1 Una negana ai taunimanima hutuma bada e hebou, e hemoi tao hemoi tao. Bena ia ese ena hahediba e hereva henidia, eto, Nahuamui ba toho Farisea taudia edia hatubu ḡauna na garina, koikoi ḡauna bunai. 2 E ḡova ahu ḡaudia iboudiai do bae hedinarai, bona hehuni ḡaudia iboudiai do bae dibadia. 3 Taunabunai, dibura lalonai o gwaurai herevadia na diari ai bae kamonai; bona daiutu lalodiai o hemaunulai herevadia na ruma guhidia amo bae harorolai.

4 Turagu verina e, na hamaoromuimu, tau-anina ialana mai dibadia murinai ḡau ta ikarana asi dibadia taudia na garidia basio gari. 5 A baina hamaoromui daika garina ba gari; baine alamui mase murinai mai siahuna Gehena lalonai baine tahomui dobi tauna, ia hari garina ba gari. 6 Bisini ima davadia na cent rua mo, ani? A Dirava ese idia ta se laloa herekwamu. 7 Umui kwaramui huidia iboudiai vada e duahi vaitani. Taunabunai, basio gari; umui ese bisini diaḡau o hereadiamu.

8 Na hamaoromuimu, taunimanima vairadiai bae gwauraigu hedinarai taudia iboudiai na Taunimanima Natuna ese Dirava ena aneru vairadiai baine gwauraidia hedinarai; 9 a taunimanima vairadiai baine ḡoregu tauna na lau ese Dirava ena aneru vairadiai baina ḡorea. 10 Taunimanima Natuna bae ere dika henia taudia iboudiai edia dika bae hegwau tao; a Lauma Helaḡa baine ere dika henia tauna ena dika basine hegwau tao.

11 Dubu biagudia bona hanua lohiadia bona siahu taudia vairadiai bae hakaumui lao negadia ai na lalomui basie hekwarahi, ede ba haere toma eiava ede ba hereva toma; 12 badina be una hora ai ba gwaurai herevadia na Lauma Helaḡa ese baine hadibamui.

13 Aru taudia bogaragidiai tau ta ese e noia, eto, Hahediba taumu e, mani emu kara kakagu ba hereva henia, ba hamaoroa, tamamai ena kohu amo lau ahugu baine henigu. 14 A Iesu ese e haere henia, eto, Tau e, daika e gwaumu lau be hahemaoro taugu eiava emui kohu iharina tau.

15 Bena ia ese e hamaorodia, eto, Nahuamui-ba toho, kohu iura-henina ena lalo-ani garina. Badina be taunimanima na edia kohu momo ese basie hamauridia.

16 Bena ia ese sivarai heḡereḡerena ta e henidia, eto, Taḡa tauna ta ena uma anidia na diaḡau. 17 Bena lalona e hadaia, eto, Lau na ede baina kara toma? Badina be egu uma anidia ihaboudia na asi gaabuna. 18 Ma eto, Ini hari baina kara toma: egu roge hari baina roho, badadia haida baina hagini; bena egu uma anidia bona egu ḡau iboudiai unuseni ai baina habou; 19 bena laumagu baina hamaoroa, bainato “Laumagu e, emu kohu na diaḡau, laḡani momo davadia; ba laḡa ani, bavaniani, ba inuinu, ba moale”. 20 A Dirava ese e hereva henia, eto, Kava taumu, hari hanuaboi laumamu na emu amo baina abia oho; bena hari o haboumu kohudia na daika ese baine abi? 21 Ena kohu e haboumu to asi ena taḡa Dirava enai tauna na unu mo heto.

22 Ia ese ena hahediba ma e hamaorodia, eto, Badina bunai na hamaoromuimu, lalomui na basie hekwarahi emui mauri dainai, dahaka bavani; eiava taumui daidiai, dahaka ba hahedokilai. 23 Mauri ese aniani e hereaiamu; bona tau-anina ese danu dabua e hereaiamu. 24 Galo ba haerodia: asie hadohadomu, asie taboromu, asi edia taḡa, asi edia roge; a Dirava ese e ubudiamu. Umui ese manu asio hereadiamu a?

25 Umui daika ena lalo-hekwarahi amo tauna anina sisina taina mo baine halataia diba? 26 Benaini, ina ḡau pipikina ikarana asi dibamui, haida ma o lalo hadailaimu anina be dahaka?

27 Herahera ba haero, ede e vara tomamu: asie ḡaukaramu, asie hatuhatumu; a lau na hamaoromuimu, Solomon mai hairaina idoinai ena namo idia ta ida asie heḡereḡere. 28 Benaini, tano avadia, harihari mimia, kerukeru lahi ai bae taho kau, to Dirava ese unu e hadabualai tomamu; be, ia ese umui danu basine hadabualaimui a? Abidadama maraḡi-maraḡi taumui!

