1 Amoro pavapavadia iboudiai Ioridane sinavaina unukahana ai, Iahara kahana ai, e nohova, bona Kanaan taudia edia pavapava iboudiai, kone kahana ai e nohova, na harina e kamonai, Iehova ese Ioridane sinavaina e hakororoa Israel taudia ediai ela bona idia vada e hanaia, bena kudoudia e hetaha bona laumadia e daure, Israel taudia daidiai.

2 Una negana ai Iehova ese Iosua e hereva henia, eto, Vasiga bavabi, Israel taudia ma ba peritomedia lou, nega iharuana. 3 Taunabunai Iosua ese vasiga e abi, Israel taudia e peritomedia, Gibeata-haraloto ai. 4 Iosua ese e peritomedia badina binai: Aigupto amo e raka lasi mamaruanedia iboudiai, tuari taudia iboudiai, na dala ai vada e mase, tano ḡaḡaena ai, Aigupto amo e raka lasi murinai. 5 E raka lasi tataudia iboudiai be vada e peritomedia guna; a dala ai e vara, tano ḡaḡaena ai, tataudia, tamadia na Aigupto amo e raka lasi murinai, na asie peritomedia. 6 Badina be Israel taudia na laḡani hari-ahui tano ḡaḡaena ai e loaloava, ela bona bese idoinai, tuari taudia Aigupto amo e raka lasi iboudiai, na e mase ore; badina be idia na Iehova erena asie kamonai. Bena Iehova ese e gwau henidia hamata, senedia e gwau henidia hamata baine henida eto tanoml, rata bona bada-ranuna e arumu tanona, na basine haheitalaidia eto. 7 Taunabunai idia natudia, idia ibolodia ai e halaodia taudia, na Iosua ese e peritomedia; badina be dala ai asie peritomedia.

8 Bese idoinai e peritomedia murinai, idia na edia taruha ai e nohova ela bona hisihisi vada e ore. 9 Bena Iehova ese Iosua e hamaoroa, eto, Hari dina ai Aigupto ena hemarai na emui amo vada na keia oho. Taunabunai, una gabu ladana e hatoamu Gilgal,*“Gilgal” anina be “Hekei”. ema bona hari dina.

10 Israel taudia na Gilgal ai e nohova negana ai, idia ese lagau-hanai ariana e karaia. Hua dinana ihagwauta-hanina adorahina ai e karaia, Ieriko taorana ai. 11 Lagau-hanai dinana e ore, kerukeru idia na una tano anina e ania, asie hatubua flaoana dikeadia bona e gabua uitina. 12 Tamo anina e ania, bena ma kerukeru mana e doko; Israel taudia na mana asie ania lou, a Kanaan tanona anina e ania una laḡani ai.

13 Ieriko badibadinai Iosua na e roha isi, tau ta e itaia, dare e veria lasi imana ai. Bena Iosua ese e raka henia kahi, e nanadaia, eto, Oi na ai ida, eiava inaimai? 14 Ia na e haere, eto, Lasi, lau na Iehova ena tuari oreana baina halohiaia totona nama. Bena Iosua na tano ai e goru diho, e toma henia diho, eto, Egu lohia ese ena hesiai tauna ede be haḡania tomamu? 15 Iehova ena tuari oreana lohiana ese Iosua e hamaoroa, eto, Emu tamaka na aemu amo a koki oho, badina be o ginimu gabuna na tano helaḡana. Bena Iosua na unu e kara toma.

<- IOSUA 4IOSUA 6 ->