudia herevadia
1 Kara havara e lalo hatamu,
bona kara dika daladia na edia mahuta patadia ai e haeromu taudia,
madi ihabaidia!
Daba e reremu ai, e karaiamu,
badina be una na imodia lalodiai.
2 Biru tanodia e hekise-hekise henidiamu, bena e dadidiamu,
ruma danu, bena e abidia ohomu;
tau ta mai ena ruma ida,
tau ta mai ahuna ida, e hahisihisidiamu.
3 Taunabunai Iehova ini e gwau tomamu:
A itaia, ina iduhu ihadikana dalana na laloa hatamu,
aiomui na ia metauna henuna amo basio abidia oho diba;
bena basio raka mai hekokorokumui,
badina be nega na baine dika.
4 Una dina ai ehona na latamui ai bae kurea lao kurea lao,
edia rohe-ahu ai bae tai lolololo,
baeto “Ai na vada a dika vaitani;
ia ese egu bese ahuna e ha-idauamu,
egu amo e abia ohomu.
Ia ese emai biru tanodia na
e guimai taudia e henidia hagau-hagaumu”.
5 Taunabunai, Iehova ena hebou taudia bogaragidiai,
tau ta basine noho,
tano hetoana na mari amo basine davaria.
6 Idia na e gwaugwaumu, “Basio haroro” e tomu;
“gau unuhetomadia basio harorolai;
ihahemaraida ḡaudia ese basie lasida tao”.
7 Iakob besena e, ini e gwau tomamu be namo eiava?
Iehova ena Lauma se haheaukamu a?
Ini na iena kara a?
Egu hereva ese raka maoromaoro tauna na
asie hanamoamu a?
8 A umui na o tore isimu, egu bese taudia o inai henidiamu;
maino taudia, heabidadama ai e raka hanaimu
bona tuari asie laloa hatamu taudia,
edia dabua o dabuidia ohomu.
9 Egu bese hahinedia na
edia ruma namodia amo o luludia lasimu;
bona natudia maraḡidia edia amo
lau hairaigu o abia oho vaitanimu.
10 A tore isi, baola;
badina be ina na dia laḡa-ani gabuna ta;
badina be hahemiro ese e habuaiamu,
e habuaia tarimu.
11 Tau ta bema loaeva-eva,
hereva asi anidia bona hereva koikoidia bema gwaurai,
bema toma “Vine ranuna bona inuinu ḡaudia goadadia
baina harorolai henimui”,
ia na bema heḡereḡere ina bese enai,
edia haroro tauna ai bema lao.
12 Iakob besena taumui e, momokani lau ese iboumui ai baina haboumui,
Israel taudia kwabukwabudia danu baina haboudia.
Baina gogodia,
mamoe na edia maḡu ai e hegogomu na heheto,
mamoe serina edia rei gabuna ai e nohomu na heto,
taunimanima hulumana, mai heloḡo-heloḡodia ida.
13 Maḡu ihamauruna tauna na idia vairadiai bainela,
bena bae tata uru, ikoukou amo bae hanai,
unu amo bae didi lasi.
Edia pavapava ese baine gunalaidia,