29 Taunabunai, aniani ḡaudia basio tahu, bona lalomui basie daradara. 30 Badina be unu ḡau be tanobada besedia iboudiai ese e tahumu; bona Tamamui na mai dibana o dabumu ḡaudia bunu. 31 A iena basileia ba tahua; bena unu ḡau iboudiai danu ma baine henimui.

32 Seri maraḡi e, basio gari; badina be Tamamui na basileia ihenimui moalena e moalemu. 33 Emui kohu ba ha hoi, ba hariharilai; basine moukamouka vainana bavabia. Guba kohuna, basine ore ḡauna, bavabia; unuseni ai henao tauna se raka vareaimu, bona pitopito danu se ani oremu. 34 Badina be emui kohu e miamu gabuna ai lalomui danu unuseni ai.

35 Emui rami ba hekasilai; emui kede ba sinai. 36 Biagudia e nariamu memerodia heḡereḡeredia ba noho: ia na headava ariana amo baine lou mai, baine pidipidi, bena iduara bae kehoa haraḡa-haraḡa. 37 Biagudia bainema negana ai gimadia ai baine davaridia memerodia na bae namo; na hamaoromui momokanimu, ia ese ena rami baine hekasilaia, aniani gabuna ai baine hahelaidia, bena isiaidia baine lao heni. 38 Malokihi ai eiava daba kahana ai bainema, unu baine davaridia toma memerodia na bae namo. 39 Ina na ba diba: ruma biaguna na henao tauna ena mai negana bema diba guna, ia na bema gima, bena eua ruma basinema darea. 40 Umui danu ba noho heḡaeḡae, badina be asi dibamui horana ai Taunimanima Natuna do bainema.

41 Petro ese e nanadaia, eto, Lohiabada e, hari hereva heḡereḡerena be ai mo o henimaimu, eiava taunimanima iboudiai danu? 42 Lohiabada eto, Kohu ireḡuna tauna mai ena kamonai bona mai ena kara maoromaoro, biaguna ese e abia hidi, ena ruma baine reḡua, bona aniani negadia ai memero adia baine henidia, tauna be daika? 43 Biaguna bainema negana ai baine davaria unu e kara tomamu tauna na namo; 44 na hamaoromui momokanimu, ena kohu idoinai ireḡuna tauna ai baine halaoa. 45 A una kohu ireḡuna tauna lalona bema hadaia, bema toma “Biagugu vada e halahemu”, bena hesiai taudia bona hahinedia bema dadabadia, bema ani havara, bema inu havara, bona bema kekero: 46 una tau ese se laloa dinana ai bona se heḡaeḡae horana ai biaguna na baine gini dae, bena baine dapaia parara, gwau-edeede taudia ida ahuna baine henia.

47 Hesiai tauna ta biaguna ena ura dibana, to se heḡaeḡae bena ena ura se karaia, una tau na bae kwadia momo. 48 A asi dibana tauna, ena be ena kara davana korikori be hedadaba, to basie kwadia momo. Ḡau hoho e henia tauna enai ḡau hoho bae tahu; bona kohu momo ireḡudia ai e halaoa tauna enai kohu momo bae gwaurai.

49 Lau na lahi tanobada ai baina tahoa kau totona nama; ua uramu bema hururu. 50 Lau na mai egu bapatiso, do bae bapatisolaigu; lau na ura lalo-dikamu baine ḡuḡuru. 51 Umui o tomamu lau na maino tanobada ai ihavarana totona nama a? Na hamaoromuimu, lasi; ihapararana totona nama. 52 Badina be hari ina negana amo ruma tamona taudia laima bae haheparara, tatoi ese rarua bae inai henidia, bona rarua ese tatoi ma bae inai henidia. 53 Bae hemaka, tama bona mero, mero bona tama, sina bona kekeni, kekeni bona sina, rava bada hahinena bona rava maraḡi hahinena, rava maraḡi hahinena bona rava bada hahinena.

54 Ia ese aru taudia e hamaorodia, eto, Umui na lahara kahana ai duba o itaiamu, o tomu “Medu baine diho”; bena vada e dihomu. 55 Eiava diho e toamu, o tomu “Dina baine ḡaraḡara”; bena e ḡaraḡaramu. 56 Koikoi taumui, umui na guba bona tanobada toadia mai dibamui; matona, hari ina nega toana be asi dibamui a?

57 Badina be dahaka sibomui hahemaoro momokanidia asio karamu? 58 Oi inaimu ida hahemaoro tauna dekena baola negana ai dala ai ba hamarumarua, ia ese hahemaoro tauna enai bame verimu vareai na garina, hahemaoro tauna ese dibura rumana igimana tauna imana ai baine atomu na garina, dibura rumana igimana tauna ese dibura rumana lalonai baine koumu na garina. 59 Lau na hamaoromumu, unu amo basio raka lasi ela bona davana ba haḡuḡurua vaitani.

<- LUKA 11LUKA 13 ->