1 Iehoiakim, Iuda pavapavana Iosia natuna, ena nega ai, Iehova ena hereva na Ieremia enai e kau, eto, 2 Rekab taudia edia ruma baola, ba hereva henidia, bena ba hakaudia mai, Iehova ena dubu ai, daiutuna ta lalonai. Bena vine ranuna ba dudui henidia, bae inua totona. 3 Taunabunai, Iaasania, Ieremia Habasinia natuna, mai tadikakana bona natuna iboudiai ida, bona Rekab iduhuna idoinai, na abidia. 4 Na hakaudia mai, Iehova ena dubu ai, Hanana Igdalia, Dirava ena tau, natuna edia daiutu lalonai. Una daiutu na lohia taudia edia daiutu badibadinai, bona Ma-aseia Salumu, dubu raka-vareaina igimana tauna, ena daiutu daenai. 5 Bena hodu haida, vine ranuna ai e honu ḡaudia, bona kehere haida na idia vairadiai na ato; bena na hereva henidia, nato, Vine ranuna ba inua. 6 A idia na e haere, eto, Ai na vine ranuna basia inua, badina be ai senemai Ionadab Rekab ese e haḡanimai, eto, Vine ranuna basio unua, umui bona garamui danu, ela bona hanaihanai; 7 ruma auta basio haginia; basio hadohado; vine imeana ta basio hadoa eiava basio abia emui; a emui mauri dinadia iboudiai kalaga ai ba noho, o noholaiamu tanona ai emui mauri dinadia bae hoho helaoreana. 8 Ai ese senemai Ionadab Rekab gadona vada a badinaia, e haganilaimai karadia iboudiai lalodiai, emai mauri dinadia iboudiai vine ranuna asia inuamu, ai bona adavamai bona natumai mamaruanedia bona hahinedia danu; 9 bona ruma danu asia haginidia, asia noholaidia. Asi emai vine imeadia, asi emai uma, asi emai uhe; 10 a kalaga ai vada a noho, bona senemai Ionadab ese e haganilaimai karadia iboudiai vada a badinadia bona a karadia. 11 A Nebukadresara, Babulono pavapavana, na tano idaena totona ema negana ai, ai ato “Aoma, Ierusalem aitala, Kaldea taudia bona Suria taudia edia tuari oreadia na garidia”. Taunabunai ai na Ierusalem ai a nohomu.
12 Bena Iehova ena hereva na Ieremia enai e kau, eto, 13 Iehova Sabaota, Israel Diravana, na ini e gwau tomamu: Aola, Iuda taudia bona Ierusalem inoholaina taudia ba hamaorodia, baoto, Iehova na e tomu: Hahediba herevadia basio abi dae bona egu hereva basio kamonai a? 14 Haheḡani, Ionadab Rekab ese garana e henidia ḡauna, vine ranuna basie inua, na vada e badinaia; idia na asie inuamu ema bona ina dina, badina be senedia ena haheḡani vada e badinaia. Lau ese vada na hereva henimui havara-havara, a umui ese asio kamonai henigu. 15 Lau ese egu peroveta hesiai taudia iboudiai vada na siaidia vasi, na siaidia havara-havara, nato, Iboumui ai emui dala dikadia amo ba raka siri, bona emui kara ba haḡoevadia, bona dirava idaudia muridia amo basiola, isiaidia basio lao heni; bena umui na henimui bona senemui na henidia tanona ai do ba noho. A taiamui asio hakala bona asio kamonai henigu. 16 Ionadab Rekab garana ese senedia ena haheḡani vada e badinaia, a ina bese ese se kamonai henigu. 17 Taunabunai, Ḡaubada Iehova Sabaota, Israel Diravana, na ini e gwau tomamu: A itaia, hahedika Iuda bona Ierusalem inoholaina taudia iboudiai latadiai vada na gwaurai ḡauna na ediai baina havaraia; badina be vada na hereva henidia to asie kamonai, vada na boi henidia to asie haere.
18 A Rekab iduhuna taudia na Ieremia ese e hereva henidia, eto, Iehova Sabaota, Israel Diravana, na ini e gwau tomamu: Badina be senemui Ionadab ena haheḡani vada o badinaia, bona ena hahediba herevadia iboudiai vada o badinadia, bona e haganilaimui karadia iboudiai vada o kara, 19 una dainai Iehova Sabaota, Israel Diravana, na ini e gwau tomamu: Ionadab Rekab iduhuna na nega ta ai lau vairagu ai iginina taudia ta ai basine dabu.
<- IEREMIA 34IEREMIA 36 ->